ۇلان قونىسبايەۆ ەندى كەمى ءۇش اي ەمدەلەدى دالياندا وتكەن جۇڭگو – قازاقستان كەزدەسۋى جەرلەستەرىمىزدىڭ جەڭىسىنەن بولەك، ۇلان قونىسبايەۆتىڭ وتە اۋىر جاراقاتىمەن جانكۇيەرلەردىڭ ەسىندە قالاتىن بولدى. ەندى تارازدىق تارلاننىڭ ۇلكەن فۋتبولعا قاشان، قالاي ورالاتىنى بەلگىسىز. بۋتسىدى اياعىنا كيگەننىڭ وزىندە جاسىل الاڭدا بۇرىنعىداي جارقىلداي الا ما، جوق پا، ول جاعىن دا ايتا المايمىز. ال ءبىز تۋرا ۇلان سياقتى توبىق پەن جىلىنشىكتەن كەتكەن الەم اياقدوبىنداعى تاعى بەس فۋتبولشىنىڭ جاسىل الاڭداعى كەيىنگى تاعدىرلارى زەرتتەپ كورگەن ەدىك، - دەپ جازادى بەلگىلى سپورت شولۋشىسى ءازيز ءجۇمادىل sportsffa.kz سايتىندا.

ەسكەرتۋ: بەينەروليكتەردى جۇيكەسى جۇقا ادامدارعا كورۋگە بولمايدى.

ديەۆيد باست (انگليا) – 08.04.1996 ج. ءوز باسىم بۇل بەينەروليكتى ءبىر-اق رەت كوردىم. ەكىنشى رەت قاراۋعا جۇرەگىم داۋالامادى. 1996 جىل. «ولد تراففوردتاعى» «مانچەستەر يۋنايتەد» – «كوۆەنتري ءسيتيدىڭ» ەكىنشى مينۋتى وتۋدە. قوناقتار بۇرىشتاما دوبىن ورىنداۋعا مۇمكىندىك الدى. شابۋىلعا كومەكتەسۋگە قورعاۋشىسى ديەۆيد باست تا جەتىپ كەلدى. كەنەت، دوپقا تالاس كەزىندە «ميۋ»ء-دىڭ ەكى ويىنشىسى ديەۆيد يرۆين مەن برايان ماككلەر قاتار سەكىرىپ، باستتىڭ اياعىن مىجىپ تاستادى. توبىعى دا، جىلىنشىك سۇيەكتەرى دە سىنىپ، الاڭ قانعا كومىلدى. ءبارى ويىن جاعدايىندا بولعاندىقتان ەشكىم الاڭنان قۋىلماعانىمەن ماچ 12 مينۋتقا ءۇزىلدى. ويتكەنى، قاندى جۋىپ كەتىرۋ وڭاي بولماعان ەدى. ال وسىنىڭ بارلىعى كوز الدىندا بولعان «قىزىل سويقانداردىڭ» قاقپاشىسى پەتەر شمەيحەل جۇرەگى لوقسىپ، قايتا-قايتا قۇسا بەردى. ارتىنشا پسيحولوگقا جازىلىپ، وزىنە ازەر كەلدى. ديەۆيد باست شە؟ اياعىنا 26 رەت وتا جاساتتى. جاسىل الاڭعا قايتا ۇمتىلعانىمەن «اياعىڭدى كەسپەگەنىمىزگە راحمەت ايت» دەگەن دارىگەرلەر وعان دوپ تەبۋگە رۇقسات بەرمەي قويدى.  

دجيبريل سيسسە (فرانسيا) – 30.10.2004 جانە 07.06.2006 ج.

فرانسيالىق اق ساقالدى، سارى شاشتى قارا جىگىت فۋتبولداعى كارەراسىندا ەكى رەت اياعىن وڭدىرماي سىندىرعان. بىرىنشىسىندە «ليۆەرپۋلدە» ويناپ جۇرگەن كەزى بولاتىن. چەمپيونات اياسىندا «بلەكبەرنمەن» كەزدەسكەن. كەنەت «قاڭعىباستاردىڭ» قورعاۋشىسى دجەيمس ماكيۆلي ارت جاقتان قوس اياقپەن سەكىردى دە، سيسسەنى «ويبايلاتىپ» جىبەردى. «ۇلكەن جانە كىشكەنتاي جىلىنشىك سۇيەكتەرىنىڭ اشىق سىنىعى» دەگەن دياگنوز قويدى دارىگەرلەر. ءبىراق، دجيبريل مىقتى ەكەن، التى اي وتەر وتپەستەن «ليۆەرپۋل» ساپىندا قايتا الاڭعا شىعىپ، كومانداسىنىڭ ليدەرى بولدى.

الايدا، ەكىنشى جاراقاتىنان كەيىن ءبىز بۇرىنعى سيسسەنى كورە المادىق. وبالىنا جۇڭگو ويىنشىسى قالدى. وسىدان تۋرا 10 جىل بۇرىن بولاتىن. ۇلان قونىسبايەۆتىڭ اياعىن قىتايلىقتار 2016 جىلدىڭ 7 ماۋسىمىندا سىندىرسا، سيسسەنى 2006 جىلدىڭ وسى ايى، وسى كۇنىندە وماقاسىنان ءتۇسىردى. «ءدجيبريلدىڭ جان ايقايىن ەستىگەندە دەنەم تۇرشىگىپ كەتتى. تەز ساۋىعىپ كەتۋىن تىلەيمىن! ول مىقتى. مىندەتتى تۇردە الاڭعا قايتا ورالادى»، - دەدى سول كەزدە كوماندالاسى تەرري انري. ءيا، سيسسە قايتا ورالدى. الايدا، بۇرىنعى بابىنا قايتا كەلمەدى. راس، ەكى رەت گرەكيا چەمپيوناتىنىڭ ۇزدىك سۇرمەرگەنى اتاندى. ءبىراق بۇل ماقتانىش پا؟

