اقتوبەدە ورتالىق بازار ماڭىنداعى تەلەفون ساتاتىن جىگىتتەر تەراكت كەزىندە باستى كۇدىكتىگە اينالعان بولاتىن. اقتوبەدەگى وقيعا كەزىندە ولاردىڭ بارلىعى قاماۋعا الىنىپ، تەرگەۋ جۇرگىزىلدى.
بۇگىندە تەراكتىگە قاتىسى جوقتىعى دالەلدەنگەندەر بوساپ شىعىپ، ساۋدالارىن جالعاستىرىپ جاتىر. ولاردىڭ سىرت پىشىنىندە ءسال وزگەرىس بار: ساقالدارى قيىلعان، قىسقا بالاقتى شالباردىڭ ورنىنا بالاعى رەزەڭكە تريكولار كيگەن.
ولار وزدەرىمەن اڭگىمەلەسۋدەن باس تارتقان جوق. تەك سۋرەتكە ءتۇسىرىپ، اتتارىن اتاماۋدى سۇرادى.
«ءبىزدى «ساقالدىلار» دەپ ەرەكشەلەيتىن ەشتەڭە جوق. اباي اتامىز دا ساقال قويعان، ەرىككەننەن ەمەس شىعار؟! ءبىز دە وزگە ادامدار سەكىلدى قوعامنىڭ مۇشەسىمىز. كۇن كورۋ ءۇشىن تىرشىلىك جاسايمىز. بىرەۋگە زيان كەلتىرۋ ويىمىزدا جوق. سىزبەن سويلەسۋ ءۇشىن مەن بەس ساعات ۋاقىت جۇمساۋىم مۇمكىن. كەيىن ءسىز اڭگىمەمە قىزىعىپ، كۇيەۋگە شىققىڭىز كەلۋى مۇمكىن. سويلەسپەستەن بۇرىن ءوزىڭىز ويلانىڭىز. ماعان كۇيەۋگە شىققىڭىز كەلسە، سويلەسۋگە قارسى ەمەسپىن»، - دەدى توپ جىگىتتىڭ اراسىنان ءبىرىنشى بولىپ ءتىل قاتقانى.
ءدىن جولىنداعى جىگىتتەردىڭ ۇيلەنۋدى ءبىرىنشى كەزەككە قوياتىنىن بىلگەندىكتەن «ءسىزدىڭ ايەلىڭىز بار ەمەس پە؟»، - دەپ اڭگىمەگە تارتا تۇستىك. ساقالىن قيدىرعان جىگىت ءوزىنىڭ ءومىرى تۋرالى جاعدايدى جايىپ سالدى.
«ايەلىمنىڭ بارى راس. شۇكىر، ءبىر ەمەس، ەكى ايەلىم، سەگىز بالام بار. ءالى ەكى "ۆاكانسيا" بوس تۇر. بويىمدا قۋات بار كەزدە كوڭىلىمنەن شىققان قىزدى جار ەتۋگە قارسى ەمەسپىن. ءقازىر قانشاما قىزدار جىگىتتەردىڭ ويىنشىعىنا اينالىپ جاتىر. كۇيەۋگە شىعا الماي جۇرگەن كارى قىزدار كوپ. مەن بىرنەشە ايەل السام، ولاردى كوڭىل كوتەرۋ ءۇشىن ۇستاپ وتىرعان جوقپىن. ولاردى قامقورلىعىما الىپ، بالاعا اكە، وزىنە جار بولامىن. قولىمنان كەلگەنىنشە بارىمدى الدارىنا اپارامىن، اش ەمەس. سوندىقتان بوس تۇرعان ەكى "ۆاكانسيانى" دا تولتىرۋ ويىمدا بار»، - دەيدى ول.
اتىنىڭ قۇپيا قالۋىن سۇراعان تەلەفون ساتۋشى جىگىت ءوزىنىڭ ايەلدەرى تۋرالى دا ايتىپ بەردى.
