وزبەكستاننىڭ فەرعانا وبلىسى ريشتان اۋدانىندا 26 جاستاعى ايەل ازاماتتىق كۇيەۋى ۇلىن مويىنداماي، اليمەنت تولەۋدەن باس تارتقان سوڭ، 11 ايلىق ءسابيىن ۇلكەن فەرعانا كانالىنا اعىزىپ جىبەرگەن. ءسابيدىڭ دەنەسىن ەكى كۇننەن سوڭ كورشى اۋىلدىڭ فەرمەرى تاۋىپ العان، - دەپ حابارلايدى Qamshy.kz centralasian.org – كە سىلتەمە جاساپ.

فەرعانا وبلىسىندا قۇقىق قورعاۋ سالاسىندا جۇمىس ىستەيتىن دەرەككوز ايەلدىڭ ەكى رەت تۇرمىس قۇرعانىن ايتادى. «ول جەڭىل ءجۇرىستى كەلىنشەك. د.پ. دەگەن ازاماتپەن تۇردى. كەيىن اجىراسقاننان كەيىن، ونى سوتقا بەرىپ، بالاسىنا اليمەنت ءوندىرىپ الماق بولدى. الايدا، سوتتا د.پ. بالا وزىنەن ەمەس ەكەنىن ايتتى. ايەل اليمەنت ءوندىرىپ الا-الماعاندىقتان، اشۋمەن بالانى سۋعا لاقتىرىپ جىبەرگەن. الدىمەن ۇلىن لاقتىرعان. سوسىن ءوزى دە سەكىرمەك بولعان، ءبىراق سوڭىندا قورقىپ قالعان، – دەيدى ول.

– بالانىڭ دەنەسى فەرمەردىڭ جەرىنە دەيىن اعىپ بارعان. سوسىن ول بىردەن ميليسياعا حابارلادى، – دەيدى قۇقىق قورعاۋ ورگاندارىنداعى اقپارات كوزى.

الايدا ەكىنشى ءبىر دەرەككوز بالاسىن سۋعا لاقتىرعان ايەل جەڭىل ءجۇرىستى بولماعان دەيدى. ونىڭ قارجىلىق قيىندىقتان پسيحولوگيالىق سترەسسكە تۇسكەنىن ايتادى.

قازىرگى ۋاقىتتا ايەل قاماۋدا، ونىڭ ۇستىنەن قىلمىستىق كودەكستىڭ 97-بابى بويىنشا («قاستاندىقپەن كىسى ءولتىرۋ») قىلمىستىق ءىس قوزعالعان.