كەشە مامىر ايىندا جەر رەفورماسىنا نارازىلىق تانىتىپ، ارتىنشا قۋعىن كورگەن بەلسەندىلەر ق ر باس پروكۋرورىنىڭ ايرىقشا تاپسىرمالار بويىنشا اعا كومەكشىسى حابىلسايات ابىشيەۆپەن كەزدەستى، - دەپ حابارلايدى Qamshy.kz uralskweek.kz – كە سىلتەمە جاساپ.
ورال قالاسىنا بەلسەندىلەرمەن جۇزدەسۋ ءۇشىن ح. ابىشيەۆ پەن باس پروكۋراتۋرا باسقارماسىنىڭ اعا پروكۋرورى ەرجان تۇرماعامبەتوۆ باس پروكۋرور جاقىپ اسانوۆتىڭ تاپسىرماسى بويىنشا ارنايى بارىپتى.
باس پروكۋراتۋرا وكىلدەرىمەن كەزدەسۋدە زاڭگەر ابزال قۇسپان، جەر رەفورماسىنا نارازىلىق تانىتىپ، قۋعىندالعان بەلسەندىلەر لۇقپان احمەدياروۆ، يساتاي وتەپوۆ، باۋىرجان الىپقالييەۆ، اسقار شايعۇماروۆ، بلوگەر نۇرلان ءسادىر، «ۋرالسكايا نەدەليا» باسىلىمىنىڭ باس رەداكتورى تامارا ەسلياموۆا قالىپتاسىپ وتىرعان جاعدايعا قاتىستى ويلارىن اشىق جەتكىزدى.
بەلسەندىلەر وزدەرىنىڭ مۇنداي دەڭگەيدە كەزدەسۋدى كۇتپەگەندەرىن ايتادى.
«ءبىز سىزدەردى تىڭداۋعا كەلدىك. نە نارسەگە نارازىسىزدار، قانداي پروبلەمالار الاڭداتادى؟ سونى بىلگىمىز كەلەدى»، - دەگەن ح. ابىشيەۆ ازاماتتاردىڭ ويلارىن ورتاعا سالۋىن سۇراعان.
ەكى ساعاتقا سوزىلعان كەزدەسۋدە بەلسەندىلەر باس پروكۋروردىڭ اعا كومەكشىسى مەن باسقارما اعا پروكۋرورىنا وڭىردە عانا ەمەس، جالپى ەلدە قالىپتاسىپ وتىرعان جاعدايلار، جەر رەفورماسىنىڭ ءقاۋىپتى سالدارى، بەلسەندىلەردى قۋدالاۋ، ەلدىڭ الەۋمەتتىك احۋالى، اكىمدىكتەر جانىنداعى قوعامدىق كەڭەستەردى جاساقتاۋداعى كەمشىلىكتەر، ءتۇرلى تاريفتەردىڭ ءوسۋى سىندى كوپتەگەن وزەكتى ماسەلەلەردى جايىپ سالعان.
بەلسەندىلەردىڭ بارلىعى ءبىر اۋىزدان باس پروكۋراتۋرا وكىلىنەن نەگىزسىز قۋدالاۋدى توقتاتۋدى سۇرادى.
«وزگەرىس بولادى دەپ ويلايمىن. ءبىز ءححى عاسىردا ءومىر ءسۇرىپ جاتىرمىز. بىزگە قارسىلىق تانىتۋ ەمەس، ديالوگ قۇرۋ كەرەك. مەن ءوزىم دە دەموكراتپىن، ادامدار ءوزىن قور سەزىنبەۋى كەرەك، قايتا وزىنە كورسەتىلەتىن قۇرمەتتى سەزىنۋى ءتيىس. پرەزيدەنت تە وسىنى ءجيى ايتادى»، - دەدى ح. ابىشيەۆ ەل ازاماتتارىنىڭ وتىنىش-تىلەگىن تىڭداعان سوڭ.
ورالعا دەيىن باس پروكۋراتۋرا وكىلدەرى اتىراۋدا دا بولىپ، ءوڭىر بەلسەندىلەرىمەن جۇزدەسكەن.
