تارازدا 22 جاستاعى ازامات كاسىپكەر ايەلدى توناپ قاشقانداردىڭ سوڭىنان قۋىپ جەتە بەرگەندە، وعان باۋكەسپەلەردىڭ ءبىرى تاپانشامەن اتىپ سۇلاتىپ تۇسىرگەن. وق جاندوس توقتاسىننىڭ اياعىنا ءتيىپتى، - دەپ حابارلايدى كتك ارناسى.   

"ۇيىمنەن شىقتىم، ءۇيىمنىڭ الدىندا ەكى جاس بالا وتىر ەكەن. جاقىنداپ نەگە وتىرسىڭدار دەپ سۇراپ ەدىم، مويىنىمنان قىلقىندىرىپ، تاپانشا تاقادى. سول مەزەتتە قولىمداعى سومكەمدى جۇلىپ الىپ قاشىپ كەتتى"، - دەيدى زارداپ شەگۋشى ايەل.

ەكى جىگىت كاسىپكەر ايەل ۇيىنەن شىعا بەرگەندە سومكەسىندەگى 2 جارىم ملن تەڭگەسىن الىپ، تايىپ تۇرعان. جانۇشىرا ايقايلاعان كەلىنشەكتىڭ داۋىسىن سول ماڭنان ءوتىپ بارا جاتقان جاندوس ەستىپ، قاراقشىلاردىڭ سوڭىنان قۋا جونەلەدى. ۇرىلارعا جەتە بەرگەندە، وعان بىرەۋى وق اتىپ سۇلاتىپ تۇسىرگەن.

وسى مەزەتتە ءتارتىپ ساقشىلارى دا شۇعىل جەتىپ، 56 جاستاعى ايەلدى توناعانداردى وقيعا بولعان جەردەن ۇزاتپاي ۇستاعان. ءقازىر تەرگەۋ امالدارى جۇرگىزىلۋدە. ال ەرلىك جاساعان ازاماتتىڭ ۇيىنە ىشكى ىستەر باسقارماسىنىڭ باسشىلىعى ارنايى بارىپ، العىستارىن جەتكىزدى. ەندى جاندوستى ارنايى ماراپاتقا ۇسىنباق.