كىم سالافيزم اعىمىنىڭ ءبىرىن اقتاپ، جاقسى قىلىپ كورسەتكىسى كەلسە، سوعان بىردەن تويتارىس بەرىلۋى ءتيىس. سالافيزمگە ءقاۋىپتى كوزقاراستار عانا ءتان.  Zakon.kz اگەنتتىگىنە سۇحبات بەرگەن ق ر مادەنيەت جانە سپورت مينيسترلىگى ءدىن ىستەرى كوميتەتىنىڭ عىلىمي-زەرتتەۋ جانە ساراپتامالىق ورتالىعىنىڭ ديرەكتورى اينۇر ءابدىراسىل قىزى وسىلاي دەگەنىن جازادى 365info.kz. بۇل تۋرالى Qamshy.kz حابارلايدى.

قازاقستاندا ءسالافيزمنىڭ تاكفيرشى، مادحاليت جانە سۋرۋريت دەگەن بىرنەشە اعىمى بار. اتاۋى مەن ادىستەمەسىندە ءبىرقاتار ەرەكشەلىگى بار بولعانىمەن، ولاردىڭ يدەولوگياسى مەن ماقساتى ءبىر، وقىپ، ۋاعىزدايتىن ادەبيەتتەرى دە ءبىر بولىپ كەلەدى.

سوندىقتان، يدەولوگيالىق جاعىنان العاندا، سالافيزم ىشىندەگى اعىمداردىڭ ءبىرىن راديكالدىق، تاعى ءبىرىن ءتوزىمدى، ياعني جارامدى دەپ بولە-جارا قاراۋعا بولمايدى.

كىم ءسالافي اعىمىنىڭ ءبىرىن اقتاپ، جاقسى قىلىپ كورسەتكىسى كەلسە، سوعان بىردەن تويتارىس بەرىلۋى ءتيىس. ولاردىڭ ىشىندەگى كەيبىر اعىمدى «ءتوزىمدى» دەپ تاڭبالاۋ كەيبىر اراب ەلدەرىنە ءتان قۇبىلىس. وندا دا ولار بۇعان لاجسىزدىقتان بارىپ وتىر.

ال، ءبىزدىڭ زايىرلى مەملەكەتتە ءدىني، تانىمدىق، ءتىپتى ساياسي كەڭىستىكتە دە ءسالافيزمنىڭ «توزىمدىلىگى» تۋرالى كوزقاراستار ايتىلماۋى كەرەك، بۇل، تىپتەن اقىلعا قونىمسىز. ويتكەنى، ءداستۇرلى ەمەس كوزقاراستى جاقتاۋشىلار شەكتەن شىعۋعا ءاردايىم دايىن تۇرادى.

قازاقستاندىق ءدىنتانۋشىلار، تەولوگتار ءىشىنارا بولىنگەنىمەن، تاكفيرشىلەر، مادحاليتتەر، سۋرۋريتتەر وزدەرىن جالپاق تىلمەن سالافيلەرمىز دەپ اتايدى دەگەن پىكىردى ايتىپ جاتادى. دەمەك، ولار وزدەرىنىڭ پوزيسياسى مەن ۇستانىمى ورتاق ەكەنىن مويىندايدى.

ماسەلەنى باسقا جاققا اۋدارىپ، سالافيزم اعىمىنداعىنىڭ بىرەۋىن اقتاپ العىسى كەلەتىندەر، ونىڭ قوعامعا دەندەپ ەنۋىنە جول سالا بەرەدى. ولاردىڭ وسىعان دەيىنگى «ءتوزىمدى سالافي» تۋرالى تۇسىنىك ساياساتى تاجىريبەدە ءوز جەمىسىن بەرمەدى.

ءتىپتى، تاعدىرى مەن تاريحى ۇقساس پوستكەڭەستىك كەڭىستىكتى الىپ قاراڭىزدار، ەشكىم «ءتوزىمدى سالافيزم» دەگەن قۇبىلىستى انىقتاپ، مويىنداعان جوق.

بۇگىندەرى كوپتەگەن اراب ەلى سالافيزم ۇستانىمى يسلام دىنىنە جات ەكەنىن دە ءسوزسىز راستايدى. وسىلاردى ەسەپكە الا وتىرىپ، ءبىز سالافيزممەن بايلانىستى بارلىق تۇسىنىكتى قايتادان قاراستىرۋىمىز كەرەك.

قازاقستانداعى تەررورلىق وقيعالار «ءتوزىمدى سالافيزم» دەگەن تۇسىنىكتىڭ جوق ەكەنىن دالەلدەدى. سالافيزمگە ءقاۋىپتى كوزقاراستار عانا ءتان. قايعىلى وقيعالاردان ساباق الا وتىرىپ، ءبىز قۇقىقتىق رەتتەۋ تۇرعىسىندا قورىتىندى شىعارۋىمىز كەرەك.

اقپاراتتىق تۇسىنىك جۇمىستارىنىڭ قالاي جۇرگىزەتىنىن انىقتاپ، عىلىمي زەرتتەۋ سالاسىندا، سول سەكىلدى قوعامدىق پىكىردى ءبىر سۇزگىدەن وتكىزۋىمىز ءتيىس.