كەشە قازاقستان پرەزيدەنتى نۇرسۇلتان نازاربايەۆ قازاقستان حالقى اسسامبلەياسىنىڭ XXIV سەسسياسى كەزىندە جەر ماسەلەسىنە قاتىستى پىكىرىن ءبىلدىردى.

"شەتەلدىكتەرگە جەر ساتىلاتىنى تۋرالى بۇرىس اقپاراتتىڭ تاراۋىنان جەر ماسەلەسىنە حالىقتىڭ نازارى اۋىپ جاتىر. بۇعان دەيىن بىرنەشە رەت، ءتىپتى مەنىڭ ءوزىم مۇنىڭ جالعان ەكەنىن ايتتىم. تاعى ءبىر رەت ەسكەرتكىم كەلەدى، اۋىلشارۋاشىلىق جەرلەرىن شەتەلدىكتەرگە ساتۋ تۋرالى ماسەلە كوتەرىلگەن ەمەس، تالقىلانبايدى دا"، - دەدى ەلباسى ءوز سوزىندە.

سونداي-اق، ەلباسى "وسى ماسەلەگە كوڭىل اۋدارعانى ءۇشىن اعايىنعا ءبىر جاعىنان قۋانامىن.لايىم ءارقاشان جەرگە دەگەن قاسيەتتى كوڭىل وسىنداي بولاتىن بولسا، ءبىزدىڭ حالىق قاسىق قانى قالعانشا وسى جەردى قوعايدى دەپ بىلەمىن" دەپ الاڭعا شىعىپ، پىكىر بىلدىرگەن ازاماتتارعا ريزاشىلىعىن بىلدىرگەن ەدى. دەگەنمەن قازاقستان پرەزيدەنتى نۇرسۇلتان نازاربايەۆ جەر كودەكسىنە ەنگىزىلگەن وزگەرىستەرگە بايلانىستى داۋ تۋعىزىپ جۇرگەندەردى جازالاۋ كەرەك ەكەنىن دە ەسكەرتتى.

سوعان قاراماستان اتىراۋ قالاسىنان كەيىن، بۇگىن اقتوبە تۇعىش پرەزيدەنت اتىنداعى ساياباقتا جينالسا، سەمەي قالاسىنىڭ تۇرعىندارى دا تۇستەن كەيىن "جەڭىس" ساياباعىندا ميتينگ وتكىزگەن. جينالعاندار "جەلدى جالعا بەرگىزبەيمىز" دەپ ۇرانداتىپ، فوتو-ۆيدەولارىن الەۋمەتتىك جەلىلەر ارقىلى تاراتتى. 

سونداي-اق، جاڭاوزەندىكتەر 30 ساۋىردە تاۋەلسىزدىك الاڭىندا بەيبىت شەرۋ وتكىزۋگە 60 ادام قول قويىپ، بەيبىت شەرۋ وتكىزۋگە رۇقسات سۇراعان. الايدا قالا اكىمدىگى رۇقسات بەرمەدى.