باتىس قازاقستان وبلىسىندا ءداستۇرلى ەمەس ءدىني اعىمنىڭ 17 وكىلى ۇستالدى. ولاردان ءتۇرلى تاياقتار مەن ارماتۋرا قيىندىلارى تاركىلەندى، - دەپ حابارلايدى Qamshy.kz وبلىستىق لاڭكەستىكپەن كۇرەس جەدەل شتابىنا سىلتەمە جاساپ.

«بقو ۇقك دەپارتامەنتى وبلىستىق ىىد-مەن بىرگە ءداستۇرلى ەمەس ءدىني اعىمداردىڭ بىرىنە قاتىستى مالىمەتتى تەكسەردى. ولار 1994 جىلى تۋعان اتىراۋلىق ءبىر باۋىرلارىنا بەلگىسىز بىرەۋلەر تارتىپ العان اۆتوكولىگىن قايتارۋعا كومەكتەسۋدى ويلاستىرعان» دەلىنگەن حابارلامادا.

قۇقىققورعاۋشىلار كولىكتى زاڭسىز تارتىپ الۋ وقيعاسىنىڭ شىنىمەن بولعانىن انىقتاعان. ەكى تاراپ اراسىنداعى قاقتىعىستى بولدىرماۋ ماقساتىندا 17 ادام ۇستالعان.

«بولۋى مۇمكىن جاعىمسىز جاعدايدىڭ الدىن الۋ ماقساتىندا اتالعان ازاماتتار انىقتالىپ (17 ادام)، 10 ماۋسىم كۇنى ساعات 02.00-دە «بايتەرەك» بازارىنىڭ جانىندا ۇستالدى. ۇستالعاندار سول جەردە جينالىپ، ودان ءارى اسان اۋلىنا بارىپ، وندا كولىكتى تارتىپ العاندارمەن قاقتىعىس جاساماق بولعان»، - دەلىنگەن جەدەل شتاب حابارلاماسىندا.

ۇستالعانداردىڭ كولىگىنەن پوليسيا 5 بەيسبول تاياعىن، ءبىر ارماتۋرا تاپقان.

«ۇستالعان ازاماتتار ورال قالاسىنىڭ ىىب-گە جەتكىزىلدى. الدىن الا تەرگەۋ شارالارى جۇرۋدە»، - دەيدى شتابتاعىلار.