كورنەكتى قوعام قايراتكەرى، ىشكى ىستەر ورگاندارىنىڭ ارداگەرى، وتستاۆكاداعى گەنەرال-مايور مۇرات قالماتايەۆ دۇنيەدەن ءوتتى، - دەپ حابارلايدى Qamshy.kz.
مارقۇممەن قوشتاسۋ شاراسى ەرتەڭ ساعات 09.00-دە الماتىداعى ارميا ۇيىندە وتەدى.
قالماتايەۆ مۇرات دۇيسەنبى ۇلى (1936 جىلى تۋعان) – اسكەري جانە قوعام قايراتكەرى، گەنەرال-مايور (1986)، جۋرناليست. 1983 جىلى رەسپۋبليكا ءىىم-نىڭ جاڭادان ۇيىمداستىرىلعان ساياسي ءبولىمىنىڭ باستىعى بولىپ تاعايىندالىپ، 1986 جىلى گەنەرال-مايور اتاعى بەرىلدى.
اكەسى دۇيسەنبى ومبىداعى كادەت كورپۋسىندا وقىپ، اسكەري فەلدشەر ماماندىعىن العان سوڭ جارما، كوكپەكتى اۋداندارىندا جاپپاي ەمدەۋ ءىسىن ۇيىمداستىرىپ، جەرگىلىكتى تۇرعىنداردى جۇقپالى شەشەك، وبا اۋرۋلارىنان ساقتاپ قالۋعا كوپ ەڭبەك سىڭىرگەن. شوپتەن ءدارى جاساپ، ءدارىحانا اشقان، سۋى مەن باتپاعىنىڭ ەمدىك قاسيەتى كۇشتى كولدى تاۋىپ، ساناتورييلىك ەمدەۋدى ۇيىمداستىرعان. سول «دۇيسەنبى كولى» قازىرگى ۋاقىتتا دا حالىق ەمدەۋ ىسىنە پايدالانىلىپ كەلەدى.
قالماتايەۆ 1959 جىلى قازمۋ (قازىرگى قازاق ۇلتتىق ۋنيۆەرسيتەتى)، 1967 جىلى الماتى جوعارى پارتيا مەكتەبىن بىتىرگەن. 1959-65 جىلدارى سەمەي وبلىسى كوكپەكتى اۋدانى كومسومول كوميتەتىنىڭ 1-حاتشىسى، وسىنداعى اۋداندىق «جۇلدىز» گازەتىنىڭ رەداكتورى بولدى. 1967-75 جىلى سەمەي وبلىسى پارتيا كوميتەتىندە نۇسقاۋشى، پارتيالىق-ۇيىمداستىرۋ ءبولىمى مەڭگەرۋشىسىنىڭ ورىنباسارى (1967-75)، قازاقستان كپ وك-نىڭ ينسپەكتورى (1975-80)، ورال وبلىسى پارتيا كوميتەتىنىڭ حاتشىسى (1980-83) قىزمەتتەرىن اتقاردى. 1983 جىلى رەسپۋبليكا ءىىم-نىڭ جاڭادان ۇيىمداستىرىلعان ساياسي ءبولىمىنىڭ باستىعى بولىپ تاعايىندالىپ، 1986 جىلعى قاراشادا گەنەرال-مايور اتاعى بەرىلدى. قالماتايەۆتىڭ ازاماتتىق تۇلعاسى وسى جىلعى جەلتوقسان ايىنداالماتىدا ءوتىپ، كەڭەس وداعىنىڭ امىرشىل-اكىمشىل باسقارۋ جۇيەسىن، وتارشىل يمپەريانىڭ شاڭىراعىن شايقالتقان وقيعالار كەزىندە ايقىن كورىندى. ول كوتەرىلىسشى جاستار جاعىنا اشىق پەيىل تانىتىپ، جازالاۋشى وتريادتاردىڭ قيمىلدارىن تەجەۋگە، جاراقات العان قىزدار مەن جىگىتتەرگە مەديسينالىق كومەك ۇيىمداستىرۋعا بارىنشا كۇش سالدى. رەسپۋبليكا باس پروكۋرورىنا، قازاقستان كپ وك-نىڭ 2-حاتشىسىنا كىرىپ، الاڭدا «زاڭسىزدىققا جول بەرىلىپ جاتقانىن» ايتىپ، بۇل تاعىلىقتى توقتاتۋدى تالاپ ەتتى. ادىلدىك جولىنداعى وسى زاڭدى ارەكەتتەرى ءۇشىن «ءوز قىزمەتىنە لايىقسىز ادام» رەتىندە دەرەۋ اۋعانستان سوعىسىنا جونەلتىلدى. قالماتايەۆ 1988-89 جىلدارى اۋعانستان سوعىسىندا بىرنەشە جاۋاپتى وپەراسيالارعا قاتىسىپ، باسشىلىق ەتتى. مايداننان امان-ەسەن ەلگە ورالىپ، سەمەي وبلىسى ىشكى ىستەر باسقارماسىن باسقاردى (1989-94). 1995 جىلى ق ر ءىىم-نىڭ كەڭەسشىسى بولىپ تاعايىندالدى. قالماتايەۆ 12-13 سايلانعان قازاقستان جوعارعى كەڭەسىنىڭ دەپۋتاتى بولىپ سايلانىپ، قۇقىقتىق رەفورما جانە زاڭدىلىق جونىندەگى كوميتەتتىڭ ءتوراعاسى بولدى. ءىىم-نىڭ ەڭبەك سىڭىرگەن قىزمەتكەرى، «قۇرمەت بەلگىسى»، «قىزىل جۇلدىز»، «حالىقتار دوستىعى»، «وتان كۇزەتىندە» وردەندەرىمەن، 8 كسرو جانە شەتەل مەدالدارىمەن ماراپاتتالعان.
