قىرعىز رەسپۋبليكاسىنىڭ سىرتقى ىستەر مينيسترلىگى ەلدەگى قازاقستان رەسپۋبليكاسى ەلشىلىگىنىڭ كەڭەسشى-ەلشىسى ەربول احمەتوۆتى شاقىرىپ، قازاقستانعا قارسىلىق نوتاسىن جولدادى، - دەپ حابارلايدى Qamshy.kz Baq.kz –كە سىلتەمە جاساپ.
«كەزدەسۋ بارىسىندا قازاقستان تاراپىنا قازاقستان رەسپۋبليكاسىنىڭ مادەنيەت جانە سپورت ءمينيسترى ارىستانبەك مۇحامەدي ۇلىنىڭ 2016 جىلدىڭ 24 مامىرىندا قازاقستان رەسپۋبليكاسىنىڭ بۇقارالىق اقپارات قۇرالدارىندا جاريالانعان مالىمدەمەلەرىنە بايلانىستى قارسىلىق نوتاسى جولداندى»، - دەپ حابارلايدى قىرعىز ءسىم-ى.
سونىمەن قاتار ا.مۇحامەدي ۇلىنىڭ قىرعىز رەسپۋبليكاسىنا قاتىستى ايتقان نامىسقا تيەتىن جانە سارالانباعان پىكىرى قىرعىزستان حالقىنىڭ نارازىلىعىن تۋدىرعانى ءارى قىرعىز-قازاق اراسىنداعى وداقتاس رۋحقا سايكەس كەلمەيتىنى ايتىلدى.
قىرعىز ءسىم باسشىسى، سونداي-اق، قازاقستان تاراپىنان قىرعىزستانعا قاتىستى بىربەتكەي پىكىرلەر جيىلەپ كەتكەنىن جانە ولار قازاقستاننىڭ مەملەكەتتىك ارنالارىندا اشىق جاريالانىپ جاتقانىن سىنعا الدى.
ەستەرىڭىزگە سالا كەتەيىك، مادەنيەت جانە سپورت ءمينيسترى ارىستانبەك مۇحامەدي ۇلى 23 مامىردا وتكىزگەن ەسەپتىك جيىنىندا ايگىلى جازۋشى شىڭعىس ايتماتوۆتى ماقتايمىن دەپ وتىرىپ،  قىرعىز حالقىنىڭ دا، ۇكىمەتىنىڭ دە شامىنا تيەتىن سوزدەر ايتتى.
«جاسىراتىنى جوق، ماسكەۋگە نەمەسە وزگە قالالارعا ۇشىپ كەلسەڭ قوعامدىق دارەتحانالاردى جاپ-جاس قىرعىزدىڭ قىزدارى جۋىپ جۇرەدى. بۇل ارينە، كوڭىلگە اۋىر تيەتىنى ءسوزسىز. ناعىز جاستىق شاعىندا نەلىكتەن ولار دارەتحانا جۋىپ ءجۇر دەپ ويلايسىڭ؟ ەلىندە جۇمىس نەمەسە بولاشاق بولماسا ارينە، قىرعىزدار وزگە قالالارعا بارىپ كۇنەلتۋگە ءماجبۇر. وسىنى ەرتەرەكتە ءبىلىپ ەسكەرتكەن شىڭعىس ايتماتوۆ — ۇلى جازۋشى»، - دەگەن بولاتىن ارىستانبەك مۇحامەدي ۇلى سول ەسەپتىك جيىندا.