29 ماۋسىم 2016 جىلى قازاق سپورت جانە تۋريزم اكادەمياسىندا برازيليانىڭ  گويانيا قالاسىندا 3-10 شىلدە ارالىعىندا وتەتىن  فۋتزالدان ستۋدەنتتەر اراسىنداعى الەم چەمپيوناتىنا قاتىسۋشىلاردى شىعارىپ سالۋ ءراسىمى ءوتتى، - دەپ حابارلايدى Qamshy.kz.  

بۇل چەمپيونات ەكى جىلدا ءبىر بولادى. ەڭ العاش 1984 جىلى حالىقارالىق ستۋدەنتتىك سپورت فەدەراسياسىنىڭ (FISU) قولداۋىمەن وتكەن بولاتىن. 2008 جىلدان باستاپ قىزداردا قاتىساتىن بولدى. وسى  جىلى اتالعان چەمپيوناتقا جيىرمادان استام كوماندا قاتىسادى، ولاردىڭ اراسىندا ءبىزدىڭ قىزداردان جانە ەرلەردەن قۇرالعان ەكى كوماندا بار. ويىندار برازيليانىڭ  گويانيا قالاسىندا وتپەك. چەمپيونات اياقتالىسىمەن ارنايى FISUدىڭ تۋىن قازاقستانعا بەرۋ ءراسىمى وتەدى. 2018 جىلى فۋتزالدان ستۋدەنتتىك كوماندالار اراسىنداعى  الەم چەمپيوناتى الماتىدا وتپەك. الماتى – فۋتزالدان 2018 جىلعى الەم چەمپيوناتىن وتكىزۋ جونىندەگى جەرەبەدە جەڭىس تۇعىرىنان كورىندى. ستۋدەنتتەر اراسىندا فۋتزال­دان الەم چەمپيوناتىن وتكىزۋ جونىندەگى بايقاۋعا 8 مەملەكەت ۇسىنىس بەرىپ، ۇمىتكەرلەر اراسىندا الماتى جەڭىمپاز دەپ تانىلعان بولاتىن.  فۋتزالدان ۇلتتىق ستۋدەنتتىك ليگانىڭ دەڭگەيى جىلدان-جىلعا كوتەرىلىپ كەلەدى. جالپى العاندا، 2018 جىلى الماتىدا وتەتىن ستۋدەنتتىك كوماندالار اراسىنداعى فۋتزالدان الەم چەمپيوناتى ورتالىق ازيادا عانا ەمەس، تمد ەلدەرى تاريحىندا تۇڭعىش رەت وتكىزىلگەلى وتىرعان اۋقىمدى، ماڭىزى زور شارا.

شارا سوڭىندا ق ر ستۋدەنتتىك سپورت فەدەراسياسىنىڭ پرەزيدەنتى قايرات قايروللا ۇلى زاكيريانوۆ ەرلەر كومانداسىنىڭ كاپيتانىنا ەلىمىزدىڭ تۋىن تابىس ەتىپ، جەڭىسپەن ورالۋلارىن تىلەدى.