وڭتۇستىك قازاقستان، جامبىل وبلىسىنىڭ شارۋالارىن شەگىرتكە شىعىنعا باتىرۋدا، - دەپ حابارلايدى Qamshy.kz 31-ارناعا سىلتەمە جاساپ حابارلايدى.

جامبىل مەن وڭتۇستىك قازاقستان وبلىستارىنىڭ شارۋالارى شەگىرتكەدەن شاش ەتەكتەن شىعىنعا باتۋدا. جايىلىمدى جايپاعان زيانكەس ەندى ەگىستىككە اۋىز سالۋدا دەپ فەرمەرلەر دابىل قاعىپ وتىر. ماۋسىم شىقپاي مال ازىعىنان ايىرىلعان جۇرت، بۇل دەر كەزىندە ءدارى سەبىلمەگەندىكتەن شىققان جاندىك دەيدى.

بۇل جولىنداعىسىن جايپاپ، تىكەنگە دەيىن تىپ - تيپىل ەتكەن جامبىلداعى جاعداي. شابىندىق جەردىڭ شاڭىن شىعارعان شەگىرتكە وتىز كۇندە وسى ارانى وسىلاي وپاي-توپايىن شىعارعان.

ءقۇرمانالى امىربايەۆ، پيونەر اۋىلىنىڭ تۇرعىنى:

- مىنا قاپتاپ جاتقان شەگىرتكەنى كورىپ تۇرسىزدار. بۇعان ەندى دارىلەپ جاتىر، ءبىراق سول دارىلەگەنى ازداۋ بولىپ جاتىر. اۋىلعا بەس ون كم عانا قالدى شەگىرتكەنىڭ جەتپەگەنىنە. جەتسە ەگىستىكتى قۇرتادى بىرىنشىدەن. جوڭىشقالىق بار اۋىل ماڭىندا. ەل ءشوپسىز قالادى.

جامبىل اۋدانى كودەلى جايىلىمىندا كوبەيگەن زيانكەس جاندىك مۇنداعىلاردى شوشىندىرىپ وتىر. جولىنداعىسىن جايپاپ بارا جاتقان شەگىرتكە يەك استىندا تۇرعان ەگىستىككە جەتسە، ەڭبەگىمىز ەش كەتكەلى تۇر دەيدى. ايتۋلارىنشا ءبىر اي بۇرىن پايدا بولعان زيانكەس وسىندا كوبەيىپ، قاناتتانىپ كوشىپ بارا جاتقان كورىنەدى.

باقىتجان بايدوسوۆ، جامبىل اۋدانىنىڭ تۇرعىنى:

- ولار ەندى سەۋىپ جاتىر. ءبىراق دوزاسى از بولىپ جاتىر ما ۇشىپ جاتىر ءولىپ جاتقان جوق. ءبىر كۇن جاتادى ءقايتىپ ءتىرىلىپ كەتىپ جاتىر. اۋىلعا بەس التى كم قالدى عوي. بۇل ەندى بيدايعا بارادى، مىنا جاقتى بىتىرگەننەن كەيىن.

الايدا ماماندار ەلدىڭ بۇلاي الاڭداۋى نەگىزسىز دەيدى. ايتۋلارىنشا ماروككالىق شەگىرتكە بەس مىڭ گەكتار القاپتى جايلاعان. كوبەيۋىنىڭ باستى سەبەبىن بيىلعى اۋا-رايىمەن بايلانىستىرادى. ءقازىر ءقاۋىپتىڭ بەتى بەرى قارادى دەيدى.

جانىبەك كەڭەسبەكوۆ، رەسپۋبليكالىق فيتوسانيتارلىق دياگنوستيكا جانە بولجامدار ادىستەمەلىك ورتالىعى جامبىل وبلىستىق فيليالىنىڭ ديرەكتورى:

- «دوكلوپريد»، «كومبات» دەگەن پرەپاراتتارمەن دارىلەۋ جۇمىستارى جۇرگىزىلدى. ولاردىڭ اسەر ەتۋ كۇشى شامامەن 90-92 دەپ ايتۋعا بولادى. بۇلار ءقازىر جەردە قيمىلداپ جۇرگەنىمەن، بەلسەندىلىگىن جوعالتىپ وتىر.

ماماندار ءدارىنىڭ كۇشى ون شاقتى كۇندە اسەر ەتەدى دەيدى. ال ۋلانعان شەگىرتكە وزگە اۋدانعا كوشەدى دەۋ نەگىزسىز دەپ سەندىرەدى. ايتا كەتەيىك جامبىل وبلىسىندا «ماروككالىق»، «يتاليالىق پرۋس» جانە «ازيالىق شەگىرتكە» كەڭ تاراعان. نەگىزگى وشاعى قاراتاۋ بوكتەرى. ماماندار سەگىز مىڭ گەكتار جەرگە شەگىرتكە قاۋمالايدى دەپ جوسپارلاعاندارىن ايتادى. دەگەنمەن دەر كەزىندە دارىلەدىك دەيدى. دارمەنسىز دەگەنگە سەنبەيدى.

ال، وڭتۇستىك قازاقستانداعى جاعداي ءتىپتى مۇشكىل سىڭايلى. شاردارا اۋدانىنداعى ديحاندار شەگىرتكە ەڭبەگىمىزدى ەش ەتتى دەپ شىرىلدايدى. وندا جۇرت قونعان شەگىرتكەنى قولدارىمەن ۇشىرىپ الەك. جاعداي ۋشىقسا بيىلعى بىتىك شىققان ەگىستىككە قۋانۋ ەرتەرەك دەگەن ەل، شەگىرتكە سالدارىنان اۋىزعا تۇسكەلى تۇرعان استا توك بايلىقتان ايرىلامىز با دەپ الاڭداۋلى. ال، ازىرگە شاردارادان رەسمي جاۋاپ جوق.