ماۋسىم ايىنىڭ ورتاسىندا اقش ۇكىمەتى ءۇندىستانعا ءتۇرلى تاريحي كەزەڭدەردە زاڭسىز اكەتىلگەن ەكى جۇزدەن استام مادەني جادىگەردى قايتاردى، - دەپ حابارلايدى Qamshy.kz «PTI» اگەنتتىگىنە سىلتەمە جاساپ.

بۇل مۇرالار ءۇندىستان پرەمەر-مينيسترى نارەندرا ءموديدىڭ اقش-قا ساپارى كەزىندە تاپسىرىلعان. اسا قۇندى تاريحي زاتتاردىڭ كوبىسى 2000 جىل بۇرىنعى زامانعا جاتادى. كەيبىر جادىگەرلەردىڭ قۇنى 1،5 ميلليون دوللاردان اسادى ەكەن. بۇل زاتتار تاريحتىڭ اۋمالى-توكپەلى كەزەڭدەرىندە ۇرلانىپ، اقش-تاعى قارا بازاردا ساۋداعا قويىلعان جەرىنەن قۇقىق قورعاۋ ورگاندارى قىزمەتكەرلەرىنىڭ قولىنا تۇسكەن. قازىرگى كەزدە باعالى تاريحي زاتتاردىڭ ون ەكىسى ءۇندىستاندا كوپشىلىكتىڭ تاماشالۋى ءۇشىن ارنايى كورمەگە قويىلعان.

اقش وسىنداي جولمەن  ءوز اۋماعىنداعى جات جۇرتقا تيەسىلى مۇرالاردىڭ بارلىعىن قايتارا ما؟ مىسالى، اقش مۇراجايلارىندا يراكتىڭ 90 مىڭ جادىگەرى بار ەكەن. 2013 جىلى يراكتىڭ شۋمەر، ۆاۆيلون داۋىرىنە تيەسىلى 10 مىڭ كونە زاتى اقش-تىڭ كورنەل ۋنيۆەرسيتەتىنە بەرىلگەن. يراكتىڭ تۋريزم جانە تاريح جونىندەگى مينيسترلىگى 2003-2004 جىلدار ارالىعىندا 130 مىڭ تاريحي جادىگەردىڭ زاڭسىز اكەتىلگەنىن مالىمدەدى. ال ماماندار ۇرلانعان جادىگەرلەردىڭ سانى 200 مىڭنان اسۋى مۇمكىن دەگەن بولجام ايتۋدا.

وسىندايدا، شەت ەلگە كەتكەن ورتا ازيالىق مۇرالاردى دا ىزدەيتىن ۋاقىت جەتتى-اۋ دەگەن وي كەلەدى.

دانا قامشىبەك