«ءدىن جولىنا بەت بۇرعانىما ون شاقتى جىل بولدى. جولداستارىمنىڭ تانىستىرۋىمەن كوڭىلىمنەن شىققان قىزبەن وتاۋ قۇردىم، ءتورت بالام بار. جاقىندا عانا كىشكەنتايلى بولىپ ۇيدە وتىر. ونىڭ جاسى مەنەن ءتورت جاس كىشى. مەن ونىمەن يمانىنا قاراپ قوسىلدىم. ءبىرىنشى ايەلىممەن ەكى-ۇش جىل تۇرعاننان كەيىن وزىمنەن ءبىر جاس ۇلكەن ايەلدى توقال قىلىپ الدىم. ول بۇرىن تۇرمىستا بولعان. ونىڭ سۇلۋلىعى «ايەلىم بولشى» دەپ ايتۋعا سەبەپ بولدى. يسلامدا ايەل تاڭداعاندا يمانىنا، سۇلۋلىعىنا، بايلىعىنا كوڭىل ءبولۋ كەرەكتىگى ايتىلادى. ونىڭ بالاسىنا ءوز بالامداي قارايمىن. ءقازىر ورتاق بالالارىمىز بار. ماعان كومەكتەسۋ ءۇشىن قوسىمشا اتەلەدە جۇمىس جاسايدى. ومىرىمە وكىنگەن ەمەسپىن. وسى ۋاقىتقا دەيىن ولار دا ماعان وكپەلەرىن ايتىپ، رەنىش بىلدىرگەن جوق. ايەلدەرىم دە، بالالارىم دا ءبىر بىرىمەن ارالاسىپ تۇرادى. بالالارعا تۇسىندىرە بىلسە، ەشقانداي رەنىش بولمايدى. ولار مەنىڭ وزدەرىنىڭ انالارىن قالاي سىيلايتىنىمدى، قامقورلىعىمدى كورىپ ءوسىپ كەلەدى. سوندىقتان، بالالارىم دا قىزعانىش تۋدىرىپ كورگەن ەمەس»، - دەيدى ول.
تەلەفون ساتۋشى جىگىت لاڭكەستىك جاساعان جاستار بىرەۋلەردىڭ ازعىرعانىنا ەرىپ كەتتى دەگەن پىكىردە.
«نەگە ءبىزدى قوعامنان ءبولىپ قارايدى؟ "ساقالدىلار" دەپ جاتادى. مۇمكىن بولعان وقيعادان كەيىن ادامداردا قورقىنىشتىڭ بولۋى زاڭدى دا. ءبىراق ول وقيعا كەزىندە كىلەڭ جاستاردىڭ قازا تاپقانىن وزدەرىڭىز بىلەسىزدەر. اقىل توقتاتپاعان ولار ەرىپ كەتتى. ءبارى دە ۇيلەنگەن، ارتتارىندا بالالارى قالدى. سول كۇنى نەگىزى بارلىعىمىزدى دا قوناققا شاقىرعان بولاتىن. سوندا تۇسىنىسپەۋشىلىكتەن بولىپ تۇر. جاستار ەرىپ كەتتى، ءبارى قىرىلدى. قالعاندارىنا وسى جاعداي ساباق بولادى دەپ ويلايمىن»،- دەدى ول اقتوبەدەگى جاعدايعا بايلانىستى كوپ ەشتەڭە ايتا المايتىندىعىن ءتۇسىندىرىپ.
«سىزدەردىڭ مەشىتكە كوپ بارمايتىندارىڭىز ءجيى ايتىلادى. ءدىن تۋرالى ءبىلىمدى سىرتتان الاتىندارىڭىز، يمامدار پىكىرىمەن كەلىسپەي قالاتىندارىڭىزعا قاتىستى دا ءجيى جاريالانىپ ءجۇر. بۇعان نە ايتاسىز؟» - دەگەن ساۋالىمىز دا جاۋاپسىز قالعان جوق.
«نەگە ءبىز مەشىتكە بارمايدى ەكەنبىز؟ مەشىت اللانىڭ ءۇيى، نامازدى ءبىز سول جەردە وقيمىز. ءبىزدىڭ يمامدار سۇراقتىڭ وزىنە سەنىمدى جاۋاپ بەرە المايدى. كۇمىلجىپ، بىرەۋدى كىنالاپ جاتادى. مەن ەشكىمدى جامانداعىم كەلمەيدى. ءبىراق مەشىتە قالتالى ادامنىڭ ولگەنىن تىلەپ وتىراتىن «شاباشنيك» يمامدار كوپ. ولار ءدىن تۋرالى تەرەڭدەتىپ بىرەۋگە تۇسىندىرمەك تۇگىلى، وزدەرى تۇسىنبەيدى. سوندىقتان ادەبي كىتاپتار وقيمىز. مەن ءوزىمنىڭ دىنگە قالاي كەلىپ، يمامدارعا بارعانىم ەسىمدە. ول كەزدە كەرى پىكىرلەر قالىپتاسپاعان كەز. مەشىت پەن يمامنىڭ بولەك ەكەنىن سول كەزدە-اق تۇسىنگەنمىن. بىرەۋدى قارالاماستان بۇرىن، كىنانى اركىم وزىنەن ىزدەۋ كەرەك»،- دەپ قوشتاستى تەلەفون ساتۋشى جىگىت.
