جەر تاعدىرىنا الاڭداۋلى حالقىن سوڭعى ەكى كۇندە ەلباسىنىڭ ءوزى قۋانتىپ وتىر. كەشە ۇكىمەت جيىنىن وتكىزىپ، جەر داۋىنا نۇكتە قوياتىنداي ماڭىزدى مالىمدەمە جاسادى. داۋلى زاڭعا موراتوريي ەنگىزدى.
ال، بۇگىن اقوردا جاقتان بىرنەشە كادرلىق ءاۋىس-تۇيىس تۋرالى حابارلار جەتىپ جاتىر. ەكى مينيستر اۋىسىپ، جاڭادان قۇرىلعان مينيسترلىك باسشىسى تاعايىندالدى. اۋىساتىن كرەسلولار قاتارى مۇنىمەن شەكتەلمەيتىن دە سياقتى.
وسى رەتتە اۋىلشارۋاشىلىق مينيسترلىگى تىزگىنىن ەلگە ىسكرەلىگىمەن تانىلعان اسقار مىرزاحمەتوۆتىڭ ۇستاۋى تەك وسى سالاعا قاتىسى بار ازاماتتار ءۇشىن عانا ەمەس، بار حالىققا قۋانىشتى حابار بولدى. اسقار مىرزاحمەتوۆتى بۇگىندە ەلگە تانىستىرۋدىڭ، قىزمەت جولىن ءتۇسىندىرىپ جاتۋدىڭ قاجەتى شامالى. ونى پرەزيدەنت ەڭ اۋىر، ەڭ جاۋاپتى ۋچاسكەلەرگە جىبەرىپ وتىرادى.
ۇكىمەت جاقتان جەتكەن ەندى ءبىر جاعىمدى جاڭالىق – اقپارات جانە كوممۋنيكاسيا مينيسترلىگىنىڭ قۇرىلۋى. ءار جىلدارى ءتۇرلى قۇرىلىمدىق وزگەرىستەرگە ءتۇسىپ، بىرەسە مادەنيەت، بىرەسە كوممۋنيكاسيا سالاسىمەن بىرىگىپ كەلگەن اقپارات سالاسى سوڭعى جىلدارى ينۆەستيسيا جانە دامۋ مينيسترلىگىنىڭ قۇرامىنداعى اقپارات، اقپاراتتاندىرۋ جانە مۇراعات كوميتەتىنە قاراپ كەلگەن ەدى. وسىلايشا ۇزاق جىل جەتىم بالانىڭ كۇيىن كەشىپ كەلگەن اقپارات سالاسىنىڭ ءوز الدىنا وتاۋ تىگۋى، وندا دا اگەنتتىك، كوميتەت ەمەس، تۇتاستاي مينيسترلىك بولىپ قۇرىلۋى، وعان زامان تالابىنا ساي كوممۋنيكاسيا سالاسىنىڭ قوسا بەرىلۋى قۇپتارلىق ءىس بولدى. جاڭادان قۇرىلعان مينيسترلىك باسشىلىعىنا دا ادەتتەگىدەي اكىم-قارالاردىڭ، نە بولماسا ءار سالانىڭ باسىن ءبىر ۇستاپ جۇرگەن تەحنوكراتتاردىڭ ءبىرى ەمەس اقپارات سالاسىنا تىكەلەي قاتىسى بار، ۇزاق جىل ءتۇرلى ۆەدومستۆولاردىڭ باسپا ءسوز قىزمەتىن باسقارعان، سوڭعى بەس جىلعا جۋىق ۋاقىتتا پرەزيدەنتتىڭ باسپا ءسوز حاتشىسى قىزمەتىن اتقارعان داۋرەن ابايەۆتىڭ تاعايىندالۋى ءوز الدىنا ءبىر قۋانىش. الداعى ۋاقىتتا ابايەۆ مىرزا اقپارات سالاسىن تەك قانا العا سۇيرەپ، بۇقارا مەن بيلىك اراسىنداعى سەنىمدى كوپىر بولادى دەگەن ۇمىتتەمىز.
