تانىمال توپ «مۋزارت Live» جوباسىن قولعا العانى بەلگىلى. بۇل جولى "مۋزارت" ونەر ۇجىمى شىمكەنتكە جەرگىلىكتى تالانتتاردى ىزدەپ كەلدى، - دەپ حابارلايدى Qamshy.kz قازاقپاراتقا سىلتەمە جاساپ

تولىعىراق ايتساق، قازاق ەستراداسىنىڭ بەلدى وكىلدەرى «مۋزارت» توبى وزدەرىنە شاكىرت ىزدەيدى، جاس تالانتتاردىڭ تاسادا قالماي، تانىلۋىنا ەندى وزدەرى سەبەپكەر بولماق. مۇنى بىزگە بەرگەن سۇحباتىندا توپ ءانشىسى كەنجەبەك ءجانابىلوۆ ايتتى، دەپ حابارلايدى otyrar.kz. ونەر يەسىنىڭ ايتۋىنشا، «ءداستۇردىڭ جارقىن جالعاسى» اتتى باستاما 2 كۇن بويى وڭىردەگى ش.قالداياقوۆ اتىنداعى وبلىستىق فيلارمونيانىڭ ەكىنشى قاباتىندا وتەتىن بولادى.

  «جەرلەستەرىمنەن ۇلكەن ءۇمىت كۇتىپ كەلدىم. ءبىراق، ازىرگە مەن كۇتكەن، ويىمداعىداي ورىنداۋشىنى تابا المادىم. كەرىسىنشە، استانالىقتار شىمكەنتتىكتەرگە قاراعاندا الدەقايدا باسىم تۇسەدى دەر ەدىم. دايىندىقتارى دا جاقسى ەدى. ءبىراق، الدا ءالى ءبىر كۇن ۋاقىت بار. سوندىقتان، مەن ءالى دە بولسا ءۇمىتىمدى ۇزبەيمىن. شىن تالانتتى، دالا داۋىسىن كۇتەمىن! ال قاتىسۋشىلاردىڭ مۋزىكالىق بىلىمىنە ەمەس، ونىڭ دارىنىنا، قابىلەتىنە نازار اۋدارىپ جاتىرمىز. سونداي-اق، جاس ەرەكشەلىگى دە 14-25 جاس ارالىعىندا بولۋى مىندەتتى. ال جەڭىمپازدى «قازاقستان» ۇلتتىق ارناسىنىڭ ازىرلەگەن ماراپاتى كۇتىپ تۇر. جانە ءبىز دە ءوزىمىز ىزدەپ تاپقان انشىلەردەن «مۋزارت» سەكىلدى توپ جاساقتاپ، ولاردىڭ قازاق ەستراداسىندا قاناتتانۋى ءۇشىن قولدان كەلگەن كومەكتى ايامايمىز»،- دەيدى قازىلار القاسىنىڭ مۇشەسى كەنجەبەك ءجانابىلوۆ.

تاڭسارىدە باستالعان ىرىكتەۋ قاس قارايعانعا دەيىن جالعاستى. ۇزىن-سونار كەزەك تولاستار ەمەس. ۇمىتكەرلەردىڭ ءبىرى ولەڭ سوزدەرىن جاتتاسا، ەكىنشىسى دالىزدە دايىندىعىن پىسىقتاپ، ءان سالدى.