شەگىرتكەنىڭ قاپتاۋىن وسى كەزگە دەيىن تابيعاتقا جاۋىپ كەلگەن شەنەۋنىكتەر ەندى شىن كىنالىلەردى اتاي باستادى، - دەپ حابارلايدى Qamshy.kz كتك ارناسىنا سىلتەمە جاساپ. 

زيانكەستەردىڭ جاپپاي كوبەيۋىنە اۋىل شارۋاشىلىعى مينيسترلىگى ماماندارىنىڭ مىڭداعان گەكتار جەرلەردى وڭدەۋ جوسپارىنا كىرگىزبەگەنى سەبەپ بولىپتى. شىمكەنتتىڭ شەندىلەرى بار اقشانى ۇقساتا المادى دەپ، كىنانى وزدەرىنە ارتقان مينيسترلىككە بۇگىن وسىلاي جاۋاپ قايتاردى.

ساپاربەك تۇياقباي، وقو اكىمىنىڭ ورىنباسارى:

-ازىرگە مىنا كوميسسيانىڭ الدىن-الا راستاعان دەرەكتەرىنە سايكەس 40 مىڭ گەكتارعا قاتەلەسكەن. 40 مىڭ گەكتار قامتىلماعان بولجام كەزىندە شەگىرتكە شىعۋى مۇمكىن دەگەن. وڭدەلمەگەن جەردەن شىعىپ وتىر ءبىرازى.  شاردارا، سارىاعاش، ارىستا 5 مامىردان  باستاپ بۇل كۇشەيە باستادى. ول كەزدە دە ەسكەرتۋ بەرىلدى. ءبىراق، حيميالىق وڭدەۋ ينسپەكسيا تاراپىنان وكىنىشكە وراي 17 مامىردان  كەيىن باستالعان.

القاپتارعا ءدارى شاشۋ كەش باستالعانىن ايتپاعاندا جۇمىس تا ءاتۇستى اتقارىلعان ەكەن. شەگىرتكەمەن كۇرەسۋ جۇمىستارىن جەڭىپ العان مەردىگەرلەردىڭ مۇمكىندىگى جەتپەگەن. ەسكى-قۇسقى تەحنيكامەن وڭدەپ جۇرگەن ولاردىڭ ارتىنان تەكسەرۋشىلەر دە بولماپتى. مىڭداعان گەكتار جەر وڭدەلمەي قالعانىن ەندى ارنايى قۇرىلعان كوميسسيا انىقتاپ وتىر. سالدارىنان كۇنگەيدىڭ 3 اۋدانىندا قاربىز ەككەن شارۋالاردىڭ ەڭبەگى زيانكەستەردىڭ جەمىنە اينالدى. وسى كۇنگە دەيىن شىعىن ماردىمسىز دەپ كەلگەن اتقامىنەرلەر ەندى كىنالىلەردى جاۋاپقا تارتامىز دەيدى.