قازاقستان رەسپۋبليكاسى ىشكى ىستەر مينيسترلىگى شىراقبەك قابىلبايەۆ اتىنداعى قوستاناي اكادەمياسىنىڭ كۋرسانتتارى سەيىلدەمەدە جۇرگەندە دۇكەن توناعان ۇرىنى ۇستاپ الدى، - دەپ حابارلايدى Qamshy.kz اكادەميانىڭ باسپا ءسوز قىزمەتىنە سىلتەمە جاساپ.

اكادەميانىڭ 3 كۋرس كۋرسانتتارى پوليسيا كىشى سەرجانتى عالىمجان تۇرلىبايەۆ پەن پوليسيا قاتارىنداعى الجان گالييەۆ سەيىلدەمەدە ءجۇرىپ، اباي داڭعىلى، №12 ۇيدە ورنالاسقان «شەرحان» ازىق-تۇلىك دۇكەنى ساتۋشىسىنىڭ كومەككە شاقىرعان داۋىسىن ەستيدى. داۋىس شىققان جاققا قاراي جۇگىرىپ بارعان ولار، اتالعان دۇكەننەن ۇرلىق جاساپ، سىتىلا قاشقان ورتا جاستاعى قۇقىق بۇزۋشىنى بايقايدى جانە جەدەل ارەكەت ەتە وتىرىپ، كۇدىكتىنى قولعا تۇسىرەدى. ودان ءارى جەدەل باقىلاۋ ورتالىعىنىڭ «102» نومىرىنە حابارلاسىپ، قۇقىق بۇزۋشىنى قوستاناي قالاسى ءىىب قىزمەتكەرلەرىنە تاپسىرادى.

بۇل كۋرسانتتاردىڭ قابىلداعان انتتارىنا بەرىكتىگىن جانە كەز كەلگەن قۇقىق بۇزۋشىلىقتىڭ جولىن كەسۋگە دەگەن ىنتالارىنىڭ اسقاقتىعىن كورسەتتى. سونىمەن قاتار، ولار، تاڭداعان ماماندىقتارىنىڭ اسا قاۋىپتىلىگىنە قاراماستان، ءارقاشان ازاماتتاردىڭ قورعاۋشىسى ەكەندىكتەرىن جادىندا ۇستايتىنىن دالەلدەي ءبىلدى. كۋرسانتتاردىڭ كورسەتكەن كومەگىن قوستاناي وبلىسى ءىىد جانە شىراقبەك قابىلبايەۆ اتىنداعى قوستاناي اكادەمياسىنىڭ باسشىلىعى جوعارى دەڭگەيدە باعالاپ، ولاردى ماراپاتتاۋعا ۇسىندى.

ايدىڭ–كۇننىڭ امانىندا بەيبىت ءومىر كەشۋشىلەردىڭ قاۋىپسىزدىگىن قامتاماسىز ەتەمىن دەپ ويلاماعان ءبىزدىڭ كۋرسانتتار ايتارلىقتاي ەرلىك جاسادى. ەگەر ولار ايقايلاعان داۋىسقا ەلەڭ ەتپەي، ۇرىنى ۋاقىتىندا ۇستاماسا، ول ادام باسقا دا اۋىر قىلمىسقا بارار ما ەدى. جاس تا بولسا ەر جۇرەكتىك تانىتقان ءبىزدىڭ باتىرلارىمىزدىڭ ءبىرى عالىمجان تۇرلىبايەۆتان ءىستىڭ ءمان – جايى تۋرالى بايانداپ بەرۋىن سۇراعان ەدىك.

