الماتىدا جۇمباق جاعدايدا جوعالعان اسفەندياروۆ اتىنداعى ءقازۇمۋ-دىڭ ستۋدەنتى كامەراعا ءتۇسىپ قالعان، - دەپ حابارلايدى كتك تەلەارناسى. 

ۋنيۆەرسيتەتتىڭ بەسىنشى كۋرسىندا وقيتىن سانجاربەك ءساۋىردىڭ 29-نان 30-نا قاراعان ءتۇنى دوستارىمەن تۋعان كۇنىن تويلاپتى. تۇنگى ساعات 2 جارىم شاماسىندا قۇرمانعازى كوشەسى مەن ەسەنتاي وزەنىنىڭ قيىلىسقان تۇسىندا كولىكتى توقتاتىپ، سىرتقا شىعىپ، سول كۇيى ۇشتى-كۇيلى جوعالعان بولاتىن.. تەك ونىڭ تەمىر قورشاۋدان وزەن اڭعارىنا قاراي قۇلاپ تۇسكەنى جاقىن ماڭداعى بەينەباقىلاۋ كامەراسىنا ءتۇسىپ قالىپتى. ءبىراق وزەن ارناسىن ءسۇزىپ شىققان سۇڭگۋىرلەر وندا ادام دەنەسىن تابا المادى. ءسويتىپ، اياقاستى جوعالعان ستۋدەنت نە سۋدان، نە جەردەن تابىلماي جاتىر. پوليسيادان بولەك، تۋعان-تۋىسى مەن بىرگە وقيتىن كۋرستاستارى بۇگىن ءۇشىنشى كۇن قاتارىنان سانجاربەكتى ىزدەپ بۇكىل قالانى شارلاپ ءجۇر.

ارزييەۆتىڭ بىرگە وقيتىن دوسى ەركەبۇلان نۇربولاتوۆتىڭ ايتۋىنشا، ول ونى جوعارى جاققا كەتىپ قالعان دەپ ويلاعان. "دەرەۋ ۆەسنوۆكامەن اباي كوشەسىنە قاراي كوتەرىلىپ، كەلەسى بەتىمەن تۇستىك تومەن قاراي. سول جۇرگىزۋشى بالا ەكەۋمىز مىناۋ تومەن قاراي بارىپ، كورىپ كەلدىك. ول جاقتا بولعان جوق. سوسىن ويلادىق، تاكسي ۇستاپ ۇيىنە كەتىپ قالعان شىعار دەپ ءبىز ماشيناعا وتىردىق تا كەتىپ قالدىق"، - دەدى ول.