اتىراۋ اگرارلى-تەحنيكالىق كوللەدجىنىڭ بۇرىنعى باسشىلارى اقىلى نەگىزدە وقۋى ءتيىس ستۋدەنتتەردى گرانتقا اۋىستىرعان كورىنەدى. ماسەلەن، ايماق ءۇشىن تاپشى سانالاتىن ۆەتەرينار ماماندىعىنا بولىنگەن گرانتتا تەمىرجولشىلار، توڭازىتقىش جوندەۋشىلەردىڭ ورنىنا قۇرىلىسشىلار ءبىلىم الۋلارى مۇمكىن. ياعني، مەملەكەت ەسەبىنەن بولىنگەن قارجىعا اقىلى نەگىزدە وقۋى ءتيىس ستۋدەنتتەردى وقىتىپ، ولارعا ستيپەنديا تاعايىنداپ كەلۋلەرى مۇمكىن، - دەپ حابارلايدى Qamshy.kz 31 ارناعا سىلتەمە جاساپ.
بالالارى بۇعان دەيىن گرانتتا ءبىلىم الىپ كەلگەن اتا-انالارعا جاڭالىقتى كوللەدجدىڭ جاڭا باسشىسى ايتقان. ناقتىسى، تالىمگەرلەردىڭ مەملەكەت ەسەبىنەن زاڭسىز وقىپ جاتقاندارىن جەتكىزگەن. ەندى بالالارىنىڭ تەگىن ءبىلىم المايتىندارىن جانە ءبىر جىلعى وقۋ اقىسىن تولەپ، العان شاكىرتاقىلارىنىڭ دا مەملەكەتكە قايتارىلۋ قاجەت ەكەندىگىن ەسكەرتىپتى.
ءاليا يمانعالييەۆا، اتا-انا:
- مەنىڭ بالامنىڭ نەگىزگى ساباعى - بيۋدجەت، ەششە ستيپەنديا الىپ وتىر، فيەۆرالدان بەرى ستيپەندياسى جوق، ەششە مىنا وقىعاندى اقشاسىن تولەڭدەر دەپ وتىر.
مايرا قۇسپانعالييەۆا، اتا-انا:
- مىنە جىلدىڭ اياعىنا دەيىن جەتتىك، جىلدىڭ اياعىنا دەيىن ءبىز ءبارىن شەشەمىز، بۇل وبلىستىق بيۋدجەتتەن ءبولىنىپ تۇرعان گرانت، وبلىس اكىمى شەشەدى ءبارىن، بىزدەر سوعان جۇمىستانامىز دەدى. بۇل كىسىلەر دە جۇمىستاندى، بىزدەر دە جۇمىستاندىق، ءبىراق ەشقانداي دا ناتيجە جوق.
اتىراۋ اگرارلى-تەحنيكالىق كوللەدجىنە جۋىردا باسشى بولىپ كەلگەن كلارا مۇقاشكەرەيەۆانىڭ ايتۋىنشا، مۇنىڭ ءبارى بۇرىنعى باسشىلىقتىڭ كەزىندە جاسالعان كورىنەدى.
كلارا مۇقاشكەرەيەۆا، اتىراۋ مەملەكەتتىك اگرارلى-تەحنيكالىق كوللەدجىنىڭ ديرەكتورى:
- جەرگىلىكتى باسقارۋشى ورگاندارعا حابارلاما بەردىم، قازىرگى كۇندە وبلىستىق اكيمات تاراپىنان وسى ماسەلەنى شەشۋ جولدارىن ويلاستىرىپ جاتىر، جوسپارلاپ جاتىر، ال وتىرعان ستۋدەنتتەردى سول وتىرعان ماماندىعى بويىنشا بيۋدجەت ەتىپ بەكىتىپ بەرۋگە ەشقانداي زاڭدىلىق نەگىز قازىرگى كۇنى جوق.
وقۋ ورنىنداعى بۇل ماسەلەمەن ءقازىر قۇزىرلى ورىندار اينالىسىپ جاتقان كورىنەدى. وندا دا بەلگىلى ءبىر تۇلعالارعا قاتىستى ەمەس، ناقتى دەرەكتەر بويىنشا. ءتورت ايدان بەرى ءجۇرىپ جاتقان تەكسەرىس قورىتىندىسىنىڭ قاشان شىعارى ازىرگە بەلگىسىز.