- عالىمجان بولعان ءىستى تولىقتاي بايانداپ بەرشى، وقىرمانعا تۇسىنىكتى بولسىن؟

- ءبىز، ءالجان ەكەۋىمىز، سەيىلدەمەگە شىعىپ، جاي اڭگىمەسەلىپ كەلە جاتقانبىز. ءبىر ۋاقىتتا ۇرىنى ۇستاڭىزدار، كومەكتەسىڭىزدەرشى!، - دەگەن بىزگە قاراتا ايتىلعان ءسوزدى ەستىدىك. سول جاققا مويىن بۇرعانىمىزدا، جانۇشىرا كومەك سۇراپ ايقايلاپ تۇرعان دۇكەن ساتۋشىسىن كوردىك. سول ساتتە قولىندا زاتى بار ۇرىنى دا كورىپ ۇلگەردىك. وعان زاڭدى تۇردە: «توقتا!»، دەپ ءۇش رەت ايقايلادىق. ول توقتامادى. سودان، ءالجان ەكەۋىمىز قۋىپ جەتىپ، ۇستاپ الدىق. ول بىزگە قارسىلىق كورسەتىپ، مەن ەشتەنە ۇرلاعان جوقپىن، دەپ اقتالا باستادى. ال ءبىز وعان ءجۇر، انا ساتۋشىنىڭ قاسىنا بارايىق، ءمان-جايدى تۇسىندىرەسىڭ دەپ، قاراپايىمدىلىق تانىتتىق. ول بىزگە باعىنباي، بالاعات سوزدەر ايتا باستادى. ال ءبىز اكادەميادا العان تەوريالىق ءبىلىمىمىزدى جانە قىلمىسكەردى زالالسىزداندىراتىن جاۋىنگەرلىك ءتاسىلىمىزدى قولدانىپ، ونىڭ قارسىلىق كورسەتپەۋىن ايتىپ، ۇستاپ تۇردىق. سوسىن ساتۋشى كەلىپ، جبو «102» نومىرىنە حابارلاسىپ، كەزەكشى پوليسيا قىزمەتكەرلەرىن شاقىردى. ىشكى ىستەر قىزمەتكەرلەرى كەلگەن سوڭ، ءبىز ولارعا ۇستالعان ۇرىنى تاپسىرىپ، ءارى قاراي جونىمىزگە كەتتىك. ال كەيىن نە بولعانىن بىلمەيمىز.

وقۋ ورنىنا كەلىپ، بارلىق ءمان-جايدى كۋرس باستىعى پوليسيا مايورى ۆاسيليي ۆاسيليەۆيچ زاۆارىكوعا باياندادىق، - دەيدى كىشىگىرىم ەرلىك جاساعان 3 كۋرس كۋرسانتى پوليسيا كىشى سەرجانتى عالىمجان ءوز اڭگىمەسىندە.

ءبىر قاراعاندا تۇككە تۇرعىسىز ماسەلە دەپ ويلايتىن شىعارسىزدار، ال دۇكەنشى ءۇشىن ۇلكەن ابىروي. ويتكەنى ءبىر ايلىق ازىق-تۇلىكتى ۇرلاعان ۇرىنى ۇستاماعاندا، الگى ساتۋشىنىڭ بالا-شاعاسى ءبىر اي بويى اش-جالاڭاش وتىرار ەدى. تاباندىلىق، ەرلىك، قايسارلىق تانىتقان جاس كۋرسانتتار ءۇشىن جانە اكادەميامىز ءۇشىن ۇلكەن ەرلىك، ابىروي دەپ ويلايمىز.

ەگەر ۇرى بۇرىن سوتتالعان نەمەسە ناشاقور بولىپ، ءبىزدىڭ كۋرسانتتارىمىزدى جازاتايىم ەتسە شە؟ وندا نە ايتامىز، سىزدەرگە؟.. ءبىراق ابىراي بولعاندا، ءالجان مەن عالىمجان وندايعا، السىزدىككە، جاۋاپسىزدىققا جول بەرمەي، وزدەرىنىڭ ناعىز ەلى ءۇشىن ادال قىزمەت كورسەتەتىندەرىن تاعى ءبىر دالەلدەدى.

ماقالامدى جازىپ بولعان سوڭ، مەن قوستاناي وبلىستىق ىشكى ىستەر دەپارتامەنتىنىڭ باسپا ءسوز قىزمەتىنە حابارلاسىپ، جاعدايدىڭ انىق-قانىعىن سۇراعان ەدىم. مەنىڭ ساۋالىما ءىىد باسپا ءسوز قىزمەتىنىڭ باس مامانى بالسلۋ الەكەنوۆا تومەندەگى اقپاراتتى بايانداپ بەردى.

-يا، سىزدەردىڭ كۋرسانتتارىڭىزدىڭ جەدەل قيمىلىنىڭ ارقاسىندا دۇكەن توناۋشى ۇرى قولعا ءتۇستى. ول بۇرىن بىرنەشە رەت ۇرلىق جاساپ، قىلمىستىق جاۋاپقا تارتىلىپ، سوتتالعان، 1994 جىلى تۋعان. ءقازىر وعان قاتىستى سوتقا دەيىنگى تەرگەپ-تەكسەرۋ ىستەرى جۇرگىزىلىپ جاتىر.

وسىنداي كەز كەلگەن بولاشاق پوليسيا قىزمەتكەرلەرىنىڭ قىراعىلىعى مەن انتىنا دەگەن بەرىكتىگى - ەل تىنىشتىعى مەن بەيبىتشىلىگىمىزدىڭ ساقتالۋىنا قوسىلار ەلەۋلى ۇلەستىڭ ءبىرى دەپ بىلەمىز.

مەيرام وسپانوۆ

قازاقستان رەسپۋبليكاسى ىشكى ىستەر مينيسترلىگى شىراقبەك قابىلبايەۆ اتىنداعى قوستاناي اكادەمياسىنىڭ باسپا ءسوز حاتشىسى