الماتىداعى جەتىسۋ اۋداندىق ىشكى ىستەر ءبولىمىنىڭ عيماراتىندا 34 جاستاعى ازامات وز-وزىنە قول جۇمساپ، قايتىس بولعان، - دەپ حابارلايدى Qamshy.kz 31 ارناعا سىلتەمە جاساپ.

الايدا، مارقۇم باقىت مۇستافايەۆتىڭ جاقىندارى، پوليسيانىڭ بۇل جاۋابىنا كۇمانمەن قارايدى. سەبەبى، "مارقۇمنىڭ ءوز-وزىن بۋىندىرىپ ءولتىرۋ ءۇشىن، وزىمەن بىرگە پوليسيا بولىمشەسىنە ارتىق شالبار الىپ كىرگەنىنە سەنبەيمىز. ونىڭ ۇستىنە، قايتىس بولعان ازاماتتىڭ دەنەسىندە كوگەرگەن ىزدەر بار" دەيدى.

الماتى وبلىسىنا قاراستى، رايىمبەك اۋدانى، سارىجاز اۋىلىندا تۇراتىن مۇستافايەۆتار وتباسىنىڭ شاڭىراعىنان جوقتاۋدىڭ ءۇنى ەستىلەدى. مارقۇمنىڭ جاقىندارىنىڭ ايتۋىنشا، جالاقى العان كۇنى ۇيىنە ورالماعان ازاماتتىڭ قايتىس بولعانى تۋرالى حاباردى پوليسيا قىزمەتكەرلەرى جەتكىزگەن. ءبىراق باقىتتىڭ تۋىستارى، باۋىرىنىڭ پوليسيا عيماراتىندا وز-وزىنە قول جۇمساپ، قايتىس بولعانىنا سەنبەيدى. 

مارقۇمنىڭ جاقىندارىنىڭ ايتۋىنشا، باقىت مۇستافايەۆ پوليسيا بولىمشەسىنە بۇزاقىلىق بابىمەن  ءساۋىردىڭ 18 كۇنى كەشكىسىن تۇسكەن. تاڭعى ساعات بەستىڭ كەزىندە دەنەسى قالالىق ءمايىتحاناعا جەتكىزىلىپتى. ال، تۋىستارىنا حابار كەلەسى كۇنى كەشكى 18.50-دە  ءبىراق جەتكىزىلگەن. بۇل ىسكە قاتىستى الماتى قالالىق ىشكى ىستەر دەپارتامەنتى، قانداي دا ءبىر پىكىر بەرۋدەن باس تارتىپ وتىر. ويتكەنى، تەرگەۋ ءالى جۇرگىزىلىپ جاتىر دەيدى. ونىڭ ۇستىنە، ءدال وسى وقيعا بولعان كۇنى اۋداندىق ءىىب كەزەكشىلىكتە بولعان المالى اۋدىنىنىڭ پروكۋراتۋراسى دا ءدال وسى ءىستى ءجىتى زەرتتەپ جاتقان كورىنەدى.