اقتوبە وبلىسىنىڭ باسشىلىعى تەررورلىق اكتى سالدارىنان قازا تاپقان وتباسىلارعا ماتەريالدىق كومەكتى ۇلعايتۋ تۋرالى شەشىم قابىلدادى، - دەپ جازادى Qamshy.kz قازاقپاراتقا سىلتەمە جاساپ.

ماتەريالدىق كومەك 4 وتباسىعا بۇرىنعى ايتىلعان 1 ميلليون ەمەس، 5 ملن تەڭگەدەن كورسەتىلەتىن بولدى.

اقتوبەدە 5 ماۋسىمدا ەكى قارۋ-جاراق دۇكەنىنە جانە اسكەري بولىمگە قارۋلى شابۋىل جاسالدى. ءىىم دەرەكتەرىنە سايكەس سودىرلاردىڭ كوبى ۇستالدى. بۇگىندە التى ادام ىزدەۋدە.

لاڭكەستىك سالدارىنا 7 ادام قازا تاپتى. ونىڭ ىشىندە ازاماتتار مەن اسكەري تۇلعالار بار. مەملەكەت باسشىسىنىڭ تاپسىرماسىمەن اكىمدىك قازا تاپقان، زارداپ شەككەن وتباسىلارعا بارلىق قاجەتتى كومەكتى كورسەتۋدە.

قازا تاپقاندار  ىشىندە  -  «پاللادا»  دۇكەنىنىڭ ساتۋشىسى 44 جاستاعى اندرەي ماكسيمەنكو، 69 جاستاعى زەينەتكەر نيكولاي ونيششەنكو، 35 جاستاعى ميحايل ماتروسوۆ كەزدەيسوق وققا ۇشتى، 33 جاستاعى «كۇزەت» قىزمەتكەرى مەرحان تاجىبايەۆ قىزمەتتىك مىندەتىن وتكەرۋ بارىسىندا كوز جۇمدى.

قايعىلى وقيعاعا بايلانىستى قازاقستاندا 9 ماۋسىم قارالى كۇن دەپ جاريالاندى.

رەسپۋبليكا بويىنشا جالاۋ تومەن ءتۇسىرىلدى. مادەني-بۇقارالىق، سپورت، ويىن-ساۋىق شارالارى توقتاتىلدى. كوڭىل كوتەرەتىن تەلە- جانە راديو حابارلار كەيىنگە قالدىرىلدى.