قاراعاندى وبلىسىنىڭ اكىمدىگى ءسىبىر جاراسىن جۇقتىردى دەگەن كۇدىكپەن وبلىستىق اۋرۋحاناعا تۇسكەن اۋىل تۇرعىندارىنىڭ سىرقاتى جايلى تولىعىراق ايتىپ بەردى، - دەپ حابارلايدى Qamshy.kz BNews.kz – كە سىلتەمە جاساپ.

بيىلعى ماۋسىمنىڭ 16ء-سى كۇنى قاراعاندى وبلىسىنىڭ شەت اۋدانىنداعى ۋسپەن سەلولىق وكرۋگىنە قارايتىن ەركىندىك اۋىلىنىڭ تۇرعىنى ءىرى قارا مالدىڭ اۋىرىپ تۇرعانى تۋرالى اۋىلدىڭ مال دارىگەرىنە حابارلاعان. ارادا ەكى كۇن وتكەن سوڭ، مال دارىگەرلەرىن ەسكەرتپەستەن، يەسى جەم-شوپ جەمەي قويعان مالىن سويىپ، ەتىن كورشىلەرىنە ساتقان.

«ەت ساتىپ العان سول اۋىلدىڭ ەكى تۇرعىنى قولدارىنا ءتۇرلى جارا جىعىپ، اۋرۋحاناعا جاتقىزىلعان. اعادىر كەنتىندەگى اۋرۋحانا دارىگەرلەرىنىڭ مالىمەتتەرى بويىنشا، الدىن الا «ءسىبىر جاراسى» دەگەن دياگنوز قويىلىپ، وبلىستىق ۆەتەرينارلىق ينسپەكسياعا، ۆەتەرينارلىق باسقارماعا حابار بەرىلگەن"، – دەپ ءمالىم ەتتى وبلىس اكىمدىگى باسپا ءسوز قىزمەتىنىڭ وكىلى ولگا كابارگينا.

19 ماۋسىم كۇنى اۋداندىق اۋماقتىق ينسپەكسيا وكىلدەرى شەت اۋدانىنىڭ ۆەتەريناريا جانە ۆەتەرينارلىق ستانساسىنىڭ وكىلدەرىمەن بىرلەسىپ، ەپيزووتولوگيالىق زەرتتەۋ جۇرگىزگەن.

«سويىلعان مالدىڭ ەتىنەن، ىشەك-قارنىنان سىناما الىنىپ، 20 ماۋسىم كۇنى «رەسپۋبليكالىق ۆەتەرينارلىق زەرتحانا» رمك-نىڭ قاراعاندى وبلىستىق فيليالىنا جانە 21 ماۋسىمدا «ۇلتتىق ۆەتەريناريا جونىندەگى رەفەرەنتتىك ورتالىعى» رمك-عا جولدانعان»، – دەپ حاباردار ەتتى باسپا ءسوز قىزمەتى.

بۇگىنگى كۇنى قاراعاندى وبلىسىنىڭ جەرگىلىكتى اتقارۋشى ورگاندارىمەن، تۇتىنۋشىلار قۇقىعىن قورعاۋ دەپارتامەنتى جانە ۆەتەرينارلىق باقىلاۋ جانە قاداعالاۋ كوميتەتىنىڭ وبلىستىق اۋماقتىق ينسپەكسياسىمەن بىرلەسىپ ارنايى شتاب قۇرىلىپ وتىر. ول ءقازىر ايماقتاعى جاعدايدى قاتاڭ باقىلاۋعا الدى.

ەستەرىڭىزگە سالا كەتەيىك، قاراعاندى وبلىسىنىڭ اۋماقتىق ينسپەكسياسىنىڭ مالىمەتتەرى بويىنشا، 20-21 ماۋسىمدا وبلىستىق ينفەكسيالىق اۋرۋحاناسىنا جەتى ادام جاتقىزىلدى، اراسىندا بالا دا بار. سولاردىڭ ەكەۋى: ەر ادام جانە ايەل قايتىس بولدى. اتالعان ەلدى مەكەندە زالالسىزداندىرۋ جۇمىستارى جۇرگىزىلىپ جاتىر. «ءسىبىر جاراسى» دياگنوزىن زەرتحانا ءازىر راستاعان جوق.