تۇركيا باسىلىمدارى ەل پرەزيدەنتى ەرەجەپ تايىپ ەردوعاندى ءبىرقاتار ونەر قايراتكەرىمەن بىرگە الەمگە تانىمال ءترانسۆيستيتتى دە اۋىزاشارعا شاقىرىپ، بىرگە تاماقتاندى دەپ ايىپتاپ وتىر. بۇل تۋرالى Qamshy.kz حابارلايدى.

پرەزيدەنت وتباسى بەرگەن اۋىزاشارعا كەلگەندەر ىشىندە 80-جىلدارى جىنىسىن ايەل دەپ اۋىستىرعان بيۋلەنت ەرسوي دا بولعان. ءتىپتى، پرەزيدەنت وتباسىمەن ءبىر داستارحاندا وتىرعان.

اۋىزاشارعا جينالعاندارعا ە. ەردوعاننىڭ ءوزى: «شىندىعىندا ونەر ادامدارى مەن ارتىستەر ەلىمىزدىڭ مادەني قۋاتى بولىپ وتىر. سىزدەرگە ەلىمىزدى حالىقارالىق قاۋىمداستىق الدىندا ودان ءارى ابىرويلى ەتۋدى تىلەيمىن»، - دەگەن تىلەك بىلدىرگەن.

حالىقارالىق باسىلىمدار تاڭقالارلىق وقيعاعا سەبەپ بولعان بيۋلەنت ەرسوي 1980 جىلدارعا دەيىن ەركەك بولعانىن جازادى. ونەر ساحناسىندا 1971 جىلى العاشقى البومىن جازىپ، ءۇش جىلدان سوڭ تۇڭعىش كونسەرتىن بەرگەن.

1980 جىلى ول لوندوندا حيرۋرگيالىق وتا جاساتىپ، جىنىسىن ايەلگە وزگەرتتى.  الايدا، ەرلەردىڭ ەسىمى بولىپ تابىلاتىن بيۋلەنت اتىن ساقتاپ قالدى. كەيىن ول ەل ۇكىمەتى سالعان تىيىمعا بايلانىستى گەرمانيادا تۇرۋعا ءماجبۇر بولدى. تەك تۇرعىت وزال بيلىك ەتكەن تۇستاعى زاڭنامالاردىڭ بوساڭدىعىن پايدالانىپ، قۇجاتتارىن قايتا راسىمدەگەن.

وسى كۇنگە دەيىن ەرسوي 30 شاقتى البوم جازىپ، 10 فيلمگە تۇسكەن.

بيۋلەنت سونداي-اق، شوۋ-بيزنەس وكىلدەرى اراسىندا ءبىر وتىرىستا ون ەكى گامبۋرگەردى ءبىر-اق جەيتىن ەرەكشە قوماعايلىعىمەن دە اتى شىققان.

ترانسۆيستيتپەن تاباقتاس بولعان تۇركيا باسشىسىنىڭ ارەكەتىن اركىم ءارتۇرلى باعالاۋدا. بىرەۋلەر ەردوعاندى يسلام قۇندىلىقتارى مەن ۇلتتىق داستۇرگە ساتقىندىق جاسادى دەپ ايىپتاسا، ەندى ءبىرى باتىس الەمى مەن اقش-قا ءوزىن ادام قۇقىقتارى مەن بوستاندىقتارىنا قول سۇقپايتىن دەموكراتياشىل ساياساتكەر ەتىپ كورسەتپەك دەيدى.

ءبىر قىزىعى ب. ەرسوي ءبىر توپ ارىپتەستەرىمەن بىلتىر قازان ايىندا دا ەردوعاننىڭ قابىلداۋىندا بولعان.