اقتاۋدا ءبىر توپ ايەلدىڭ جاعا-جىرتىس توبەلەسى الەۋمەتتىك جەلى قولدانۋشىلارىنىڭ جاعاسىن ۇستاتتى. ويىنشىققا تالاسقان بالالاردان كەم تۇسپەگەن ايەلدەردىڭ بۇل ارەكەتى عالامتورعا تاراپ، بەينەجازبا ءبىر تاۋلىكتىڭ ىشىندە 20 مىڭ رەت قارالعان. الايدا، ءبىر-بىرىن اياۋسىز سوققىعا جىققانداردى ءتارتىپ ساقشىلارى ءالى تاپقان جوق، دەپ حابارلايدى Qamshy.kz 31 ارناعا سىلتەمە جاساپ.
ايەلدەردىڭ كوپشىلىك كوزىنشە جاپپاي توبەلەسىپ، ءبىرىن-بىرى اياۋسىز ۇرعانى بەينەجازباعا جازىلعان. جازعانداردىڭ وزدەرى جاپپاي تارتىپسىزدىككە كۋا بولعان ەر ازاماتتار. سوراقىسى، ايەلدەر ءبىرىن-بىرى سۇيرەپ، تەپكىلەپ جاتقانىن ەش قىمسىنباستان ۇيالى تەلەفوندارىنا ءتۇسىرىپ، اراسىندا ءتارتىپ ساقشىلارىن شاقىرتۋ كەرەكتىگىنە كەڭەس تە بەرگەن داۋىستارى ءتۇسىپى قالعان.
توبەلەستى سول جەردە بالمۇزداق ساتىپ تۇرعان دايانا ەسىمدى قىز ءوز كوزىمەن كورىپتى.
- مەن قاتتى قورقىپ كەتتىم. ايەلدەر ءبىر-بىرىن ءولتىرىپ الا ما دەپ ويلادىم. بەس ايەل بىرگە كەلە جاتتى. ولار ىشىمدىك ءىشىپ العانعا ۇقسايدى. ءبىر مەزەتتە كەرىسە كەتتى. توبەلەس 20 مينۋتقا سوزىلدى. كەيىن ىشىندەگى ءبىر ايەل كولىككە وتىرا بەرگەندە قالعاندارى ارتىنان قۋىپ بۇل جەردەن بارلىعى كەتىپ قالدى، - دەيدى دايانا ياكيبايەۆا.
بىرەۋگە كۇلكى، بىرەۋگە تابا بولعان قازاق ايەلدەرىنىڭ جاس شاماسى 30-بەن 40 ارالىعىندا. پوليسەيلەر ازىرگە ەشكىمدى تاپپاعان.
- 02-گە ەشقانداي قوڭىراۋ تۇسكەن جوق. جانە بۇل ايەلدەر بىر-بىرىنە ارىزدانبادى. ىشكى ىستەر قىزمەتكەرلەرى سوعان قاراماستان قوعامدىق ءتارتىپتى بۇزعانى ءۇشىن ىزدەستىرىپ جاتىر، - دەيدى مو ءىىد مەملەكەتتىك ءتىل جانە اقپارات ءبولىمىنىڭ باسشىسى جازيرا ءابىل.
قوعامدىق نارازىلىق تۋعىزعان ايەلدەردىڭ توبەلەسى كافەلەردىڭ بەينەباقىلاۋ كامەرالارىنا ءتۇسىپ قالۋى مۇمكىن. سوندىقتان ءتارتىپ ساقشىلارى ولاردىڭ ناقتى كىم ەكەندەرىن دۇرىس انىقتاۋ ءۇشىن سول بەينەجازبالاردى تۇگەل تەكسەرىپ، بۇگىن انىقتاۋعا كىرىستى. ەگەر انىقتالسا، بۇل ايەلدەر ەكى بىردەي باپ بويىنشا جازاعا تارتىلادى.
