قازاقستان رەسپۋبليكاسىنىڭ پرەزيدەنتى  ن.ءا.نازاربايەۆقا جانە بەيبىت شەرۋگە شاقىرۋشى قوزعالىستار مەن ازاماتتارعا

قۇرمەتتى نۇرسۇلتان ءابىش ۇلى!

جەر كودەكسىنە ەنگەن وزگەرىستەر بويىنشا باستالعان نارازىلىقتار قازىرگى كۇنى ەڭ ءقاۋىپتى مەجەگە جەتتى. 

قۇرىلعان كوميسسيا شەشىمىن كۇتپەستەن شەرۋگە شاقىرۋشىلار جانە ونى قولداۋشىلار سانى كۇرت ارتىپ وتىر، ەگەر جاعداي وسىلاي ۋشىعا بەرەتىن بولسا، حالقىمىزدىڭ ەكىگە ءبولىنۋى جانە ەل تۇتاستىعىنا نۇقسان كەلۋى مۇمكىن.
مەملەكەتىمىزدىڭ بولاشاعى ساراپقا سالىنىپ جاتقان قىسىلتاياڭ كەزەڭدە، سىزدەن، ءوزىڭىزدىڭ كونستيتۋسيالىق جانە لاۋازىمدىق پراۆولارىڭىزدى پايدالانىپ، تومەندەگىدەي شۇعىل شەشىمدەر قابىلداۋىڭىزدى سۇرايمىن:
1. جەر كودەكسىنە ەنگىزىلگەن بارلىق وزگەرىستەردىڭ كۇشىن كوميسسيا شەشىمىن كۇتپەستەن شۇعىل تۇردە جويۋ. 

2. بيلىك پەن حالىقتىڭ اراسىندا قالىپتاسقان سەنىمسىزدىكتى قالپىنا كەلتىرۋ ماقساتىندا «سايلاۋ تۋرالى» زاڭعا وزگەرىستەر ەنگىزۋ تۋرالى شۇعىل تاپسىرما بەرۋ جانە ول وزگەرىستەردە تومەندەگىدەي اسا ماڭىزدى 
ماسەلەلەردى قامتۋ:

-اۋداندىق ماسليحاتتان پارلامەنتكە دەيىنگى دەپۋتاتتار قۇرامىنىڭ 50% پارتيالىق تىزىممەن، 50% جەكە تۇلعالاردىڭ ءوزىن-وزى ۇسىنۋى بويىنشا سايلانۋى؛
-بارلىق سايلاۋ كوميسسيالارىنىڭ قۇرامىنىڭ كەمى 30% وپپوزيسيالىق پارتيالار مەن قوزعالىستاردان قۇرالۋى؛

-وسى سايلاۋ تۋرالى زاڭدى وزگەرتۋدى 5-6-اي ىشىندە اياقتاپ، قابىلداۋدى جۇزەگە اسىرۋ؛
ء-بىر جىل اياسىندا جاڭا سايلاۋ تۋرالى زاڭ نەگىزىندە جاڭا دەپۋتاتتار سايلاۋىن وتكىزۋ؛
-جاڭادان سايلانعان ماسليحاتتار دەپۋتاتتارىنىڭ سەناتقا سەناتورلار سايلاۋىن وتكىزۋ؛

3. وسى ۋاقىتقا دەيىن وتكىزىلگەن شەرۋلەرگە  قاتىسۋشىلاردى، ەگەر ولار ەشقانداي اۋىر قىلمىس جاساماسا، جازالاۋدى جانە قۋدالاۋدى توقتاتۋ تۋرالى قۇقىق قورعاۋ ورگاندارىنا تاپسىرما بەرۋ. شەرۋلەر وتكىزۋگە شاقىرۋشى قوزعالىستار مەن ازاماتتاردى جوعارىدا جازىلعان شەشىمدەر قابىلدانعان 
جاعدايدا، بەيبىت شەرۋ وتكىزۋدەن جانە باسقا ساياسي تالاپتار قويۋدان باس تارتۋعا شاقىرامىن. ەل بولاشاعى ءۇشىن قاجەتتى وزگەرىستەردى جاڭا قابىلدانعان سايلاۋ تۋرالى زاڭ اياسىندا جۇزەگە اسىرۋعا كۇش جۇمساپ،
وزگەرىستەردىڭ بەيبىت جولمەن جۇزەگە اسۋى-قازاقستان مەملەكەتىنىڭ جانە حالقىمىزدىڭ تۇتاستىعى، بيلىك پەن حالىق اراسىنداعى سەنىمنىڭ قالپىنا كەلۋى ءۇشىن اسا ماڭىزدى ەكەنىن ەكى جاقتىڭ ەسىنە تاعى دا سالعىم كەلەدى.

مەنىڭ وسى ۇسىنىستارىما قولداۋ بىلدىرەتىن ازاماتتاردىڭ باسقا پىكىرلەرى مەن تالاپتارىن جازباي، تەك «قولدايمىن» دەگەن سوزبەن، ءوزى تۇراتىن جەرى نەمەسە تەلەفون نومەرلەرىن جازۋىن سۇرايمىن. باسقا پىكىر جانە تالاپتاردى تاپ وسى كەزەڭدە بيلىك الدىنا قويۋ-ماسەلەنى شەشۋدى قيىنداتادى
دەپ ەسەپتەيمىن جانە ونداي پىكىرلەردى ءوز پاراقشالارىڭدا جازۋدى وتىنەمىن.
ەلدەگى تىركەلگەن الەۋمەتتىك جەلىلەر باسشىلارى وسى ۇسىنىستارىمدى ەلگە تانىستىرۋ ماقساتىندا تاراتۋعا كومەك كورسەتەدى دەپ سەنەمىن.

ەستاي جۇماعازى ۇلى جايلىباي

قازاقستان رەسپۋبليكاسىنىڭ ازاماتى، اقتوبە قالاسىنىڭ تۇرعىنى.