كەشەلى بەرى اقپارات قۇرالدارى يۆان ساۋەر دەگەن بىرەۋدىڭ جەر داۋىنا بايلانىستى مىنا ءبىر ۇسىنىسىن جەردەن جەتى قويان تاپقانداي سۇيىنشىلەپ جاريالاۋدا. ول نە ۇسىنىس دەيسىز بە؟ «رودينا» اگروفيرماسىنىڭ باسشىسى، ۇكىمەت جانىنداعى جەر كوميسسياسىنىڭ مۇشەسى يۆان ساۋەر مىرزا جاقىندا «قازاقستان-2050» جالپىۇلتتىق دەموكراتيالىق كۇشتەر كواليسياسىنىڭ وتىرىسىندا شەتەلگە جەر ساتۋ تۋرالى باستامانى وتانعا وپاسىزدىق جاساۋمەن تەڭەستىرەتىن زاڭ نورمالارىن قابىلداۋدى ۇسىنىپتى.

«جەر شەتەلدىكتەرگە ساتىلمايدى دەگەن ءسوز جەتكىلىكسىز. مەن زاڭعا «جەردى شەتەلدىكتەرگە ساتۋعا نيەتتەنۋ وتانعا وپاسىزدىق جاساۋمەن تەڭەستىرىلەدى» دەگەندى ارنايى جازۋ كەرەك دەپ سانايمىن»، - دەيدى ي. ساۋەر.

ي. ساۋەردىڭ بۇل سوزدەرى ءبىر قاراعاندا ناعىز مەملەكەتشىل، شىنايى پاتريوتتىڭ جانايقايىنداي ەستىلەدى، ارينە. الايدا، ولاي ەمەستىگىنە مىنانى وقىعاننان كەيىن كوز جەتكىزەسىز.

پرەزيدەنت ن. نازاربايەۆ جەر كودەكسىنە ەنگەن سوڭعى وزگەرىستەرگە موراتوريي جاريالاعان ساتتە ەشكىم جەردى شەتەلگە ساتقالى وتىرماعانىن ايتتى. «مەملەكەتتىڭ ادامى»، دەپۋتات، ۇلت جاناشىرى بەكبولات تىلەۋحان دا جەر كوميسسياسىنىڭ العاشقى وتىرىسىندا «ەشكىم جەر ساتقالى وتىرماعانىن» تاعى ءبىر ناقتىلادى. ەندى كەپ مىنا ساۋەردىڭ ساندىراقتاۋى نە؟ جەردى مەملەكەت باسشىسىنان باستاپ، ءىرىلى-ۇساقتى شەنەۋنىكتەرگە دەيىن شەتەلدىكتەرگە ساتۋ ەمەس، 25 جىلعا جالعا بەرۋ ماسەلەسى قارالىپ جاتقانىن كۇندە ايتىپ ءجۇر. جەر زاڭناماسىنا نارازى قاراپايىم حالىق تا مۇنى جاقسى ءبىلىپ وتىر.

بۇعان دەيىن جەر كوميسسياسىنىڭ العاشقى وتىرىسىندا جەر داۋىنا بايلانىستى ميتينگكە شىققان حالىقتى جالعان پاتريوتتارعا تەڭەپ، ايىپتاي سويلەگەن كاسىپكەردىڭ كوپ ۇزاماي بۇلاي سايراۋىنا نە جورىق؟ مۇنىڭ جاۋابى بىرەۋ-اق. كوميسسيا قۇرامىنداعى كوپتەگەن كاسىپكەر، فەرمەر، «قوعام قايراتكەرلەرىنە» جەر تاعدىرىنىڭ قۇنى بەس تيىن سياقتى. پىكىر-تالاس الاڭىن پايدالانىپ، حالىققا جاناشىر كەيىپتەگى تۇلعا بولىپ كورىنۋدى عانا كوزدەيتىن سياقتى. ايتپەسە، ەلدىڭ تالابىن بۇرمالاپ، بۇلاي ءدويدالا سويلەۋدىڭ باسقا سەبەبى جوق.

ەل قازىرگى ۋاقىتتا نەگە قارسى؟ ەل جەردى ۇزاق مەرزىمگە شەتەلىكتەرگە، ونىڭ ىشىندە اينالاسىن جايپاپ كەلە جاتقان شىعىستاعى كورشىمىزگە جالعا بەرۋگە، مىڭداعان گەكتار جەر ۋچاسكەلەرىن يەلەنىپ الىپ، نە وعان ەگىن ەكپەي، نە مال باقپاي، قارا حالىققا جالعا بەرىپ، جاتىپ اقشا تاباتىن باي-باعلاندارعا ساتۋعا قارسى. ايتقىش بولسا، ساۋەر وسىنى نەگە ايتپايدى؟! ۇساق شارۋالار جەرگە قول جەتكىزە الماي، لاتيفۋنديستەردىڭ قاراماعىندا كۇن كەشۋگە ءماجبۇر. قىل اياعى شابىندىق جەرى دە جوق مالشىلاردىڭ كوبى وسىنداي مىڭداعان گەكتارلاپ جەر الىپ العان بايشىكەشتەردىڭ جەرىنەن اقشاسىن تولەپ ءشوپ شاۋىپ ءجۇر. ءبىراق، ساۋەر مىرزا بۇل تۋرالى ايتپايدى. وعان ونداي ماسەلە كوتەرۋدىڭ قاجەتى دە جوق. ءوز ەسەبى تۇگەل كاسىپكەر حالىقتىڭ جاندى جەرىنە تيەتىن ماسەلەدەن دە جەكە پايداسىن كوزدەپ وتىرعان سىڭايلى.

جومارت ابدوللا ۇلى