بۇگىن نازاربايەۆ ۋنيۆەرسيتەتى تۇلەكتەرىنىڭ ەكىنشى سالتاناتتى وقۋ ءبىتىرۋ راسىمىندە ەلباسى نۇرسۇلتان نازاربايەۆ ۇزدىك ستۋدەنتتەرگە ديپلومداردى ءوز قولىمەن تابىس ەتتى، - دەپ حابارلايدى Qamshy.kz قازاقپاراتقا سىلتەمە جاساپ.

«وتكەن جىلى مەن ءبىزدىڭ ۋنيۆەرسيتەتتىڭ ءبىرىنشى تۇلەكتەرىنە ديپلوم تابىستاعان ەدىم. بۇگىندە سول تۇلەكتەردىڭ ەڭبەكتەرى مەن ناتيجەلەرىن ماقتان تۇتامىز. ولار ءوز ىستەرىنىڭ ناعىز كاسىبي شەبەرلەرى رەتىندە قالىپتاسىپ، جەتەكشى قازاقستاندىق جانە شەتەلدىك كومپانيالاردا جۇمىس ىستەۋدە، كوپشىلىگى وزدەرىنىڭ ءبىلىمىن شەتەلدىك عىلىمي-زەرتتەۋ ورتالىقتارىندا جالعاستىرۋدا»، - دەپ اتاپ ءوتتى ەلباسى.

ق ر پرەزيدەنتى بۇل ۋنيۆەرسيتەتتىڭ تەك قانا قازاقستان ەمەس، سونىمەن بىرگە كوپتەگەن ەل ءۇشىن بيوحيميا، يادرولىق ينجەنەريا، روبوت تەحنيكاسى، مەحاترونيكا سىندى سالالاردا بىلىكتى ماماندار دايىندايتىندىعىن اتاپ ءوتتى. 

ايتا كەتەرلىگى، بيىل ۋنيۆەرسيتەتتى 622 ستۋدەنت ءبىتىرىپ وتىر. ولاردىڭ 444ء-ى باكالاۆريات باعدارلاماسى بويىنشا، ال 178ء-ى ماگيستراتۋرا باعدارلاماسى بويىنشا وقۋلارىن اياقتادى.