تانىمال عالىم، «التىن ادامدى» العاش تاپقان ارحەولوگ، بەكمۇحانبەت نۇرمۇحانبەتوۆ دۇنيەدەن وزدى،  – دەپ حابارلايدى Qamshy.kz.

عالىمنىڭ كەشە ساعات 23.30-دا قايتىس بولعانى حابارلاندى.

بەكمۇحانبەت نۇرمۇحانبەتوۆ  1935 جىلى 17 مامىردا الماتى وبلىسىندا دۇنيەگە كەلگەن. قازاق مەملەكەتتىك ۋنيۆەرسيتەتى تاريح فاكۋلتەتىنىڭ تۇلەگى. 1969 جىلى جاس ارحەولوگ جەتەكشىسى كەمەل اقىشيەۆ ەكەۋى ەسىك قورعانىنان عاجايىپ تاريحي ەسكەرتكىش تاپقان ەدى.

عالىمنىڭ زەرتتەۋشىلىك جولى قولا داۋىرىنەن (ب.ز.ب. 14 ع.) ورتاعاسىرلىق (ب.ز. 10 – 12 ع-لار) كەزەڭدەرگە دەيىنگى ارالىقتى قامتىدى. قاڭلى زامانىن (ب.ز. 2 – 4 ع-لار)، كونە تۇركى ءداۋىرىن (ب.ز. 4 – 8 ع-لار) تۇراقتى زەرتتەدى. اتاپ ايتقاندا، وتىرار ءوڭىرىنىڭ كوكماردان، كۇيىكماردان قالالارىنىڭ جۇرتتارىنداعى زيراتتارعا، ارىس ءوز. بويىنداعى ءبورىجار، قارااسپان، بوگەن وبالارىندا قازبا جۇمىستارىن جۇرگىزدى. كونە مۇرالاردى قورعاۋ جانە پايدالانۋ جۇمىستارىن جولعا قويۋ ماقساتىمەن 1980 ج. جەدەل كومەك توبىن قۇردى. بۇل شاعىن توپ كەيىن قازاقستان اۋماعىن تۇگەل قامتىپ، ساق قورعاندارى شۇبارت، مولالى، قىرعاۋىلدى، بورالداي، ەسىك، تۇرگەن وبالارىن قامقورلىققا الدى. 1999 جىلى الماتى وبلىسى ەڭبەكشىقازاق اۋدانىندا “التىن ادام” ۇرپاقتار ساباقتاستىعى اسسوسياسياسىن قۇردى. اسسوسياسيانىڭ باستى ماقساتى – “التىن ادام” تابىلعان ەسىك وبالارىن اشىق اسپان استىنداعى مۇراجاي-قورىققا اينالدىرۋ. بەكمۇحانبەت نۇرمۇحانبەتوۆ ءومىرىنىڭ سوڭعى كۇندەرىنە دەيىن وسى وبالاردىڭ قوعامدىق نەگىزدەگى شىراقشىسى مىندەتىن اتقارىپ كەلدى. ارحەولوگ-عالىمنىڭ 50 شاقتى عىلىمي ماقالالارى، كوپشىلىككە ارنالعان 200-دەي ماتەريالدارى جارىق كورگەن.