شەكتەۋدەن قۇتىلۋ ءۇشىن ميلليونداعان دوللار قارجى كەرەك. دۇنيەجۇزىلىك دوپينگكە قارسى اگەنتتىكتىڭ شەشىمىمەن جۇمىسى ءتورت ايعا توقتاتىلعان ەلىمىزدەگى دوپينگكە قارسى زەرتحانا باسشىلىعى ماسەلەنىڭ ءمان-جايىن ءتۇسىندىردى، - دەپ حابارلايدى Qamshy.kz كتك ارناسىنا سىلتەمە جاساپ.

-قاراجات كەرەك ەمەس تالاپتارىن، قاراجاتسىز ورىندالاتىن تالاپتارىن ءبارىن ورىندادىق ۋاقىتىندا. ال ءبىراق قاراجات كەرەك تالاپتارىن ءازىر شامالى كەشىگىپ جاتىرمىز. سول سەبەپتەن دە بولۋى مۇمكىن توقتاتىلۋى، - دەيدى «دوپينگكە قارسى سپورتشىلار زەرتحاناسى» رمكك ديرەكتورى تالعات تالبايەۆ.

زەرتحاناداعى بۇل قوندىرعىلاردىڭ ءارقايسىسىنىڭ باعاسى 200 ميلليون تەڭگەدەن اسىپ جىعىلادى. بارلىعى دا 2011 جىلعى قىسقى ازيا ويىندارى كەزىندە ويداعىداي جۇمىس اتقارعان. دەگەنمەن دۇنيەجۇزىلىك دوپينگكە قارسى اگەنتتىكتىڭ تالابى بويىنشا وتاندىق زەرتحانا زامان اعىمىنا ساي تاعى دا ميلليونداعان دوللار تۇراتىن قوندىرعىلاردى ورناتۋى ءتيىس. ال ونى ساتىپ الۋعا بيۋدجەتتە قارجى قاراستىرىلماعان. بۇل تىعىرىقتان شىعۋ ءۇشىن سپورت كوميتەتى دەمەۋشىلەردىڭ كومەگىنە جۇگىنبەك.