كەشە ساياساتتانۋشى، پرەزيدەنت جانىنداعى ستراتەگيالىق زەرتتەۋلەر ينستيتۋتىنىڭ باسشىسى ەرلان كارين ەلدە ورىن العان سوڭعى لاڭكەستىك ارەكەتتەرگە بايلانىستى پىكىر ءبىلدىرىپ، قازاقستاندا الەۋمەتتىك جەلىلەرگە، ونىڭ ىشىندە ۆكونتاكتە جەلىسىنىڭ قىزمەتىنە جەكتەۋ قويۋدى ۇسىنعان بولاتىن.

ساياساتتانۋشىنىڭ ۇسىنىسىنا اقىن، جۋرناليست، «اقيقات» جۋرنالىنىڭ باس رەداكتورى امانحان ءالىم ۇلى نارازى. اقىن مۇنداي «كەرتارتپالىق ەرلانداي ازاماتقا جاراسپايتىنىن» ايتادى. بۇل تۋرالى Qamshy.kz حابارلايدى.

نازارلارىڭىزعا امانحان ءالىم ۇلىنىڭ ەرلان قارينگە ءوز پاراقشاسىندا جولداعان ۇشبۋ حاتىن ۇسىنىپ وتىرمىز.

ۇشبۋ حات

ەرلان مىرزا، الەمدىك ادامزات اقىل-ويىنىڭ جەمىسىن ءارى وركەنيەت كورسەتكىشىن جاۋىپ ۇلگى كورسەتپەۋ كەرەك، قايتا ونى پايدالانۋ مادەنيەتىن ۇيرەتىپ، جالپى، قۇرالدىڭ (بۇل جەردە الەۋمەتتىك جەلىنى قۇرال دەپ تۇسىنەيىك) جامان بولمايتىنىن، ونى پايدالانا بىلمەيتىن ءبىلىمسىز، بىلىكسىز ادامنىڭ جامان بولاتىنىن ايتىپ، جازىپ، ويعا دا بويعا دا ءسىڭىرۋ كەرەك تە، ءوز تاراپىڭىزدان سو باعىت-باعداردا، ۇستانىمدا جاقسى ۇلگى كورسەتۋگە ءتيىستىسىز. ءسىز ءوزىڭىزدى وقىعان، ساياساتكەر ادام سانايتىن ازاماتسىز. كەركەتتى، كەرتارتپالىق سىزگە جاراسپايدى. الەمدىك وركەنيەت - ادام ويىنىڭ وزىق ۇلگىسىنەن، ءتيىمدى دە پايدالى اقىل-وي جەمىسىنەن تۇرادى.ءبىز سوعان قول جەتكىزىپ، ءوزىمىز دە سوعان ۇلەس قوسۋىمىز كەرەك. ەگەر، ءسىز ونىڭ پايداسىن، جەمىسىن، جاقسىلىعىن كورۋدى قالاماساڭىز، وزگەگە كەدەرگى جاساماڭىز. بۇل جاقسى قۇرال، سو جاقسى قۇرالدى پايدالانا بىلمەي، ونىڭ پايدالانۋ مادەنيەتى مەن ىس-ارەكەتتىك، بايلانىستىق قادىر-قاسيەتىن سەزىپ-بىلمەيتىندەر قازاقتى كەرى تارتادى. الەمدىك وركەنيەت جەمىسىنىڭ قىزىعىن، پايداسىن كورۋدەن جەرىندىرەدى. ونى قۇبىجىق كورسەتەدى. الەۋمەتتىك جەلى باق-تىڭ وزىق ۇلگىسى. بۇكىل الەم پايدالانىپ وتىرعان قۇرال."وتكەندى (تاريحتى) پيستولەتپەن اتساڭىز، وتكەن ءسىزدى پۋشكامەن اتادى" دەگەنگە ساياتىن قاناتتى ءسوز بار. سوندىقتان، ءسىز ادامزاتتىڭ اقىل-ويىنىڭ جەمىسى، وزىق وركەنيەتتىڭ كورىنىسى الەۋمەتتىك جەلىنى پيستولەتپەن اتساڭىز، ول ءسىزدى پۋشكامەن اتادى. ونىڭ كۇش-قۇدىرەتى سوندا. قازىرگى ءسىزدىڭ جاقسىلى-جاماندى، ازدى-كوپتى، بارلى-جوقتى جيناعان بەدەلىڭىز سول باق-تىڭ وزىق ۇلگىلەرىنىڭ جەمىسى. سوندىقتان، الەۋمەتتىك جەلىنى پايدالانا المايتىن، پايدالانۋ مادەنيەتىن بىلمەيتىن ءبىلىمسىز دە بىلىكسىزدەر ءۇشىن، قالعان قازاق قوعامىن كەرتارتپاڭىز، كەرتارپالىق كورسەتپەي ايتقان ءسوزىڭىزدى قايتا الىڭىز. سالەممەن، امانحان ءالىم ۇلى.