ۇكىمەت جانىنان قۇرىلعان جەر رەفورماسى جونىندەگى كوميسسيانىڭ جۇمىسى بەسىنشى وتىرىسقا كەلگەندە ءۇزىلدى. ءتورتىنشى مارتە كوكشەتاۋدا باس قوسقان كوميسسيانىڭ سەنبى كۇنگى كەزەكتى وتىرىسىنىڭ نە سەبەپتى وتپەي قالعانىن انىقتاۋعا تىرىستىق.

ماسەلەنىڭ ءمانىسىن بىلمەككە رەسمي اقپارات سۇراپ جەر زاڭنامالارىن ءتۇسىندىرۋ جونىندەگى 1434 ءنومىرلى ساll-ورتالىققا حابارلاسقانىمىزدا تەلەفونيست قىز بىزگە جەر رەفورماسى جونىندەگى كوميسسيانىڭ حاتشىلىعىنا (تەل. ءنومىرى: 87172 555978) حابارلاسۋعا كەڭەس بەردى. وندا تۇتقانى العان ەرجان بۋحبانوۆ (ءوزىن جەر كوميتەتىنىڭ باسشىسى دەپ تانىستىردى – رەد.) كوميسسيانىڭ سەنبىدەگى وتىرىسى نەگە وتپەي قالعانى مەن كەلەسى وتىرىسى تۋرالى مالىمەتتى تۇستەن كەيىن عانا ناقتىلاي الاتىنىن، ءتيىستى لاۋازىم يەلەرى سول كەزدە كەلەتىنىن ايتتى. تۇسكە دەيىن ءبىر حابارى بولار دەگەن ۇمىتپەن باسقا كوزدەردەن العان مالىمەتتەرمەن بولىسەمىز. 

ءا دەگەندە ءار سەنبى سايىن جينالىپ تۇرۋى ءتيىس، قۇرامىندا ءتورت بىردەي جۇمىس توبى بار كوميسسيانىڭ كەزەكتى وتىرىسىنىڭ وتپەي قالۋىنا كوميسسيا جەتەكشىسى، ءبىرىنشى ۆيسە-پرەمەر باقىتجان ساعىنتايەۆتىڭ جۇمىس كەستەسىنىڭ تىعىزدىعى سەبەپ بولۋى مۇمكىن. 

ۇكىمەت جانىنداعى كوميسسيانىڭ تاعى ءبىر مۇشەسى مۇحتار تايجان دا بۇل ماسەلەدەن تولىق حاباردار ەمەستىگىن ايتتى.

ءوزىنىڭ فەيسبۋكتەگى پاراقشاسىندا ول: «كوميسسيا نە بولدى، نەگە كەزەكتى وتىرىس بولعان جوق دەپ ليچكامەن مەنى كوپ سۇراپ جاتىر. جاۋابىم - مەن بىلمەدىم. وتكەن اپتادا شتابقا تەل سوقتىم، ناقتى جاۋاپ بەرگەن جوق. ءبىراق ءوز باسىم جۇمىستى جالعاستىراي بەرەم»، - دەپ جازدى.

وتكەن دەمالىستاردا الماتى وبلىسى شەڭگەلدى اۋلىندا، جامبىل وبلىسىنىڭ قورداي اۋىلدارىندا بولىپ قايتقان ول، 90-جىلدارى جەردى ءبولۋ، پاي ۇلەستىرۋ ناۋقانىنا بايلانىستى ءبىرقاتار ماسەلەلەر بار ەكەنىن، لاتيفۋنديستەردىڭ قانداي جولمەن پايدا بولعانىن اۋىل تۇرعىندارىنان ەستىپ جاتقانىن ايتادى.

كوميسسيا مۇشەسى دوس كوشىم اbai.kz – كە تىلشىسىنە كوميسسيا جۇمىسىنا بۇلاي نەمقۇرايلى قارايتىندارعا كوڭىلى تولمايتىنىن ايتىپتى.

