ش. ايمانوۆ اتىنداعى «قازاقفيلم» اق، كينوپروديۋسەر جانە ينۆەستور ءاليدار وتەمۇراتوۆ گولليۆۋدتىڭ تانىمال پروديۋسەرلەرى – كەري گرانات (Cary Granat) جانە وسكار جۇلدەسىنىڭ يەگەرى ەد دجونسپەن بىرلەسە وتىرىپ «امىرە» اتتى (جۇمىس اتاۋى) كينوجوبانى ءتۇسىرۋدى قولعا الدى، - دەپ حابارلايدى Qamshy.kz.
1925 جىلى پاريج اسپانىن انگە بولەپ، كۇللى الەمدى تامساندىرعان امىرە قاشاۋبايەۆتىڭ ءومىر جولىنا ارنالعان جاڭا كوركەم ءفيلمدى ءتۇسىرۋدى قولعا العانى تۋرالى «قازاقفيلم» اق باسپا ءسوز قىزمەتى اقپارات تاراتتى.
2017 جىلى حالىقارالىق پروكاتقا شىعارۋعا جوسپارلانعان «امىرە» كينوجوباسى كوپرودۋكسيا نەگىزىندە، ياعني قازاقستان مەن اقش-تىڭ بىرلەسە وتىرىپ شىعاراتىن العاشقى جوباسى بولماق.
كينوتۋىندى قازاقتىڭ تۇڭعىش درامالىق تەنور داۋىستى ءبىرتۋار ءانشىسى امىرە قاشاۋبايەۆتىڭ (1888-1934 جج.) قامشىنىڭ سابىنداي عانا قىسقا دا، جارقىن عۇمىرىن باياندايدى. 1925 جىلى پاريجدە وتكەن Exposition Internationale des Arts Décoratifs et Industriels Modernes شەڭبەرىندە وتكەن بۇكىلالەمدىك مۋزىكالىق بايقاۋدا ەۋروپا كورەرمەندەرىنە قازاقتىڭ ءداستۇرلى انشىلىك ونەرى مەن قارا دومبىراسىن پاش ەتكەن 36 جاستاعى امرە قاشاۋبايەۆ كسرو دەلەگاسياسىنىڭ اراسىنان توپ جارىپ، ەكىنشى ورىندى جانە كۇمىس مەدال يەلەندى. فيلم، سونداي-اق، دارىندى ءانشىنىڭ مۇستافا شوقايمەن كەزدەسۋى، دجاز ورىنداۋشىسى دجوردج گەرشۆينمەن تانىسۋى جانە تۋعان جەرىنە ورالعاندا باستى كەيىپكەردىڭ باستان كەشكەن سىناقتارى تۋرالى سىر شەرتەدى.
فيلمدە امىرە قاشاۋبايەۆتىڭ رەپەرتۋارىنداعى «بالقاديشا»، «سۇرجەكەي»، «ءۇش دوس»، «دۋداراي»، «جالعىز ارشا»، «بەس قاراگەر»، «اعاش اياق» جانە «ءاي-اي بوپەم» اندەرى ورىندالادى. شىلدە ايىنىڭ سوڭىندا لاتۆيانىڭ ريگا قالاسىندا باستالعان ءتۇسىرۋ جۇمىستارى قىركۇيەك ايىندا الماتى قالاسىندا جالعاسادى.
حالىقارالىق ءتۇسىرىلىم توبىنىڭ قۇرامىندا: امەريكالىق قويۋشى-رەجيسسەر دجەف ۆەسپا (Jeff Vespa)، وپەراتور – ماكسيم وسادچيي («9 روتا»، «ستالينگراد») بار. ءفيلمنىڭ سەنارييىن جازعان بەنجامين ا. ۆان دەر ۆين (Benjamin A. van der Veen). باستى رولدەردى وتاندىق اكتەرلەر سانجار مادييەۆ (امىرە) جانە ماسكەۋ كينوفەستيۆالىندە «ۇزدىك ەر ادام ءرولى» نوميناسياسىندا جەڭىسكە جەتكەن ەركەبۇلان دايىروۆ (مۇستافا شوقاي) سومدايدى. سونىمەن قاتار بريتاندىق اكتەر بەن الدريدج (Ben Aldridge) جانە «وبلاست تمى» ءفيلمى ارقىلى تانىلعان امەريكالىق اكتريسا ەببي كورنيش (Abbie Cornish) سىندى باسقا دا اكتەرلەر قاتىسادى.
ءفيلمنىڭ اتقارۋشى پروديۋسەرلەرى – اسەت كەنجەبايەۆ جانە اننا چاكيرتوۆا. تاريحي كەڭەسشى – امىرە قاشاۋبايەۆ تۋرالى بىرنەشە ەڭبەكتەردىڭ اۆتورى قازاقستان رەسپۋبليكاسىنىڭ ەڭبەك سىڭىرگەن قايراتكەرى جارقىن شاكارىموۆ. مۋزىكالىق پروديۋسەرى – «The Magic of Nomads» جوباسىنىڭ اۆتورى ءارى جەتەكشىسى عازيزا عابدراحيموۆا. قويۋشى سۋرەتشى – ەكاتەرينا زالەتايەۆا، كوستيۋم بويىنشا سۋرەتشىلەر – اسەل شالابايەۆا جانە دايۆا پەترۋليتە.
