ءال-فارابي اتىنداعى قازاق ۇلتتىق ۋنيۆەرسيتەتىندە جۋىردا VIII «كەلەشەكپەن بايلانىس» مەديا كونگرەسى ءوتتى، - دەپ حابارلايدى Qamshy.kz.
كونگرەس جۇمىسىنا تۇركيا، قىرعىزستان، تۇركىمەنستان، ءازىربايجان، تاجىكستان، گرۋزيا، ماكەدونيا، كوسوۆو، رۋمىنيا، بولگاريا، قىرىم (ۋكراينا)، تاتارستان، قاراقالپاق (وزبەكستان)، كەركۇك (يراك)، شىعىس تۇركىستان (جۇڭگو)، اۋعانستان، رەسەي ت.ب. ەلدەردەن 80-گە جۋىق تۇركىتىلدەس جاس جۋرناليستەر قاتىستى. اتالمىش شارا اياسىندا «بوسقىندار» تاقىرىبىمەن جۋرناليستەردىڭ فوتوسۋرەتتەر كورمەسىنىڭ اشىلۋ سالتاناتى ءوتتى.
جىل سايىن الەمنىڭ تۇكپىر-تۇپكىرىندە ءوتىپ كەلگەن اۋقىمدى شارا بيىل قازاقستان، قىرعىزستان مەملەكەتتەرىندە جالعاسىن تاپتى. كونگرەستىڭ باستى ماقساتى – تۇركى ەلدەرىندەگى جۋرناليستەردىڭ ىنتىماقتاستىعىن ارتتىرىپ، كاسىبي تۇرعىدا سەرىكتەستىكتى نىعايتۋ. وسى ورايدا، ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى اكادەميك عالىم مۇتانوۆ ءتۇبى ءبىر تۇركىنىڭ رۋحاني جانە تاريحي قۇندىلىقتارىن بىرىگىپ ناسيحاتتاۋ، تۇركىتىلدەس ب ا ق اراسىندا جەدەل اقپارات الماسۋ، ت.ب. ورتاق ماقسات-مۇددەنى كوزدەيتىن جاڭا جوبالاردى الداعى ۋاقىتتا جۇزەگە اسىرۋ كەرەكتىگىن ايتا كەلىپ، «ەلىمىزدىڭ اقپارات كەڭىستىگىنىڭ كوكجيەگى كۇن سايىن ارتا تۇسۋدە. سول كەڭىستىككە تالپىنعان بۇگىنگى جيىنعا قاتىسىپ وتىرعان جاستاردىڭ قۇلشىنىسى مەن ۇمتىلىسى دا كوڭىلگە جىلىلىق ۇيالاتۋدا. بولاشاقتارىن ءسوز ونەرى الەمىمەن بايلانىستىرۋدى ماقسات تۇتقان سونداي جاستار جىل سايىن اتالمىش كونگرەستىڭ اقپاراتتىق كەڭىستىگىندە شەبەرلىكتەرىن شىڭداۋعا مۇمكىندىك الۋدا. مۇنى جاقسى ءۇردىس دەپ قابىلداۋعا بولادى. سەبەبى، مۇنداي باسقوسۋلار دارىندى جاستاردىڭ باعىن اشۋعا سەپتىگىن تيگىزەرى انىق»، – دەدى.