«نەگىزى جەر كوميسسياسىنىڭ وتىرىستارىن وتكىزۋ جۇمىسى اۋىلشارۋاشىلىق مينيسترلىگىنە جۇكتەلگەن. وتىرىستىڭ نەگە وتپەي قالعانىن سولاردان سۇراۋ كەرەك. مەنىڭشە، كەزەكتى جينالىستىڭ وتپەي قالۋى باقىتجان ساعىنتايەۆتىڭ قولىنىڭ بوساماۋى سەبەپ بولعان بولۋى كەرەك. بالكىم، اقتوبەدەگى لانكەستىك ارەكەتتىڭ اسەرى بولعان شىعار. دەسە دە، قانداي جاعداي بولماسىن، بۇل وتىرىستاردىڭ ءوتۋى قاجەت ەدى، جۇمىسىنىڭ توقتاماعانىن دۇرىس.

مەنىڭ كوڭىلىم تولمايتىن ءبىراز دۇنيەلەر بار. وتكەندە ول جايدىڭ ءبىرازىنىڭ شەت-جاعاسىن ايتتىم دا. جەر كوميسسياسىنىڭ وڭىرلەردە وتەتىن جينالىسى كوكشەتاۋدان، ياعني، اقمولا وبلىسىنان باستالدى. ەندى شىعىس قازاقستان، پاۆلودار سەكىلدى وبلىستاردا وتپەك. بۇل كوميسسيا نەگە العاشقى جيىنداردى ميتينگتەر وتكەن اتىراۋ مەن اقتوبەدەن باستامايدى؟ نەگە سول جاقتىڭ پىكىرىن الدىمەن بىلمەيمىز؟ بۇل ءبىرىنشى ماسەلە»، - دەگەن د. كوشىم كوميسسياداعى كەيبىر ۇيىمداستىرۋ ماسەلەلەرىندەگى شيكىلىكتەرگە دە توقتالىپتى.

«بارلىق جۇمىس كوميسسيانىڭ ءتوراعاسى باقىتجان ساعىنتايەۆتىڭ قولىنىڭ بوس بولۋىنا بايلانىستى جۇرگىزىلىپ جاتقان سياقتى. كوميسسيانىڭ ءتوراعاسى بولعان سوڭ، ول كىسى بۇكىل جيىنعا قاتىسۋ كەرەكتىگى ايتىلعان ەدى. نەگىزى مۇنداي كەشەندى جۇمىس جاسالاردا ارنايى جوبا بەكىتىلۋى كەرەك. قاي ۋاقىتتا قانداي جيىن وتەدى، كوميسسيا قانداي وڭىرگە بارادى، بارلىعى دەرلىك قاتتالىپ، ارنايى كەستە دايىندالۋى كەرەك. مۇنىڭ ءبىرى دە قولعا الىنباعان. ءبىز ، كوميسسيا قۇرامىنداعى ازاماتتار، ءوزىمىزدىڭ جۇمىستى قالاي جوسپارلارىمىزدى بىلمەي وتىرمىز. ەگەر كوميسسيا جۇمىسىنىڭ ارنايى كەستەسى بولسا، ءبىز بار ءىسىمىزدى سوعان ىڭعايلار ەدىك»، - دەيدى ول.

كوميسسيا وتىرىسىنىڭ العاش رەت وتپەي قالىپ وتىرعانىن العا تارتقان دوس كوشىم ازىرگە بۇل تۋرالى دابىرا قىلۋدىڭ قاجەتى جوق دەيدى.

وسىلايشا، ۇكىمەت جانىنداعى كوميسسيانىڭ وتپەي قالعان وتىرىسى مەن الداعى جۇمىسى تۋرالى رەسمي ورىنداردان تۇشىمدى جاۋاپ الۋ مۇمكىن بولماي وتىر. ءقازىر جەر ماسەلەسىنە بايلانىستى قۇرىلعان jerturaly.kz سايتى اشىلىپ تۇرعانىمەن، وندا سوڭعى ماتەريال 08 ماۋسىم كۇنى ساعات 21.08-دە سالىنعان ەكەن.

دارحان مۇقانتەگى