بۇگىن ءبىلىم جانە عىلىم مينيسترلىگى ءبىلىم جانە عىلىم سالاسىنداعى باقىلاۋ جونىندەگى كوميتەتىنىڭ ءتوراعاسى سايات ءنۇسىپوۆ وسىلاي دەپ مالىمدەدى. بۇل تۋرالى Qamshy.kz حابارلايدى.

ونىڭ ايتۋىنشا، بيىل ورتا مەكتەپتى بارلىعى 121091 تۇلەك بىتىرسە، ونىڭ 83330-ى قازاق تىلىندە وقىعان بالالار. بۇل تۇلەكتەردىڭ 86991ء-ى ۇلتتىق ءبىرىڭعاي تەستىلەۋگە قاتىسادى. ولاردىڭ ىشىندە سىناقتى قازاق تىلىندە تاپسىراتىن تالاپكەرلەر سانى 63021 ادامدى قۇرايتىن كورىنەدى.

كوميتەت ءتوراعاسى ۇبت 2-15 ماۋسىم ارالىعىندا ارنايى جابدىقتالعان 166 پۋنكتە وتەتىنىن حابارلادى.

سىناقتىڭ ءادىل دە توسىن جايتتارسىز ءوتۋى ءۇشىن باقىلاۋ كۇشەيتىلىپ، تەستىلەۋ ورتالىقتارىنا 2250 بەينەباقىلاۋ كامەراسى ورناتىلماق ەكەن. بۇدان بولەك ۇيالى بايلانىس قۇرالدارىنىڭ سيگنالدارىن باساتىن 1399 ارنايى قۇرال، 438 مەتالل ىزدەگىش تە ءازىر تۇرعان كورىنەدى.

مينيسترلىك وكىلى بيىلعى تۇلەكتەر ءۇشىن 31700 مەملەكەتتىك ءبىلىم گرانتىنىڭ بولىنگەنىن دە ايتتى.

وسى ورايدا س. ءنۇسىپوۆ بيىل مەكتەپ تۇلەكتەرىنە ارنالعان ۇبت بۇرىنعى فورماتتا سوڭعى رەت تاپسىرىلاتىنىن، كەلەر جىلدان باستاپ مەكتەپ ءبىتىرۋ سىناقتارى مەن وقۋعا ءتۇسۋ ەمتيحاندارى ەكى بولەك وتەتىنىن جەتكىزدى.