كەشە ۇكىمەت قۇرامىمەن جيىن وتكىزگەن ەلباسى كوپتى الاڭداتقان جەر داۋىنا قاتىستى ماڭىزدى شەشىم شىعاردى. اقوردانىڭ باسپا ءسوز قىزمەتى  پرەزيدەنتتىڭ جەرگە قاتىستى زاڭنامالارعا بىلتىر ەنگەن وزگەرىستەردى جۇزەگە اسىرۋعا وسى جىلدىڭ اياعىنا دەيىن موراتوريي جاريالاۋ تۋرالى جارلىعىن تاراتتى. جارلىقتا مەملەكەت باسشىسى جەر رەفورماسىمەن اينالىساتىن ارنايى كوميسسيا قۇرۋدى تاپسىرىپ وتىر. ول كوميسسيانى پرەمەر-مينيستردىڭ ءبىرىنشى ورىنباسارى باقىتجان ساعىنتايەۆ باسقاراتىنىن ەلباسى كەشەگى جيىندا-اق ايتقان بولاتىن.

پرەزيدەنت ۇسىنعان كوميسسيا اتاۋى ايتىپ تۇرعانداي زاڭ نورمالارىن ءتۇسىندىرۋ جۇمىستارىمەن عانا شەكتەلمەيدى، تۇتاستاي جەر رەفورماسىنا قاتىستى ماسەلەلەردى سالماقتاپ، ەلدىڭ ۇسىنىس-پىكىرلەرىن قورىتاتىن شەشۋشى مەحانيزم بولماق. سول سەبەپتى دە جەر تاعدىرىنا الاڭداۋشىلىق بىلدىرگەن بۇقارا حالىق تا، زاڭگەرلەر مەن ساياساتكەرلەر دە، جەرمەن تىكەلەي جۇمىس ىستەيتىن اۋىلشارۋاشىلىق سالاسىنىڭ ماماندارى دا ەندىگى كەزەكتە وسى كوميسسيا جۇمىسىنا ات سالىسۋى قاجەت.

ويتكەنى، ۋاقىت از. وتە از. موراتوريي مەرزىمى جىل سوڭىنا دەيىن عانا. سول سەبەپتى دە وسى ۋاقىتقا دەيىن باسپاسوزدە، ءتۇرلى باسقوسۋلاردا ايتىلعان، جازىلعان ۇسىنىس، تىلەكتەر باقىتجان ساعىنتايەۆ باسقاراتىن كوميسسياعا جەتۋى كەرەك. كوميسسيانى قۇرۋداعى ماقسا تا جەر ماسەلەسىن حالىقتىڭ كوڭىلىنەن شىعاتىنداي ەتىپ شەشۋ. كۇنى كەشەگى پرەزيدەنت ايتقان «حالىققا ۇنامايتىن زاڭنىڭ بىزگە قاجەتى جوق» دەگەن ءسوز وسىنىڭ دالەلى.

ساعىنتايەۆ مىرزا ساياسات ساحناسىندا ءبىر قاراعاندا سالماقتى ساياساتكەر كورىبەگەنىمەن ەلباسى كومانداسىنداعى سەنىمدى كادرلاردىڭ ءبىرى. پرەزيدەنتتىڭ ۇكىمەتتىك دەڭگەيدەگى تاپسىرمالاردى پرەمەرگە ەمەس، باقىتجان ساعىنتايەۆقا تىكەلەي جۇكتەپ جاتاتىنىنا قاراپ ايتىپ وتىرمىز مۇنى. رەسپۋبليكالىق ماسشتابتاعى، وڭىرلىك دەڭگەيدەگى بولسىن داۋلى ماسەلەلەردىڭ باسى قاسىندا باقىتجان جۇرەتىن. 2013 جىلى قۇرىلعان وڭىرلىك دامۋ مينيسترلىگىنە دە پرەزيدەنت باسقانى ەمەس ءبىرىنشى ۆيسە-پرەمەر بولىپ جۇرگەن وسى باقىتجان ساعىنتايەۆتى تاعايىنداپ، ايماقتارداعى كۇردەلى الەۋمەتتىك كيكىلجىڭدەر مەن مونو قالالاردىڭ ماسەلەلەرىن سەنىپ تاپسىردى. ءتۇستى مەتاللۋرگيا الىبى «قازاقمىس» كورپوراسياسى مەن جۇمىسشىلار، قاراعاندى وبلىسىنداعى ءبىرقاتار مونو قالا تۇرعىندارى اراسىندا تۋعان الەۋمەتتىك شيەلەنىستىڭ دە جىگىن جاتقىزۋدا وسى باقىتجان ساعىنتايەۆتىڭ ءرولى ەرەكشە بولدى. مۇنىڭ بارلىعىن ءبىز شەنەۋنىككە جارناما جاساۋ ءۇشىن ەمەس، جەر ماسەلەسىندەگى مۇددەلى توپتاردى ماسەلەنى ءتيىمدى شەشۋگە كۇش سالۋعا، كەلىسسوزدەر جولىمەن جەر رەفورماسىن جۇزەگە اسىرۋعا شاقىرۋ ءۇشىن ايتىپ وتىرمىز.

سونىمەن، الداعى مەرەكەلىك دەمالىستار وتىسىمەن-اق، ۋاقىت وتكىزبەي جەر رەفورماسى جونىندەگى كوميسسياعا ەل بولىپ، جۇرت بولىپ وزەكتى دەگەن ۇسىنىستار مەن وتىنىشتەردى جەتكىزۋ كەرەك.

جومارت ابدوللا ۇلى