ەلىمىزگە قىتايدان كەلەتىن اۆتوبۋستار شەتىنەن ۇستالىپ جاتىر. ءۇرىمجى-الماتى باعىتىندا جولاۋشى تاسىمالدايتىن كولىكتەرگە بىرنەشە كۇننەن بەرى رەيد جۇرگىزىلۋدە. ويتكەنى ولاردىڭ قۇجاتتارىندا تەك قىتايمەن شەكارالاس شونجى اۋىلىنا دەيىن عانا كەلۋگە رۇقسات بار. الايدا اۆتوبۋس جۇرگىزۋشىلەرى زاڭدى بەلشەدەن باسىپ، الماتىعا دەيىن ادام اكەلىپ ءجۇر، - دەپ حابارلايدى Qamshy.kz كتك ارناسىنا سىلتەمە جاساپ.

كولىك باقىلاۋ ينسپەكسياسى مەن جول ساقشىلارى ءتورت كۇننەن بەرى الماتى-قورعاس تاس جولىن تورىپ ءجۇر. سەبەبى سوڭعى ۋاقىتتا قىتايدان ادام تاسىمالدايتىن اۆتوبۋستار الماتىعا زاڭسىز كىرەتىن بولعان. ياعني ءۇرىمجى-شونجى باعىتىندا دا عانا قاتىناۋى ءتيىس كولىكتەر وڭتۇستىك استاناعا دەيىن ءوتىپ كەتەدى ەكەن.

قانات مامەتحانوۆ، الماتى وبلىستىق كولىك باقىلاۋ ينسپەكسياسىنىڭ باس مامانى:

-قازىرگى تاڭدا قازاقستانعا زاڭسىز كىرەتىن اۆتوبۋستاردىڭ سانى ءوسىپ جاتىر. شونجىدان توقتاماي الماتىعا ءوتىپ كەتىپ جاتىر. سول تۇرعىدا اۆتوبۋستاردى توقتاتىپ، تەكسەرىپ حاتتاما تولتىرىپ، كات-تارىن الىپ قالىپ جاتىرمىز. 

الايدا بۇدان قىتايلىق جۇرگىزۋشىلەردىڭ قىلى دا قيسايمايتىن سەكىلدى. سەبەبى ايىپپۇل كولەمى تىم از. ياعني بوتەن ەلگە رۇقساتسىز كىرگەنى ءۇشىن بار جوعى ون مىڭ تەڭگە تولەيدى ەكەن. ال اسپان استى ەلىندە ءدال وسىنداي زاڭسىزدىق ءۇشىن تەڭگەگە شاققاندا شامامەن ءبىر ميلليون ايىپپۇل قاراستىرىلعان. سوندىقتان بىزدەگى زاڭنىڭ وسالدىعىن وڭاي پايدالانعان شەتەلدىكتەر زاڭسىز ارەكەتىن توقتاتار ەمەس.

-ءبىز بىلمەيمىز. ونى باستىقتان سۇرا تايىر دەگەن. باستىق جىبەرسە كەلە بەرەمىن. ايىپپۇلدى كومپانيا تولەيدى.     

وسىلاي شىرەنگەن شەتەلدىك جۇرگىزۋشىلەردىڭ قۋلىعىنا دا قۇرىق بويلاماي تۇر. ياعني ءتورت كۇننەن بەرى رەيد ءجۇرىپ جاتقانىن ەستىگەندەر ەندى جولاۋشىلاردى الداۋعا كىرىسكەن. ياعني الماتىدان جولعا شىققانداردى باسقا كولىكپەن قالا سىرتىنا شىعارىپ ، ارى قاراي ءوز اۆتوبۋستارىمەن اكەتەدى ەكەن. 

الايدا ارنايى رەيد بارىسىندا بۇل ارەكەتتەرى دە اشكەرە بولدى. ءتۇن ورتاسىندا جولدا قالعان جولاۋشىلار الدانىپ قالعاندارىن ءبىلىپ شۋ شىعاردى.

-ىشىندە اۋزى بەرىك ادامدار بار. اۋرۋ قىلدى اقىر اياعىندا. كەرەۋەتى بار اۆتوبۋسقا سالامىز دەگەن.  مىناۋ ۇرلاپ اكەپ ءتۇن ورتاسىندا وسىنداي قىلدى.

-ول اۆتوبۋس سىزدەردى شەكارادان شىعارا المايدى. قۇجاتتارى الىنىپ قويعان

بازار جاعالاپ، جولاۋشى جينايتىنداردىڭ باعاسى دا ارزان. كوك تيىن سالىق تولەمەيتىندىكتەن ولار الماتىدان-ۇرىمجىگە دەيىن ءار جولاۋشىدان 8 مىڭ تەڭگە الادى ەكەن. بۇدان وتاندىق تاسىمالداۋشىلاردىڭ كاسىبى تۇرالاپ قالعان. سەبەبى اۆتوۆوكزالداعى بيلەت باعاسى 12 مىڭ تەڭگە.

رازدان دانيال، اۆتوبۋس جۇرگىزۋشىسى:

-ولار بازاردان كەتىپ جاتىر. ادامنىڭ ءبارىن اكەتىپ جاتىر. انا جاقتان دا بازاردان كەتىپ قالادى. ءبىز ءبىر ايدا ءبىر شىعامىز. جۇمىس جوق. ادام جوق...

بۇگىنگى رەيد بارىسىندا قىتايلىق اۆتوبۋستاردان بولەك زاڭعا باعىنباعان جەڭىل كولىكتەر دە ۇستالدى. اسپان استى ەلىنەن جارىسقا كەلە جاتقان بۇل ازاماتتار تەمىر تۇلپارلارىنىڭ تەرەزەسىن تۇمشالاپ العان ەكەن. سوندىقتان ساقشىلار ءبىر جولعا ەسكەرتۋ جاساپ، كۇڭگىرت جابىندىلارىن جۇلىپ تاستادى.