«جەر كوميسسياسىنىڭ بيۋدجەتىن ەربولات دوسايەۆتىڭ جەكە موينىنا ءىلىپ، مەملەكەتتىك قىزمەتتەن الاستاتۋ قاجەت». ساياساتكەر، ۇكىمەت جانىنداعى جەر رەفورماسى جونىندەگى قۇقىقتىق جۇمىس توبىنىڭ جەتەكشىسى مۇحتار تايجان وسىنداي ۇسىنىس تاستادى، – دەپ حابارلايدى Qamshy.kz.
مۇحتار تايجاننىڭ بۇرىنعى ۇلتتىق ەكونوميكا مينيسترىنە بۇلاي شۇيلىگۋى بەكەر ەمەس ەكەن. ساياساتكەردىڭ ايتۋىنشا، ءبىر عانا اتىراۋ قالاسىندا وتكەن كوميسسيا وتىرىسىنا شامامەن 5 ميلليون تەڭگە قاراجات كەتكەن.
«كوميسسيانىڭ وتىرىستارى بيۋدجەت ءۇشىن قىمبات پا؟» دەگەن سۇراققا جاۋاپ بەرگەن مۇحتار تايجان ءاربىر كوميسسيا مۇشەسىنە جۇمسالاتىن مەملەكەت قارجىسىنىڭ ەسەبىن جاريالادى.
«مىسالعا، اتىراۋعا دەيىن ۇشاق بيلەتى – 113 مىڭ تەڭگە. قوناق ءۇي – ءۇش تاۋلىككە 75 مىڭ، تاماق، كىر جۋۋ، كويلەكتى ۇتىكتەۋ – 10 مىڭ – تاۋلىكتىك شىعىننان تولەنەدى. تولىعىمەن دەرلىك ءبىر ادامعا – 200 مىڭ تەڭگە. كەشەگى وتىرىسىمىزعا (23 شىلدە كۇنى اتىراۋدا وتكەن سەگىزىنشى وتىرىس – رەد.) كوميسسيانىڭ 25 مۇشەسى قاتىستى. ياعني، ءىس-ساپارعا شامامەن 5 ميلليون تەڭگە اقشا كەتتى. زالدى جالعا الۋدى، ادامداردىڭ جۇمىسىن ايتپاي-اق قويايىن»، - دەگەن ول بۇدان باسقا وتىرىستاردىڭ دا قازىنا ءۇشىن وڭايعا تۇسپەگەنىن ايتادى.
«باسقا وتىرىستارىمىزعا 25 ەمەس، 75 مۇشە قاتىسادى. ياعني، بۇگىنگە دەيىن ەڭ كەمىمەن 40 ميلليون تەڭگە مەملەكەتتىڭ قالتاسىنان كەتتى دەگەن ءسوز»، - دەيدى م. تايجان.
وسىنشاما قاراجاتتىڭ سۇراۋسىز كەتپەۋى كەرەكتىگىن ايتقان ساياساتكەر كوميسسيا شىعىنىن «جەر كودەكسىنە» ەنگەن داۋلى وزگەرىستەردى جاساعان بۇرىنعى ۇلتتىق ەكونوميكا ءمينيسترى تولەۋ كەرەك دەپ سانايدى.
«نەگە بۇنداي شىعىن پايدا بولدى؟ سەبەبى، جەر ماسەلەسى بويىنشا سوڭعى زاڭ ساپاسىز بولعاندىقتان حالىق وعان قارسى شىقتى. بۇل زاڭنىڭ اۆتورى كىم ەدى؟ ەربولات دوسايەۆ مىرزا، ءوزى مۇنى مويىنداپ سول ءۇشىن وتستاۆكاعا كەتتى. «وتستاۆكا» بولعاندا ءقازىر مەملەكەتتىك «بايتەرەك» قورىن باسقارىپ وتىر. مەنىڭ ۇسىنىسىم – جەر كوميسسيانىڭ بيۋدجەتىن ەربولات دوسايەۆتىڭ جەكە موينىنا ءىلىپ، مەملەكەتتىك قىزمەتتەن الىپ تاستاۋ، بولاشاقتا جولاتپاۋ كەرەك. بۇنداي ايىپپۇل تولىعىمەن ادىلەتتى بولادى دەپ سانايمىن»، - دەيدى ول.
