Qamshy.kz رەداكسياسىنا الماتى وبلىسى ەڭبەكشىقازاق اۋدانى شەلەك اۋىلىنىڭ 38 تۇرعىنى قول قويىپ، قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ەرجان قاجى مالعاجى ۇلىنىڭ اتىنا جولدانعان حات كەلىپ ءتۇستى.
حاتقا قول قويعاندار شەلەك ەلدى-مەكەنىندەگى «نۇر-مۇحاممەد» مەشىتىنىڭ باس يمامى بولىپ راسۋل شاحينوۆتىڭ تاعايىندالعانىنا نارازىلىق بىلدىرگەن.
«نۇر-مۇحاممەد» مەشىتى اشىلعان 2011 جىلدان بەرى وندا جۇماباي ءسۇيىنباي ۇلى دەگەن ازامات يمام بولىپ كەلدى. ول ءدىني ءبىلىمى جوعارى، حانافيت مازھابىنىڭ ەرەجەلەرىن قاتاڭ ۇستاناتىن. ج. ءسۇيىنباي ۇلىنىڭ يمامدىق ەتكەن ۋاقىتىندا مەشىت جاماعاتىنىڭ سانى دا ۇدايى ارتىپ وتىردى. مەشىت ءىشى حالىققا لىق تولاتىن بولدى.
بيىل رامازان ايىنىڭ قارساڭىندا اياق استىنان جۇماباي يمام ورنىنان الىنىپ، يمامدىققا راسۋل شاحينوۆ دەگەن ازامات تاعايىندالدى. مەشىت جاماعاتىنىڭ نارازىلىق ءبىلدىرۋىنىڭ باستى سەبەبى ول كەۋدەدەن تاكپىر الادى، نامازدان سوڭ قۇران وقىمايدى، بەت سيپامايدى، جالعىز ناماز وقىسا تالتايىپ تۇرىپ وقيدى.
قازاق ءتىلىن جەتىك بىلمەگەندىكتەن (ر. شاحينوۆ – ۇيعىر دياسپوراسىنىڭ وكىلى) ۋاعىزدارى دا جۇرتقا تۇسىنىكسىز بولىپ وتىر. ول يمام بولىپ تاعايىندالعالى بەرى مەشىتتە سالافيتتەر قاپتاپ كەتتى. ولار سۇننەت نامازدارىن مۇلدەم وقىمايدى. ءتىپتى، ارالارىندا وزبەكستاننان كەلگەندەر دە بار»، - دەلىنگەن اتالعان حاتتا.
سونداي-اق، حات اۆتورلارى ر. شاحينوۆتىڭ يمام بولىپ تاعايىندالۋ سەبەپتەرىن بىلمەككە وسى سالاعا جاۋاپتى مەكەمە، ۇيىمدارعا حابارلاسقاندارىن دا ايتادى. ولاردىڭ ويىنشا، ر. شاحينوۆ اۋدانداعى وكىل يمام، اۋداندىق ىشكى ساياسات ءبولىمىنىڭ باستىعى قولداعاننان كەيىن تاعايىندالىپ وتىر.
شەلەك مەشىتىنىڭ جاماعاتى باس مۇفتيدەن اتالعان ماسەلەگە ارالاسىپ، وڭ شەشىم شىعارۋدى ءوتىنىپ وتىر.
«ءبىز، مەشىت جاماعاتى، ەلدىڭ ەرتەڭىنە الاڭداۋلىمىز. كەلەشەك ۇرپاققا اتا-بابامىز ۇستانعان حانافي مازھابىندا تاربيە بەرۋ ءۇشىن، ەلىمىزدىڭ بىرلىگى، ءدىنىمىزدىڭ تۇتاستىعى ءۇشىن ر. شاحينوۆتى ورنىنان بوساتىپ، بۇرىنعى يمامىمىزدى قايتارۋدى نەمەسە ءدىني باعىتى دۇرىس باسقا يمام جىبەرۋىڭىزدى سۇرايمىز. سونداي-اق، ءدىني ساۋاتى مانسابىنا ساي كەلمەيتىن اۋداندىق وكىل يمامدى دا ورنىنان بوساتۋىڭىزدى سۇرايمىز»، - دەلىنگەن حاتتا.
