رەسەيلىك تەلەارنالاردىڭ قازاقستاندا كورسەتىلۋى شىنىمەن شەكتەلەتىن سياقتى، - دەپ حابارلايدى Qamshy.kz.
ەستەرىڭىزگە سالساق، بىلتىر جارناما ءتارتىبىن رەتتەيتىن زاڭنامالارعا وزگەرىستەر ەنىپ، وندا شەتەلدىك تەلەارنالارداعى جارنامالاردى قازاقستان اۋماعىندا حابار تاراتۋ كەزىندە شەكتەۋ تالابى ەنگىزىلگەن بولاتىن. بۇعان ا دەگەندە ەلدەگى كابەلدىك حابار تاراتۋشى كومپانيالار نارازىلىق تانىتىپ، دابىل قاقتى. وسىعان بايلانىستى بىلتىر جەلتوساق ايىندا سول كەزدەگى ينۆەستيسيا جانە دامۋ مينيسترلىگىنە قاراستى اقپارات، اقپاراتتاندىرۋ جانە مۇراعات كوميتەتى اتالعان تالاپتىڭ ورىندالۋىن 2016 جىلدىڭ 1 شىلدەسىنە دەيىن شەگەرە تۇرۋ كەرەك دەگەن شەشىم شىعارعان. وعان دەيىن كابەلدىك وپەراتورلار مەن مەملەكەتتىك مەكەمەلەر ءبىر مامىلەگە كەلۋى ءتيىس بولاتىن.
جارتى جىلدان استام ۋاقىت وتسە دە تاراپتار ءبىر توقتامعا كەلە الماعان سىڭايلى. مۇنىڭ باستى سەبەبى شەتەلدىك ارنالارداعى جارنامانى ەكرانعا شىعارماي قيىپ الاتىن ءبىرىڭعاي قوندىرعى قولدانۋدىڭ مۇمكىن ەمەستىگىندە كورىنەدى. ال، ونداي قۇرالسىز، شەتەلدىك ارنا باسشىلارى بىزگە تاراتاتىن حابارلارىنداعى جارنامالاردى قيىپ الۋدان باس تارتىپ وتىرسا كەرەك.
مۇنى الماتىدا وتكەن «Asian Cable TV Conference-2016» كونفەرەنسياسىنا قاتىسۋشىلار دا راستادى.
«قازتەلەراديو» اق كوممەرسيالىق ديرەكتورى باقتيار وشۋربايەۆ مۇنداي ماسەلە ۇكىمەتارالىق دەڭگەيدە شەشىلۋى كەرەك دەسە، «قازاقتەلەكوم» اق مەنەدجەرى ولگا درەلينا «رەسەيلىك ارنالاردىڭ بۇلاي شىرەنۋى نەگىزسىز ەمەس، ويتكەنى، بىزدە ولاردىڭ ورنىن باساتىن باسقا كونتەنت جوق» دەگەندى ايتادى.
وسىلايشا، تاراپتاردىڭ بۇل ماسەلەدە ءبىر شەشىمگە كەلە الماۋىنا بايلانىستى، شىلدەدەن باستاپ تەلەارنالارىمىز رەسەيلىك كونتەنتتەن ءبىرشاما تازارىپ قالاتىن سياقتى. قالاي بولعاندا دا، بىلتىر قابىلدانعان زاڭ بيىل ورىندالۋى ءتيىس. ونىڭ ۇستىنە، زاڭناماداعى بۇل وزگەرىستەردى وتاندىق تەلەارنا باسشىلارى ءبىراۋىزدان قولداپ شىققان بولاتىن. تەك ءبىر قىزىق جەرى الداعى وليمپيادا مەن فۋتبولدان ەۋروپا چەمپيوناتىن تۇنىمەن تاماشالايتىن جانكۇيەرلەر قاۋىمىنا قيىن بولعالى تۇر.
دارحان مۇقانتەگى
