اقپارات جانە كوممۋنيكاسيا ءمينيسترى داۋرەن ابايەۆتان جەر رەفورماسىنا نارازىلىق بىلدىرگەن قازاقستاندىق بەلسەندىلەردى بەلگىسىزدەر قارجىلاندىرىپ جاتىر دەلىنگەن دەرەكتەردى انىقتاۋ سۇرالدى، - دەپ حابارلايدى Qamshy.kz Tengrinews.kz – كە سىلتەمە جاساپ. 

"مەن ءوز پىكىرىمدى ايتقىم كەلەدى. مۇندا بىزدە جاڭا مينيستر بار، داۋرەن ابايەۆ مىرزا، سوڭعى كۇندەرى كوشەگە شىعىپ جاتقان ادامدار باتىس اگەنتتەرى دەپ تانىستىرىلىپ جاتىر، ولاردى باتىستىڭ اگەنتتەرى دەيدى، ولار 100-150 دوللار الادى دەلىندى، مۇنى كەيبىر تەلەارنالار ايتىپ جاتىر. مەنىڭشە، ەگەر سولاي تاراتىپ جاتقان جۋرناليستەردىڭ دالەلى بولسا، ونى بىزگە كورسەتسىن. ال ەگەر مۇنداي دالەلدەرى بولماسا، قانداي دا ءبىر شارالاردى جۇرگىزۋ قاجەت. مەنىڭشە، ءسىز مينيستر رەتىندە شارا قابىلداۋىڭىز كەرەك، ءبىزدىڭ سىزگە وسىنداي ءوتىنىشىمىز بار"، - دەدى جەر رەفورماسى جونىندەگى كوميسسيانىڭ ءبىرىنشى وتىرىسى كەزىندە بولاتحان تايجان قورىنىڭ پرەزيدەنتى مۇحتار تايجان.

سوعان قاراعاندا، مۇحتار تايجان "ەۋرازيا" ءبىرىنشى ارناسىنىڭ شىعارىلىمدارى جايلى ايتىپ وتىرعان بولۋى مۇمكىن. ءساۋىر ايىنىڭ سوڭىندا بۇل تەلەارنادا "قازاقستاندا ايداپ سالۋلار ءۇشىن جاقسى تولەندى" دەگەن اتاۋمەن ۆيدەو جاريا بولعان ەدى، تىلشىلەرىنىڭ ايتۋىنشا، رۇقسات ەتىلمەگەن قازاقستاندىق بەلسەندىلەردىڭ ءارقايسىسىنا 50-150 دوللار ارالىعىندا اقشا تولەنگەن.

سول كەزدىڭ وزىندە بۇل مالىمەت الەۋمەتتىك جەلىلەردە داۋ تۋعىزعان ەدى. قولدانۋشىلار بۇل دەرەكتەردىڭ كۇدىك تۋعىزاتىنىن ايتقان بولاتىن. 

ال 14 مامىردا "ەۋرازيا" تەلەارناسى "بەلسەندىلەردى قارجىلاندىرۋ" تاقىرىبىندا ۆيدەو جاريا ەتتى. روليك "زاڭسىز جيىنداردىڭ قارجىلاندىرعانىنىڭ دالەلدەرى"دەگەن اتاۋمەن شىققان بولاتىن.