كانادالىق جۋرناليست، جازۋشى جانە ءوتىمدى كىتاپتاردىڭ اۆتورى مالكولم گلادۋەل- Malcolm Gladwell «عاجايىپ توپ» (Outliers) اتتى كىتابىندا، دۇنيەگە تانىمال تابىسكەرلەردىڭ تابىسقا جەتۋ بارىسىنداعى قۇلشىنىستارىن باسقا ءبىر قىرىنان بايانداي كەلىپ، تابىسقا جەتۋدەگى «10 مىڭ ساعات» تەورەماسىن ورتاعا قويادى. ياعني، تالانت يەلەرى تۋما تالانت ەمەس، ءبىراق، تالانت يەلەرىنىڭ وقساس ءبىر قاسيەتى، ناتيجەلى تابىسقا جەتۋ ءۇشىن، وقساس ءبىر سالادا تۇراقتى، جالعاستى تۇردە ىزدەنۋى، قاجىرلى قۇلشىنىسى كەمىندە 10 مىڭ ساعاتتان كەم بولماعان. دەمەك، تابىسقا جەتۋ ءۇشىن، سول سالادا مىندەتتى تۇردە 10 مىڭ ساعاتتىق قاجىرلى ماشىقتانۋ، ىزدەۋ، قۇلشىنىس جاساۋ كەرەك.
10 مىڭ ساعات قانداي ۋاقىت؟! ەسەپتەپ كورەتىن بولساق، ەگەر دە كۇنىنە 8 ساعاتتى قاجىرلى ماشىقتانۋعا جۇمسار بولساڭىز، وندا مولشەرمەن 3 جىلدان ارتىق ۋاقىت. بۇل مۇمكىن شارۋا ەمەس! ەگەر دە كۇنىنە 3 ساعات ۋاقىتتى جۇمسار بولساڭىز، وندا 10 مىڭ ساعات ۋاقىتىڭىز، مولشەرمەن 10 جىل ۋاقىت. بۇل تەورەمانى ونەر-بىلىمدى جىلدام ۇيرەنىپ، بىلىمگە بولعان ىنتاسى ءار جەتى كۇندە ءبىر قۇبىلىپ تۇراتىن وقۋشىلارىما ارنايمىن جانە دە اقىلماندارعا شىنايى ىلتيپاتپەن سىيلايمىن. ويتكەنى، ءار كۇنى 3 ساعات ۋاقىتتى شىنايى ۇيرەنىپ، قاجىرلى ماشىقتانۋ، اقىلعا قونىمدى، تۇرمىسقا ۇيلەسىمدى، شىندىققا جاناسىمدى دەي تۇرعانمەن، تۇراقتى جانە ۇزدىكسىز تۇردە 10 جىل جالعاستىرۋ كىمدە-كىمنىڭ قولىنان كەلە بەرمەيدى. بۇل جاپاعا شىداي العان ادام – وزىڭە جاي ادامسىڭ، باسقالارعا دارىندى، تالانت يەسى اتانسىڭ، ءتىپتى ەلدىڭ ەرى، حالىقتىڭ ارقا سۇيەر تىرگى بولاسىڭ. بولماسا، بۇل باسقىشتان وتپەي تۇرىپ، وزىڭدى ءوزىڭ جولبارىستاي سەزىنگەنىڭمەن، وزگەلەرگە مىسىق قۇرلىدا بولمايسىڭ. ءبارى دە بوس، قۇر دالباسالىق.
