جۇڭگو مەن زامبيا اراسىندا حالىقارالىق جانجال تۋىندادى. ءتىپتى جۇڭگو ۇكىمەتى زامبيادان الەمدىك قاۋىمداستىقتىڭ الدىندا كەشىرىم سۇراۋدى تالاپ ەتتى. ويتكەنى، زامبيا مەدياسى «جۇڭگو سىرت ەلدەرگە ادام ەتىنەن جاسالعان بۇقتىرىلعان ەت ساتادى» دەگەن اقپارات تاراتقان.
بەلگىسىز بىرەۋلەردىڭ الەۋمەتتىك جەلىلەر ارقىلى اسقان شەبەرلىكپەن جالعان اقپارات تاراتقان. ول عالامتوردىڭ ارعى جاعىندا وتىرىپ، قىتايلىق ەت وڭدەۋ ورنىندا ادامداردىڭ مايىتتەرىنەن بۇقتىرىلعان ەت دايىنداپ، ونى زامبيا ساتىپ الادى دەگەن. بۇل اقپارات ناقتىلانۋ ءۇشىن سۇمدىق سۋرەتتەر جۇكتەلىپ، ەت وڭدەيتىن سەح ىشىندە ادام دەنەلەرى كورسەتىلگەن.
ماقالالار سەرياسى سۋرەتتەرىمەن جاريالانعاننان كەيىن جۇڭگو زامبيالىق ءباسپاسوزدى تەكسەرىلمەگەن اقپاراتتى، قاۋەسەتتى تاراتتى دەپ ايىپتادى.
«قىتايلىقتاردا ءولىنى جەرلەيتىن جەر جوق، سوندىقتان ولار مايىتتەن بۇقتىرىلعان ەت جاساۋدى شەشتى» دەپ جازعان ماقالادا. ءتىپتى، باي-قۋاتتى ەلدەرگە «ەڭ جاقسى ەتتى» قالدىراتىندارىن تۇسپالداپ جازعان. وسى وقيعادان كەيىن، زامبياداعى جۇڭگو ەلشىسى يانگ يۋمينگ بۇل ايىپتاۋلاردى رەسمي تۇردە جوققا شىعاردى.
«جەرگىلىكتى گازەت جۇڭگو ەلى افريكاعا تىلىمدەلگەن ادام ەتتەرىن ساتپاق دەگەن قاۋەسەت تاراتقان. بۇل جالعان اقپارات جانە جالا جابۋ. ءبىز جەرگىلىكتى باسىلىمداردىڭ مۇنداي ارەكەتتەرىنە باتىل نارازىلىق ءبىلدىرىپ، ايىپتايمىز. شىندىققا جاناسپايتىن قاۋەسەت ەرتەدەن كەلە جاتقان ارىپتەستىك قارىم-قاتىناسقا زيان تيگىزۋگە باقىتتالعان»، - دەدى ەلشى.
الايدا جەلى بويىنشا تاراعان سۋرەتتەردە جۇڭگو بۇقتىرمالارى ادام رەتىندە كورسەتىلگەن. دەگەنمەن جالعان دەرەك بىردەن اشىلدى. فوتو سۋرەتتەر مۇقيات قارالىپ، زەرتتەلىپ، بۇل ويىنعا ارنالعان «Resident Evil 6» ماركەتينگتىك كومپانياسىنىڭ رەكلاماعا ارنالعان ءبىر بولىگى بولىپ شىققان.
مىنا سۋرەتتەردەگى ءمايىت سياقتى بەينەلەر لوندونداعى سميتفيلد بازارىندا اتالمىش كومپانيانىڭ جارناما ءتۇسىرىلىمى ۋاقىتىندا جاسالعان. «زۇلىم ۆەسكەر جانە ونىڭ ۇلى: ادام ەتى دۇڭگىرشەگى» دەپ اتالاتىن دۇكەننىڭ ەت ساتۋ بولىمىنە ارنايى جاسالعان بولىپ شىقتى. ءجاي كەلۋشىلەرگە ەرەكشەلىك ءۇشىن عانا جاسالعان.
اقپاراتتى تاراتۋشى زامبيالىق ازامات كەشىرىم سۇرادى. «زامبيا مەملەكەتى جۇڭگو مەن زامبيا اراسىنداعى جاقسى قارىم-قاتىناستى نازارعا الا وتىرىپ، بولعان وقيعاعا وكىنىش بىلدىرەدى. ءبىز انىق-قانىعىنا كوز جەتكىزۋ ءۇشىن، ءتيىستى ورگاندار تەرگەۋمەن اينالىساتىن بولادى» دەدى قورعانىس ءمينيسترى كريستوفەر مۋلەنگ.
