ۋكراينانىڭ قازاقستانداعى ەلشىلىگى ۋكرايندىق ساياساتكەر يرينا فاريوندى «سالداقى» دەپ ايىپتاعان قازاقستان پارلامەنت ءماجىلىسىنىڭ ۆيسە-سپيكەرى ۆلاديمير بوجكوعا جاۋاپ بەردى، - دەپ حابارلايدى Qamshy.kz.
بۇعان دەيىن ۆلاديمير بوجكو قازاقستانداعى ورىس ءتىلىنىڭ احۋالىنا الاڭداۋشىلىق بىلدىرە وتىرىپ، ءتىل ساياساتىنا ۋكراينانى مىسال ەتكەن بولاتىن. سونداعى سوزىندە ءماجىلىس ۆيسە-سپيكەرى ۋكرايندىق ۇلتشىل يرينا فاريوندى «سالداقى» دەپ بالاعاتتاعان ەدى.
ءبىر قىزىعى ەلشىلىكتىڭ جولداعان جاۋابىندا ۆ. بوجكونىڭ دا، قوعام قايراتكەرى يرينا فاريوننىڭ دا اتى اتالماعان. حاتتىڭ ۆ. بوجكوعا قاتىستى ەكەنىن بۇل كيكىلجىڭنەن بەيحابار ازاماتتار ونداعى «الدەبىر مقك (كگب) جوعارى مەكتەبىنىڭ تۇلەگى» دەگەن تىركەستەن اڭعارۋعا بولادى.
«بىرەر كۇن بۇرىن كسرو مقك جوعارى مەكتەبىنىڭ ءبىر تۇلەگى، قازاقستاننىڭ وڭتۇستىگىندەگى ورىس ءتىلى تۋرالى دابىل قاعا وتىرىپ، ۋكراينالىق ايەلدى جانامالاي قورلادى. ول ۋكراينانىڭ تانىمال قوعام قايراتكەرى، فرانسيا، گەرمانيا، پولشاداعى، باسقا دا وركەنيەتتى ەلدەردەگى ارىپتەستەرى سياقتى مەملەكەتتىك ءتىل، تيتۋلدى ۇلتتىڭ ءتىلىن قورعاپ جۇرگەن يرينا فاريونعا قاراتا «سالداقى» دەگەن ءسوزدى قولداندى. «سالداقى» ءسوزى بۇل جەردە ول باعىتتالعان وبەكتىنى ەمەس، ونى ايتقان سۋبەكتىنى سيپاتتايدى. بۇل ءسوزدىڭ تاساسىنا تۇتاس الەم – ادام قۇقىعىن ساقتامايتىن، وزگەشە ويلاۋعا توزىمسىزدىك تانىتاتىن اگرەسييا جاسىرىنىپ تۇر»، - دەلىنگەن حاتتا.
ودان ءارى ەلشىلىك «ورىس الەمى» جوباسىن سىنعا الىپ، ۋكراينا جەرىن جاۋلاپ الۋشىلىقتى ايىپتايدى.
ساياسي ماسەلەلەردى ايتا كەلىپ، حات اۆتورلارى اسكەريلەر اراسىندا ءجيى ايتىلاتىن «وفيسەرلىك ابىروي» ۇعىمىنا توقتالىپ، مقك وفيسەرىن دە، ونىڭ قورعاپ وتىرعان «ورىس الەمىن» دە تۇيرەپ وتكەن.
«قازىرگى ۋكرايندىقتار ورىستىڭ كلاسسيكالىق ادەبيەتىن وقىپ ءوستى. ول كىتاپتاردا وفيسەرلەرگە (تەك ولارعا عانا ەمەس) ايەلدى «سالداقى» دەپ اتاۋعا رۇقسات بەرىلمەگەن. ءبىراق، وفيسەرلىك ابىروي ۇعىمى «ورىس الەمىنىڭ» قۇندىلىقتارىنا قايدان قاتىستى بولسىن»، - دەلىنگەن حاتتا.
ديپلوماتيالىق ميسسيا حاتى: «قازاقستان حالقى انا تىلىندە سويلەۋ قۇقىعىن قورعاپ جۇرگەن انالارىن، ايەلدەرى مەن قىزدارىن «ورىس الەمىنىڭ» وكىلدەرىنە سالداقى دەپ اتاتۋدى وزدەرى شەشەدى»، - دەگەن سوزدەرمەن اياقتالعان.
