جامبىل وبلىسىندا اۋىل تۇرعىندارى جەرگىلىكتى كاسىپكەردى «ءارۋاقتى قورلادى» دەپ ايىپتاۋدا. ايتۋلارىنشا، بيزنەسمەننىڭ قولدان جاساعان كولىنەن اسقان سۋ تۇرار رىسقۇلوۆ اۋدانى كامەنكا اۋىلىنىڭ شەتىندەگى زيراتتاردى قيراتقان. ءقازىردىڭ وزىندە ونداعان ءقابىر جەرمەن-جەكسەن بولىپتى، - دەپ حابارلايدى Qamshy.kz كتك ارناسىنا سىلتەمە جاساپ.

ء-دال وسى جەردەن كاسىپكەر دەمالىس ورىنان اشۋدى جوسپارلاعان. ءسويتىپ ەكى ايدان بەرى تەرەڭ سايعا سۋ تولتىرىپ، مۇندا بالىق تا جىبەرىپ قويىپتى. الايدا ءبىر جەتىدەن بەرى تولاسسىز جاۋعان جاۋىننان كولشىكتىڭ دەڭگەيى بىرنەشە مەترگە دەيىن كوتەرىلىپ، جوتاداعى زيراتقا ءقاۋىپ توندىرگەن. جۇرتتىڭ ايتۋىنشا، ءتىپتى قابىرلەرگە سۋ قۇيىلىپ وپىرىلىپ جاتىر ەكەن.

ەڭ العاش دابىل قاققانداردىڭ ءبىرى – مارات تانەكەيەۆ. ونىڭ شىر-پىر بولۋى بەكەر ەمەس. ويتكەنى جاقىندارى جەرلەنگەن قابىرلەر شەتىنەن قيراعان. ءبىر اي بۇرىن اكەسىنىڭ ءمايىتى جاتقان كوردىڭ توبەسى ويىلىپ استىنا تۇسسە، ارتىنشا وزگە تۋىستارىنىڭ دا بەيىتتەرى جەرمەن -جەكسەن بولىپتى. 

جۇرت قورىمداردىڭ كولدەگى سۋدان جاپپاي قيراپ جاتقانىنا سەنىمدى. تالاي تاسقىن مەن جەر دۇمپۋىنە توتەپ بەرگەن بەيىتتەر سايعا سۋ جينالعاننان بەرى بۇلىنە باستاعان. سوراقىسى زيراتتىڭ ەتەگىنە كەلگەن سۋدى بوگەمەك بولعان كاسىپكەر، تومەندەگى ەسكى بەيىتتەردى دە كومىپ تاستاپتى.   

بەستاي قالىمبەتوۆ، كامەنكا اۋىلىنىڭ تۇرعىنى:

-مىنالار توگىلمەي تۇرعاندا، وسى جەردە ەسكى بەيىتتەر بولعان. انا جەردەگى بىرەۋىنە جاڭا اياعىمىز ءتۇسىپ كەتتى، بۇل جەردە بولعان ەسكى بەيىتتەر. مىنە جاتىر عوي بىلقىلداپ. كومىلىپ كەتتى.

اۋىلدىقتار زيرات ماڭىنان دەمالىس ورنىنىڭ اشىلۋىنا نارازى. مۇنداي جەردە ىشىمدىك قۇيىلىپ، جىن-ويناق بولاتىنى ايتپاسا دا تۇسىنىكتى.

مەيىلحان اۋەسبايەۆ، كامەنكا اۋلىنىڭ تۇرعىنى:

-سونى كورىپ وتىرىپ حالىق شىدايدى ما، شىرىلداپ جۇگىرىپ ءجۇر. بىرەۋىنىڭ اكەسى، بىرەۋىنىڭ اناسى، بىرەۋىنىڭ اتاسى بابالارى جاتىر. ءارۋاقتى سىيلاۋ كەرەك قوي. 

ال كاسىپكەر ءوزىن كىناسىزبىن دەيدى. ايتۋىنشا، كولدىڭ دەڭگەيى قانشا كوتەرىلگەنىمەن سۋ قابىرلەرگە جەتپەگەن. قورىمداردىڭ بۇلىنۋىنە نوسەر جاۋىن سەبەپ ەكەن. دەگەنمەن زيراتتىڭ توڭىرەگىن بوگەپ بەرۋگە ۋادە ەتتى.

-كوستي مويح روديتەلەي وبمىليس يلي نەت؟

-دا نە وبمىليس!

-كوپاي توگدا، بۋدەم ۆمەستە كوپات!

-نە بۋدۋ يا كوپات.

-ەسلي زدەس ۆودى نە بۋدەت، مى ۆسە زدەس ۋ تەبيا يزۆينەنيا پوپروسيم!

-يۋرا! نە نادو منە يزۆينەنيي. يا، كاك مۋجيك، سكازال سدەلايۋ، سدەلايۋ!

بۇقارا ماسەلەنى بەيىتتەردىڭ ماڭىنا تاس توسەپ قانا شەشۋگە قاناعاتتانباي وتىر. سوندىقتان كولدەگى سۋدى اعىزىپ جىبەرۋدى تالاپ ەتۋدە.