تالعار اۋرۋحاناسىندا جاتقان پروديۋسەر بايان ەسەنتايەۆانىڭ دەنساۋلىق جاعدايى جاقسارىپ كەلەدى، - دەپ حابارلايدى Qamshy.kz.

دەنساۋلىعى جاقسارعانىمەن ب. ەسەنتايەۆا جانساقتاۋ بولىمىنەن ادەتتەگى پالاتاعا اۋىستىرمايدى. دارىگەرلەر مۇنداي شەشىمگە پروديۋسەردى ارتىق مازالاۋشىلاردان قورعاۋ ءۇشىن بارىپتى.

«سىندارلى كەزەڭ ارتتا قالدى. دەنساۋلىق قالپىنا كەلۋگە بەت الدى. ناۋقاس ءوزىن جاقسى سەزىنەدى. تۇرىپ، پالاتا ىشىندە ءجۇرىپ ءجۇر. سەنبى كۇنى شىعارىپ قالۋىمىز مۇمكىن»، - دەيدى تالعار اۋداندىق اۋرۋحاناسى ديرەكتورىنىڭ ەمدەۋ ءىسى جونىندەگى ورىنباسارى ەربول سارسەنبايەۆ.

«ول وتە مىقتى ايەل ەكەن. مىناداي جاراقاتتى ەرىك، جىگەرىنىڭ كۇشتىلىگىمەن جەڭىپ شىقتى. ەشتەڭەگە شاعىمدانعان جوق»، - دەيدى ە. سارسەنبايەۆ ناۋقاستىڭ جاعدايىن ايتا كەلە.

الايدا، اۋرۋحانادان شىققان بايان ەسەنتايەۆانىڭ دەنساۋلىعى ءبىرجولا جاقسارىپ، جاراقاتىنان ايىعىپ كەتتى دەۋگە بولمايدى. الماتى وبلىستىق دەنساۋلىقساقتاۋ باسقارماسىنداعىلار اۋرۋحانادان شىققان سوڭ پروديۋسەردىڭ ەم قابىلداۋدى باسقا مەكەمەدە جالعاستىراتىنىن ايتىپ وتىر.

ەستەرىڭىزگە سالساق، 10 ماۋسىم كۇنى پروديۋسەر سوققىعا جىعىلىپ، اۋرۋحاناعا تۇسكەن بولاتىن. پوليسيا نەگىزگى كۇدىكتى رەتىندە سول كۇنى ونىڭ كۇيەۋى باقىتبەك ەسەنتايەۆتى قاماۋعا الدى. وعان ءقازىر قاساقانا كىسى ولتىرمەك بولدى دەگەن ايىپ تاعىلۋدا.