قاراعاندىداعى ەركىندىك اۋىلى تۇتاسىمەن قورشاۋعا الىنىپ، كارانتين جاريالاندى. ويتكەنى، ەكى ادامنىڭ ءسىبىر جاراسىنان قايتىس بولعانى راستالىپ وتىر، - دەپ حابارلايدى Qamshy.kz 31 ارناعا سىلتەمە جاساپ.

سيىر ەتىنە جاسالعان العاشقى ساراپتاما قورىتىندىسى وسىنداي بولدى. ءبىراق ۇمىتتەرىن ۇزبەگەن وبلىس باسشىلارى ءالى دە استانادان كەلگەن مامانداردىڭ جاۋابىن كۇتەمىز دەيدى. ءقازىر اۋىلعا سىرتتان ادام كىرگىزىلمەي، جانە ىشتەن شىعارىلماي جاتىر.

قايتىس بولعان 33 جاستاعى ايگۇل احمەتوۆا سول كۇنى ءسىبىر جاراسىن جۇقتىرعان سيىر ەتىن تۋراعان دەيدى جاقىندارى. تۋىستارىنىڭ بايقاۋسىزدا قولىن پىشاقپەن كەسىپ العان ايەلگە ءقاۋىپتى ىندەت سول كەزدە جۇعىپ كەتۋى مۇمكىن دەگەن كۇدىكتەرى باسىم. كوز جۇمعان جاقىندارىن تابىتپەن جەرلەيتىندەرىنە دە كونگەن جاقىندارى مايىتتەردىڭ ءالى جەتكىزىلمەگەنىنە اشىنادى.

عابيدەن احمەتوۆ، مارقۇم ايگۇل احمەتوۆانىڭ اكەسى:

 -ول بالانىڭ دەنەسى بولمايدى، پراح قانا بولادى. نو ۆسە تاكي سونىڭ ءوزىن بەرمەي جاتىر عوي. قانداي شارۋا ول؟!

بەلگىسىز ىندەتتىڭ وشاعى شىققان ەركىندىك اۋىلىنا كىرۋ قيىن. ەلدى مەكەن كىرەبەرىسىندە جەرگىلىكتى جاۋاپتىلارمەن بىرگە، ارنايى قۇرىلعان كوميسسيا مەن ەپيدەميولوگتار جۇمىس اتقارۋدا. 

مەيىرجان اقجانوۆ، جەتەكشى مامان:

-ىشكە كىرگەن ماشينا سىرتقا شىققان ماشينا دا. ينفەكسيا تاراماس ءۇشىن. كەۋىپ كەتپەس ءۇشىن سۋ سەۋىپ تۇرامىز.

شەكتەۋ جاريالانعالى بەرى اۋىلعا كىرۋدى ايتپاعاندا، شىعۋدىڭ ءوزى مۇڭ. جاقىندارىنان ايىرىلعان ەكى بىردەي وتباسىنا ادامدار كوڭىلدى  ۇيدە ەمەس، دالادا ايتۋعا ءماجبۇر. ءتىپتى، مارقۇمداردىڭ دەنەلەرىنىڭ كۇلىن دە سىرتقا شىعارۋدان وزگە امالىمىز جوق دەيدى.    

ەركىندىك اۋىلىنىڭ اتقامىنەرلەرى 50 شاقىرىم جەرگە دەيىن شەكتەۋدى كەشە كەشكى ساعات التىدان باستاپ جاريالادى. جەرگىلىكتى اتقامىنەرلەر اۋىلدان ەشكىمنىڭ كىرىپ-شىقپايتىنىن قاتاڭ باقىلايدى. مۇنداعى ەت، ءسۇت ونىمدەرىنىڭ ساۋداعا قويىلۋىنا دا تىيىم سالىندى.

مۇحيت مۇحتاروۆ، شەت اۋدانى اكىمىنىڭ ورىنباسارى:

- تۇرعىندارمەن ءتۇسىندىرۋ جۇمىستارى جۇرگىزىلدى. دۆوروۆىي وبحود ءۇش مارتە جاسالىپ وتىر. ول جاڭاعى مەديسينا، ۆەتسلۋجبانىڭ تاراپىنان.

ەمحاناعا تۇسكەن توعىز ناۋقاستان ءسىبىر جاراسىنىڭ بەلگىلەرى انىقتالعانىن وبلىستىڭ شەنەۋنىكتەرى دە راستاپ وتىر. ءبىراق سوڭعى دياگنوز تەك  رەسپۋبليكالىق مامانداردىڭ جاۋابىنان سوڭ قويىلادى دەيدى.

شاگۋراشيد مامالينوۆ، قاراعاندى وبلىسى اكىمىنىڭ اۋىلشارۋاشىلىق جۇمىستارى بويىنشا ورىنباسارى:

-قورىتىندى ناتيجەسىن قولىمىزعا ەرتەڭ الامىز دەگەن ۇمىتتەمىن. ءبىراق ءبىرىنشى ساراپتاما قورىتىندىسى ءسىبىر جاراسىن كورسەتىپ تۇر. ازىرگە اتالمىش ەلدىمەكەندە الدىن الۋ جۇمىستارىن اتقارىپ جاتىرمىز.

ءبىراق قايعى جۇتقان ەركىندىكتەگىلەر شەندىلەردىڭ سوزىنە يلانبايدى. اۋىلدان شىعا الماي بەينەجازبانى ۋاتساپ ارقىلى جىبەرگەن حالىق كەسەلگە قارسى ەكپەلەر بارلىعىنا بىردەي جاسالماعانىن ايتادى. 

ازىرگە قاراعاندىدان 200 شاقىرىمداي جەردەگى ەركىندىك اۋىلىنا كارانتين 15 كۇنگە قويىلدى. ءبىراق كەسەل راستالسا، شەنەۋنىكتەر ۋاقىتىن ۇزارتامىز دەپ وتىر.

ال ءقازىر وبلىستىق جۇقپالى اۋرۋلار اۋرۋحاناسىندا ءسىبىر جاراسىنا قارسى ەمدى  كاجكەنوۆ ج.س. - 1968 ج.، بيسەنبايەۆا م.ت. - 1971 ج.، بوقايەۆا گ.س. - 1973 ج.، سيازباي ن.ك. - 1992 ج.، مۇحامەدجانوۆ م.س.، - 2006 ج. مەن باقاي س.س. - 1963 ج. الىپ جاتقانى بەلگىلى. ال قايتىس بولعان كاكەن قاجكەنوۆ پەن ايگۇل احمەتوۆانىڭ جەرلەۋى ەرتەڭ تۋعان اۋىلدارىندا وتەدى.