ال، تۇركيا مەملەكەتىنىڭ الماتىداعى باس كونسۋلى رىزا قاعان يىلماز وسىنداي ءىس-شارالاردىڭ ەكى ەل اراسىنداعى ىنتىماقتاستىقتى ودان ءارى نىعايتاتىندىعىن اتاپ ءوتتى. تەليەۆيدەنيە جانە راديو جوعارى كەڭەسىنىڭ (RTÜK) ءتوراعاسى، پروفەسسور يلحان يەرليكايا مىرزا «كەلەشەكپەن بايلانىس» مەديا كونگرەسى بارىسىندا تۇركى تىلدەس ەلدەردىڭ ءبىلىم، عىلىم، مادەنيەتىن ناسيحاتتاۋ ءۇشىن قازۇۋ-مەن بىرلەسە وتىرىپ، ورتاق مەديا پلاتفورما قۇرۋ تۋرالى مامىلەگە كەلگەنىن ايتتى. ونىڭ پىكىرىنشە، دۇنيە جۇزىندە بولىپ جاتقان ءتۇرلى وقيعالارعا شىنايى باعا بەرىپ، سول جايىندا دۇرىس قوعامدىق پىكىر قالىپتاستىراتىن ب ا ق وكىلدەرىنىڭ ءرولى مەن الار ورنى ەرەكشە. سوندىقتان تۇركى تىلدەس ەلدەردىڭ ىنتىماقتاستىعىن كۇشەيتۋ كەرەك. وتكىزىلىپ وتىرعان كونگرەسس، اسىرەسە، جاس جۋرناليستەر ءۇشىن ۇلكەن مەكتەپ ەكەنىن اتاپ ءوتتى. ۋنيۆەرسيتەت تاراپىنان جۋرناليستيكا فاكۋلتەتىنىڭ دەكانى ساعاتبەك مەدەۋبەك ۇلى كونگرەستىڭ ماڭىزدىلىعىن اتاي وتىرىپ، ءوزى باسقارىپ وتىرعان فاكۋلتەتتىڭ وتكەنى مەن بۇگىنى تۋرالى بايانداما جاسادى.
شارا سوڭىندا ءسوز العان، تۇرىك ەلىندە دوكتورانتۋرادا وقىپ جاتقان جەرلەسىمىز گۇلنار نابييەۆا ەكى ەل اراسىنداعى ءبىلىم سالاسىنداعى ءبىراز مالىمەتتەرگە توقتالا وتىرىپ، سەگىزىنشى جىل قاتارىنان ءوتىپ جاتقان كونگرەستىڭ جۇمىسى جايلى باياندادى. «كەلەشەكپەن بايلانىس» مەديا كونگرەسى يدەياسىن جارىققا شىعارۋداعى ماقسات – ءسوز قۇدىرەتىن باعالاپ، ءوز بولاشاعىن وسى الەمنىڭ بيىگىنەن كورۋگە تالپىنعان باۋىرلاس ەلگە دۇرىس جول نۇسقاپ، باعىت بەرۋ ەكەندىگىن ايتتى.
كونگرەسكە قاتىسىپ وتىرعان دەلەگاسيا مۇشەلەرى، ونىڭ ىشىندە بولاشاق جاس جۋرناليستەردىڭ جاڭانى بىلۋگە دەگەن قۇلشىنىسى انىق بايقالدى. ولاردىڭ ءوز ءىسىنىڭ شەبەرى بولۋعا دەگەن ۇمتىلىستارى جان-جاقتى قولداۋ تابۋدا. بەلگىلى ءبىر كاسىبي دەڭگەيگە كوتەرىلۋ ءۇشىن ىزدەنىس، سودان كەيىن، ارينە، تاجىريبە كەرەك دەسەك، كونگرەستىڭ وزگەشەلىگى – مۇندا ءار جاس جۋرناليست ءوزىنىڭ قابىلەتىن بايقاتىپ قانا قويمايدى، ەل ارالاپ تاجىريبە الماسۋعا، وقىتۋشىلاردىڭ اقىل-كەڭەسىن تىڭداپ، شەبەرلىگىن شىڭداۋعا مۇمكىندىك الادى. ولار ءوز يدەيالارى مەن وي-پىكىرلەرىن جاريا ەتىپ قانا قويماي، كاسىبي دەڭگەيدە جۇزەگە اسىرۋعا ماشىقتانادى. سوندىقتان مۇنداي يگىلىگى مول كەزدەسۋلەر جاستار ءۇشىن اسا قاجەت. شاراعا مۇرىندىق بولىپ وتىرعان باس ۇيىمداستىرۋشى – تۇركيا مەملەكەتىنىڭ تەليەۆيزيا جوعارى كەڭەسىنىڭ (RTÜK) دە كوزدەگەن ماقساتى وسى. كەزدەسۋدەن سوڭ تۇركيا جاستارى ءوز ەلىندە باسپا ءسوز، تەلە جانە راديودا ارنايى ماتەريالدار دايىندايتىن بولادى.
