بۇگىن 2017 جىلى وتەتىن ۋنيۆەرسياداعا دايىندىق جانە وتكىزۋ ديرەكسياسىنىڭ  باسشىسى نايل نۋروۆ ب ا ق وكىلدەرىمەن كەزدەسۋ بارىسىندا الماتى قالاسى 64 ەلدىڭ سپورتشىلارى مەن دەلەگاتتارىن ەركىن قابىلداي الاتىنىن، الايدا، ءىس جۇزىندە 50 ەلدىڭ سپورتشىسى الماتىعا كەلۋى مۇمكىن ەكەنىن جاسىرمادى، - دەپ حابارلايدى Qamshy.kz

«ءبىز الماتىنى ۋنيۆەرسيادا كەزىندە 64 ەلدى قابىلداي الادى دەپ ايتا الامىز. بۇل ماكسيمالدى كورسەتكىش. بۇگىنگى ءبىزدىڭ اتلەتتەر قالاشىعى، سپورتتىق نىساندار، ترانسپورت،  لوگيستيكالىق مۇمكىندىكتەرىمىز 64 ەلدىڭ 5000-عا جۋىق سپورتشىسىن قابىلداۋعا مۇمكىندىگى جەتەدى»، - دەدى نايل نۋروۆ.

كەزدەسۋ بارىسىندا نايل نۋروۆ وسىعان دەيىنگى رەكوردتىق كورسەتكىش ەرزۋرۋم قالاسىندا تىركەلگەنىن ايتىپ ءوتتى. ەرزۋرۋمدە 52 ەل ۋنيۆەرسياداعا قاتىسقان بولاتىن.

«ويىندار ەۋروپادا وتكەن كەزدە لوگيستيكانى جەڭىلدەتەتىنى انىق. ەۋروپادا ۋنيۆەرسياداعا قاتىسپايتىن ەل جوق. ءبىز ەرزۋرۋمنىڭ رەكوردىن بۇزۋعا تالپىندىق. ءبىراق بۇگىنگى كۇنى الەمدە ەكونوميكالىق قيىن جاعدايلاردىڭ ورىن الۋى ارمانىمىزدىىڭ ورىندالۋىنا كەدەرگى بولدى. بىزگە 64 ەلدەن ەمەس، 50 ەلدىڭ سپورتشىلارى كەلۋى مۇمكىن دەپ جوبالاپ وتىرمىز. ءبىراق تىركەلۋ جۇمىستارى ءالى اياقتالمادى. جىل سوڭىنا دەيىن بىزدە ءالى ۋاقىت بار»، - دەپ حابارلادى 2017 جىلعى قىسقى ۋنيۆەرسيادا ديرەكسياسىنىڭ باسشىسى.

سونىمەن قاتار نايل نۋروۆ، ۇلتتىق ستۋدەنتتەر سپورتى فەدەراسيالارىنىڭ ۋنيۆەرسياداعا قاتىسۋىن قامتاماسىز ەتۋ حالىقارالىق ستۋدەنتتەر سپورتى وداعىنىڭ (FISU)قاراۋىندا ەكەنىن دە ايتىپ ءوتتى.  «ءبىز وسى سۇراق بويىنشا FISU كومەگىنە جانە قازاقستان ۇلتتىق سپورتتىق ستۋدەنتتەر وداعىنىڭ كومەگىنە جۇگىنەمىز»، - دەپ ءسوزىن اياقتادى نايل نۋروۆ.

بەلگىلى بولعانداي، FISU رەگلامەنتى بويىنشا قاتىسۋعا مۇمكىندىك بەرەتىن اككرەديتاسياعا ءوتىنىش جىبەرۋ 2016 جىلدىڭ 29-قاڭتارىنان 2017 جىلدىڭ 29-قاڭتارىنا دەيىن جالعاسادى.

ايتا كەتەيىك، ۋنيۆەرسياداعا اككرەيتاسيالانۋدىڭ ءبىرىنشى كەزەڭىندە 64 ەل قاتىسۋعا ءوتىنىش بىلدىرگەن بولاتىن. ەكىنشى كەزەڭدە قاتىسۋشى ەل كوماندا ءتىزىمى مەن سپورت تۇرلەرى جانە سپورتشىلار مەن رەسمي ادامداردىڭ ناقتى سانىن ناقتىلاۋى ءتيىس.