جەر رەفورماسى بويىنشا كوميسسيانىڭ العاشقى وتىرىسىندا «اتامەكەن» ۇلتتىق كاسىپكەرلەر پالاتاسى باسقارما ءتوراعاسىنىڭ ورىنباسارى، كوميسسيا مۇشەسى نۇرجان التايەۆ جەردى مەنشىگىنە الىپ، جۇمىس ىستەيمىن دەگەن قازاقستان ازاماتتارىنا ەشقانداي موراتوريي كەدەرگى بولماۋى كەرەكتىگىن ايتتى، دەپ حابارلايدى Qamshy.kz قازاقپاراتقا سىلتەمە جاساپ.

«جەر ماسەلەسى حالقىمىز ءۇشىن بارىنشا وزەكتى ەكەندىگى ءسوزسىز. ويتكەنى بۇل ءبىزدىڭ تۋىپ-وسكەن اتا-قونىسىمىز. ءبىراق، سونىمەن بىرگە سول جەردى ءبىز ەڭ الدىمەن حالىقتىڭ يگىلىگىنە پايدالانۋىمىز كەرەك. بولاشاقتا تەك قانا مۇناي-گاز ەمەس، مۇنان بولەك ەلدىڭ ءال-اۋقاتىن كوتەرەتىن، ەكونوميكامىزدى اياققا نىق تۇرعىزاتىن ەڭ ءبىرىنشى كەزەكتە اۋىل شارۋاشىلىعى بولماق»، - دەدى ن.التايەۆ.

وسى رەتتە ول بۇگىنگى كۇنى پالاتاعا رەسەيدىڭ التى وبلىسىنان ۇلكەن سۇرانىس تۇسكەنىن، ولار اي سايىن ەت، ءسۇت ونىمدەرىن، كوكونىستەردى ۇلكەن سوماعا الۋعا دايىن ەكەندىكتەرىن بىلدىرگەنىن ايتتى. ماسەلەن، وتكەن جىلى رەسەي مەن جۇڭگو 4 ملرد. دوللارعا سيىر ەتىن تاسىدى. ال، قازاقستان بولسا سىرتقى نارىقتاردان 3 ملرد. دوللارعا اۋىل شارۋاشىلىعى ونىمدەرىن ساتىپ العان. ونىڭ تەك 900 ملن. دوللارى عانا ەكزوتيكالىق جەمىس جيدەككە كەتسە، قالعان سوما ءوز جەرىمىزدە دە وسىرۋگە بولاتىن اۋىل شارۋاشىلىعى ونىمدەرىن ساتىپ الۋعا جۇمسالعان.

«وسىنىڭ اياسىندا مەملەكەتىمىزدىڭ مىقتى ەكونوميكاسىن قۇرۋ ءۇشىن جەردى يگەرىپ الامىن دەيتىن قازاقستان ازاماتتارىنا مەنشىككە بەرۋىمىز قاجەت. جەردى جۇمىس ىستەيمىن دەيتىن ازاماتتار دا ونى ءوز مەنشىگىنە الۋى ءتيىس. وعان ەشقانداي موراتوريي كەدەرگى بولماۋى كەرەك»، - دەيدى ول.