فرانچەسكو توتتي (يتاليا) – 19.02.2006 ج اياقتان العان اۋىر جاراقاتتى جەڭگەندەردىڭ ءبىرى – فرانچەسكو توتتي. 2006 جىلدىڭ 19 اقپانىندا «ەمپوليگە» قارسى ويىندا جىلىنشىك سۇيەگىن عانا ەمەس، توبىق سۇيەگىن دە سىندىرىپ العان «رومانىڭ» «گلادياتورى» سول جىلى گەرمانيادا وتكەن الەم چەمپيوناتىنا قاتىسىپ قانا قويماي، 7 ويىندا دا الاڭعا شىقتى. ەڭ باستىسى، باس كۋبوكتى باسىنان اسىرا كوتەردى. ال ونىڭ الدىندا دارىگەرلەر ونى كەمى ءبىر جىلعا قاتاردان شىقتى دەپ باستارىن ۇستاعان. اياعىنا مەتال تىلىگىن سالىپ، سۇيەكتىڭ ورنىن سول تەمىرمەن بەكىتكەن. توتتي سودان بەرى ازداپ اۋىرسىنسا دا، «رومانىڭ» ناعىز «يمپەراتورى» بولىپ قالا بەردى.  

ەدۋاردو دا سيلۆا (حورۆاتيا) – 23.02.2008 ج. حورۆاتيا ازاماتتىعىن العان برازيليالىق شابۋىلشىنىڭ وت بولىپ لاپىلداپ تۇرعان كەزى ەدى. ءبىراق «بيرمينگەممەن» بولعان ويىن ونىڭ فۋتبولداعى كارەراسىنا ءبىرجولا نۇكتە قويماسا دا، ءبىراز اۋرەگە سالدى. ءتىپتى، العاشىندا دارىگەرلەر اياعىن كەسۋى مۇمكىن دەگەن دە سىبىستار تارادى. اۋپىرىمدەپ امان قالعان ەدۋاردو الاڭعا ءبىر جىلدان كەيىن ءبىر-اق شىقتى. شىعا سالىسىمەن ەكى گول سوعىپ، «ارسەنالدى» العا جەتەلەدى. الايدا جاراقاتى شىداتپاي، ەكىنشى تايمدا الماسۋعا ءماجبۇر بولدى. كەيىن ۋكراينانىڭ «شاحتەرىنە» اۋىستى، برازيلياعا بارىپ قايتتى، قايتا ۋكرايناعا كەلدى. كىم بىلەدى، ەگەر سول كەزدە مارتين تەيلور ساق ويناپ، اياعىن ورىپ جىبەرمەگەندە ءقازىر ەدۋاردو «رەال» نەمەسە «بارسەلونانىڭ» بىرىندە ويقاستاپ جۇرەر مە ەدى؟!

اارون رەمزي (ۋەلس) – 27.02.2010 ج. بولاشاعىنان مول ءۇمىت كۇتتىرگەن «ارسەنالدىق» رەمبو 18 جاسىندا انگليا پرەمەر-ليگاسىنىڭ ەڭ ۇزدىك جاس ويىنشىسى اتاندى. بۇل 2009 جىل ەدى. ءبارى دە ااروننىڭ ويىنىن زينەدين زيداندىكىنە ۇقساتىپ ءجۇردى. «التىن دوپتاردىڭ» بولاشاق يەگەرى رەتىندە تانىدى. دەگەنمەن، 2010 جىلدىڭ 27 اقپانى ونىڭ ءومىرىن ءبىرشاما وزگەرتىپ جىبەردى. «ستوك سيتيمەن» بولعان كەزدەسۋدە رايان شوۋكروسسپەن قاقتىعىسىپ قالىپ، اياقتان وتە اۋىر جاراقات الدى. الاڭدا سەگىز مينۋت ەم-دوم جاساعان دارىگەرلەر اقىرى جەدەل جاردەممەن جاقىن ماڭداعى اۋرۋحانالاردىڭ بىرىنە الىپ كەتتى. باس تورەشى كىنالىنى الاڭنان قۋدى.

جاراقاتىن ەمدەۋگە 9 اي كەتتى. 2010 جىلدىڭ 23 قاراشاسىندا «ارسەنال» ساپىندا الاڭعا قايتا شىققانىمەن «نوتتينگەم فورەست»، «كارديف سيتي» سىندى ەكىنشى دەڭگەيلى كلۋبتارعا جالعا بەرىلدى. 2011 جىلى «ارسەنال» ااروندى قايتا شاقىرتىپ الدى. ءبىراق بىردەن كوسىلىپ كەتكەن جوق. باسىندا اياعىن تارتىپ ويناپ ءجۇردى. بۇگىندە رەمزي قايتا بابىندا. سوڭعى ماۋسىمدا «ارسەنال» مەن ۋەلس قۇراماسىنىڭ ۇزدىك ويىنشىلارىنىڭ ءبىرى بولدى.

P.S. بايقاعاندارىڭىزداي، مۇنداي جاراقاتتاردان كەيىن دە قايتا شاۋىپ كەتۋگە بولادى. ءبىز ءوز تاراپىمىزدان ۇلان قونىسبايەۆتىڭ تەزىرەك ساۋىعىپ كەتۋىن تىلەيمىز! ءارتۇرلى اقپاراتتارعا سۇيەنسەك، ول ەندى كەمى ءۇش اي ەمدەلەدى. 

ءازيز ءجۇمادىل

دەرەككوز: sportsffa.kz/kz