استانادا ءوتىپ جاتقان جەر ماسەلەسى جونىندەگى كوميسسيانىڭ ەكىنشى وتىرىسىندا ەۋروپا عىلىم اكادەمياسىنىڭ اكادەميگى، حالىقارالىق ادام ينستيتۋتىنىڭ پرەزيدەنتى جانۇزاق اكىم وركەنيەتتى ەلدەردىڭ كوشىنەن قالىس قالماس ءۇشىن بەيبىت ميتينگكە تىيىم سالۋدى توقتاتۋ كەرەك دەدى، - دەپ حابارلايدى Qamshy.kz. 

قازىرگى جاعدايدى تىنىشتاندىرۋ ءۇشىن باسشىلار بولسىن، پرەزيدەنت بولسىن، حالىقتىڭ الدىندا كەشىرىم سۇراۋ كەرەكتىگىن ايتقان جانۇزاق اكىم «ءبىزدىڭ زاڭدار كەڭەس زامانىنداعى زاڭدار سياقتى. وركەنيەتتى ەلدەردىڭ كوشىنەن قالىس قالماس ءۇشىن ميتينگكە تىيىم سالاتىن زاڭداردى الىپ تاستاۋ كەرەك دەپ ويلايمىن. ەۋروپا ەلدەرىندە مۇنداي شارالار اپتا سايىن ءوتىپ جاتادى. بەيبىت شەرۋدى حالىقتىڭ پىكىرىن ەركىن ءبىلدىرۋ امالى رەتىندە قابىلداعان ءجون»، - دەدى.

بۇعان باس پروكۋروردىڭ ورىنباسارى ا. كراۆچەنكو مىرزا ەشكىمدى زاڭسىز قۋدالاۋ بولماعانىن، الدىن الا ەسكەرتۋ جۇمىستارى جۇرگەنىن، زاڭسىز شەرۋگە اشىق شاقىرعان بىرنەشە ازاماتتىڭ اكىمشىلىك جاۋاپكەرشىلىككە تارتىلعانىن ايتتى. ول وتىرىس ۇستىندە ا.كراۆچەنكو زاڭسىز ميتينگكە شاقىرعانى ءۇشىن شامامەن 40 بەلسەندى تۇتقىنعا الىنعانىن ءمالىم ەتكەن بولاتىن.

الايدا، كوميسسياداعى قۇقىقتىق توپ جەتەكشىسى م. تايجان ا. كراۆچەنكومەن كەلىسپەيتىنىن العا تارتتى.

 «مەن ولاردىڭ رۇقسات ەتىلمەگەن ميتينگكە شاقىرعانىن تۇسىنەمىن. دەگەنمەن، ولار ونى ءالى دە جاساعان جوق. ۇستاۋ ءتۇن ىشىندە جۇرگىزىلدى. ءسىز پوليسيا كۇش قولدانعان جوق دەيسىز، قولداندى، ۆيدەوسى بار. اتا-انالارىنىڭ ۇيىنە ءتىنتۋ جۇرگىزدى. وسىنى تۇسىنەسىز بە؟ ءقازىر ءبىزدىڭ بارلىعىمىز دا بارىنشا اباي بولۋعا، ۇستامدى بولۋعا ءتيىسپىز. مەملەكەتكە ۇيىمداسقان ينستيتۋت رەتىندە ەموسيونالدى ادامدارعا قاراعاندا زور جاۋاپكەرشىلىك جۇكتەلەدى»، - دەدى ول ق ر باس پروكۋرورىنىڭ ورىنباسارى اندرەي كراۆچەنكوعا قاراتا.
م.تايجان باس پروكۋراتۋرانى تۇتقىنعا الىنعاندارعا قاتىستى سوت شەشىمىن قايتا قاراۋعا جانە ولاردى مەرزىمىنەن بۇرىن بوساتۋعا ىقپال ەتۋگە شاقىردى.