مەملەكەت باسشىسى نۇرسۇلتان نازاربايەۆ جۇڭگو حالىق رەسپۋبليكاسىنىڭ ءتوراعاسى سي سزينپينمەن كەزدەستى، - دەپ حابارلايدى Qamshy.kz اقورداعا سىلتەمە جاساپ.

كەزدەسۋ بارىسىندا نۇرسۇلتان نازاربايەۆ پەن سي سزينپين ەكىجاقتى ىنتىماقتاستىقتى دامىتۋعا قاتىستى، ونىڭ ىشىندە ساۋدا-ەكونوميكالىق، ينۆەستيسيالىق، وتىن-ەنەرگەتيكالىق، ترانزيت-كولىك جانە مادەني-گۋمانيتارلىق سالالارداعى كەڭ اۋقىمدى ماسەلەلەردى تالقىلادى.

سونداي-اق مەملەكەتتەر باسشىلارى ەكى ەلدىڭ شانحاي ىنتىماقتاستىق ۇيىمى اياسىنداعى ءوزارا ءىس-قيمىلىنىڭ نەگىزگى باعىتتارىن قاراستىرىپ، وڭىرلىك جانە حالىقارالىق كۇن تارتىبىندەگى ءبىرقاتار جايتتار جونىندە پىكىر الماستى.

قازاقستان پرەزيدەنتى نۇرسۇلتان نازاربايەۆ سي ءسزينپيندى جۇڭگو كوممۋنيستىك پارتياسىنىڭ قۇرىلعانىنا 95 جىل تولۋىمەن قۇتتىقتادى. پارتيانىڭ كوشباسشىلىعىمەن جۇڭگو حالقى بۇگىنگىدەي بيىكتەرگە جەتىپ، ەلدى الەمنىڭ ەڭ دامىعان مەملەكەتتەرىنىڭ قاتارىنا قوسۋ مىندەتىن العا قويىپ وتىرعانىن اتاپ ءوتتى.

سي سزينپين تاۋەلسىزدىك جىلدارى قازاقستان نۇرسۇلتان نازاربايەۆتىڭ باسشىلىعىمەن الەمدىك ساياسي ۇدەرىستەرگە بەلسەنە قاتىسىپ، ەگەمەندى دامۋ مەن الەۋمەتتىك-ەكونوميكالىق رەفورمالار جولىندا ەلەۋلى تابىستارعا جەتكەنىن اتاپ ءوتتى. سونداي-اق قحر ءتوراعاسى قازاقستاننىڭ استانادا ەكسپو-2017 حالىقارالىق كورمەسىن وتكىزۋ جونىندەگى باستاماسىنا قولداۋ ءبىلدىردى.

اڭگىمەلەسۋ بارىسىندا تاراپتار كولىك جانە كوممۋنيكاسيا سالاسىنداعى ەكىجاقتى ىنتىماقتاستىق الەۋەتىنىڭ جوعارى ەكەنىنە نازار اۋدارىپ، «نۇرلى جول» جانە «جىبەك جولىنىڭ ەكونوميكالىق بەلدەۋى» باعدارلامالارىنىڭ ءبىر-بىرىن ءوزارا تولىقتىرىپ تۇراتىنىنا توقتالىپ ءوتتى. سونداي-اق ەكى ەل اۋماعى ارقىلى وتەتىن كولىك دالىزدەرىن ودان ءارى نىعايتۋ جانە دامىتۋ قاجەتتىگى ايتىلدى.

بۇدان بولەك، نۇرسۇلتان نازاربايەۆ پەن سي سزينپين قازاقستان مەن جۇڭگو اراسىنداعى تاۋار اينالىمىن جاڭا ساپالى دەڭگەيگە كوتەرىپ، ونىڭ كولەمىن ۇلعايتۋعا نيەتتى ەكەندىكتەرىن ءبىلدىردى. ەكى مەملەكەتتىڭ كوشباسشىلارى اگروونەركاسىپ سالاسىنداعى ۇزاق مەرزىمگە ارنالعان سەرىكتەستىكتى ودان ءارى نىعايتۋ جونىندە ۋاعدالاستىققا قول جەتكىزدى.

ەستەرىڭىزگە سالساق، وزبەكستاندا شانحاي ىنتىماقتاستىق ۇيىمى ەلدەرى باسشىلارىنىڭ باس قوسۋى وتۋدە.